مجمع الزوائد ومنبع الفوائد

سیدنا عثمان غنی رضی اللہ عنہ کے بارے میں یہ بات منقول ہے : وہ نبی اکرم صلی اللہ علیہ وسلم کی مسجد کے دوسرے دروازے پر بیٹھے ، انہوں نے کندھے کا گوشت منگوایا اسے کھایا ، اور پھر کھڑے ہو کر نماز ادا کی ، انہوں نے دوبارہ وضو نہیں کیا ، پھر انہوں نے یہ بات بیان کی : میں اُس جگہ بیٹھا ہوں ، جہاں نبی اکرم صلی اللہ علیہ وسلم تشریف فرما ہوئے تھے ، اور میں نے وہی چیز کھائی ہے ، جو نبی اکرم صلی اللہ علیہ وسلم نے کھائی تھی اور پھر میں نے وہی کیا ہے جو نبی اکرم صلی اللہ علیہ وسلم نے کیا تھا ۔
یہ روایت امام أحمد ، امام ابویعلیٰ اور امام بزار نے نقل کی ہے ۔

امام بزار نے ، سیدنا عثمان غنی رضی اللہ عنہ کے حوالے سے یہ روایت نقل کی ہے : انہوں نے نبی اکرم صلی اللہ علیہ وسلم کو دیکھا آپ صلی اللہ علیہ وسلم نے روٹی اور گوشت کھایا ، اور پھر دوبارہ وضو کیے بغیر نماز ادا کر لی ۔
اس کی سند کو ” ضعیف “ قرار دیا گیا ہے ، امام أحمد کی سند کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم گوشت کھا لیتے تھے اور پھر نماز کے لیے اُٹھ جاتے تھے ، آپ صلی اللہ علیہ وسلم پانی استعمال نہیں کرتے تھے ( یعنی دوبارہ وضو نہیں کرتے تھے ) ۔
یہ روایت امام أحمد اور امام ابویعلیٰ نے نقل کی ہے اور اس کے رجال کی توثیق کی گئی ہے ۔

سیدنا مغیرہ بن شعبہ رضی اللہ عنہ بیان کرتے ہیں : نبی اکرم صلی اللہ علیہ وسلم نے کھانا کھایا ، پھر نماز کھڑی ہوئی ، تو آپ صلی اللہ علیہ وسلم اُٹھ گئے ، آپ اس سے پہلے وضو کر چکے تھے ، میں آپ کے لئے پانی لے کر آیا ، تاکہ آپ اُس سے وضو کریں ، تو آپ نے مجھے ڈانٹا اور فرمایا : پیچھے کرو ! ( راوی بیان کرتے ہیں ) اللہ کی قسم مجھے یہ بات بہت گراں گزری ، پھر آپ صلی اللہ علیہ وسلم نے نماز ادا کی ، میں نے اس کی شکایت سیدنا عمر رضی اللہ عنہ سے کی ، تو انہوں نے عرض کی : اے اللہ کے نبی ! آپ نے مغیرہ کو جو ڈانٹا ہے ، وہ اسے گراں گزرا ہے ، اسے یہ اندیشہ ہے کہ شاید آپ اُس سے ناراض ہیں ، نبی اکرم صلی اللہ علیہ وسلم نے ارشاد فرمایا : میرے من میں صرف بھلائی ہے ، یہ میرے پاس پانی لے کر آیا تھا کہ میں وضو کروں ، میں نے کھانا کھایا تھا ، اگر میں ایسا کر لیتا ، تو میرے بعد لوگوں نے بھی ایسا ہی کرنا تھا ۔
یہ روایت امام أحمد نے ، امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : میں ، میری والدہ ( سیدہ ام سلیم رضی اللہ عنہا ) اور سیدنا ابوطلحہ رضی اللہ عنہ بیٹھے ، ہم نے گوشت اور روٹی کھایا پھر میں نے وضو کا پانی منگوایا ، تو اُن دونوں نے کہا: ہم کیوں وضو کریں ؟ میں نے کہا: اس کھانے کی وجہ سے ، جو ہم نے کھایا ہے ، اُن دونوں نے کہا: کیا ہم پاکیزہ چیز کی وجہ سے وضو کریں گے ؟ اس کی وجہ سے اُس ہستی ( یعنی نبی اکرم صلی اللہ علیہ وسلم ) نے وضو نہیں کیا ، جو تم سے بہتر تھی ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوبکر صدیق رضی اللہ عنہ بیان کرتے ہیں : ( ایک مرتبہ ) نبی اکرم صلی اللہ علیہ وسلم نے ( جانور کے ) کندھے کا گوشت کھایا اور پھر نماز ادا کر لی اور دوبارہ وضو نہیں کیا ۔
یہ روایت امام ابویعلیٰ اور امام بزار نے نقل کی ہے ، اس کی سند میں ایک راوی حسن بن مصلک ہے ، اس کے ضعیف ہونے پر محدثین کا اتفاق ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم ثرید کھا لیتے تھے ، دودھ پی لیتے تھے اور دوبارہ وضو کیے بغیر نماز ادا کر لیتے تھے ۔
یہ روایت امام ابویعلیٰ نے نقل کی ہے ، اس کی سند میں ایک راوی عبدالاعلی بن عامر ہے ، جسے امام أحمد اور ابوحاتم نے ” ضعیف “ قرار دیا ہے ، ابن عدی کہتے ہیں : ثقہ راویوں نے اس سے حدیث روایت کی ہے ، اس روایت کے بقیہ رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : ہم نے سیدنا عباس رضی اللہ عنہ کی ہنڈیا میں سے کندھے کا گوشت نبی اکرم صلی اللہ علیہ وسلم کے لیے نکالا ، آپ نے اسے کھایا ، پھر دوبارہ وضو کے بغیر نماز ادا کر لی ۔
یہ روایت امام ابویعلیٰ نے نقل کی ہے ، اس کی سند میں ایک راوی محمد بن عمرو بن ابوسلمہ ہے اور یہ حدیث ، حسن ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے پنیر کے ٹکڑے کھانے کے بعد وضو کیا ، پھر آپ نے بکری کے کندھے کا گوشت کھایا اور دوبارہ وضو کیے بغیر نماز ادا کر لی ۔
یہ روایت امام بزار نے نقل کی ہے ، یہ ” صحیح “ میں بھی منقول ہے ، تاہم اس میں یہ الفاظ نہیں ہیں : ” پھر آپ صلی اللہ علیہ وسلم نے بکری کے کندھے کا گوشت کھایا اور دوبارہ وضو کیے بغیر نماز ادا کر لی “ امام بزار کے استاد کے علاوہ ، اس روایت کے تمام رجال ” صحیح “ کے رجال ہیں ۔

ایک شخص نے سیدنا معاویہ رضی اللہ عنہ کے حوالے سے یہ بات نقل کی ہے : انہوں نے نبی اکرم صلی اللہ علیہ وسلم کو دیکھا ، آپ صلی اللہ علیہ وسلم نے دودھ پیا اور پھر دوبارہ وضو کیے بغیر نماز ادا کر لی ۔
یہ روایت امام ابویعلیٰ نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوامامہ باہلی رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب سے یہ فرمایا : جب کوئی شخص باوضو ہو اور پھر کھانا کھا لے ، تو وہ اس کے بعد دوبارہ وضو نہ کرے ، البتہ اونٹ کے دودھ کا معاملہ مختلف ہے ، جب تم اُسے پیو گے ، تو بعد میں پانی کے ذریعے کلی کر لو !
یہ روایت امام طبرانی نے معجم کبیر میں نقل کی ہے اور اس کے رجال ایسے ہیں کہ میں نے کسی کو ان میں سے کسی ایک کا ذکر کرتے ہوئے نہیں دیکھا ہے ۔

سیدنا ابوامامہ باہلی رضی اللہ عنہ بیان کرتے ہیں : نبی اکرم صلی اللہ علیہ وسلم آگ پر پکی ہوئی چیز کھانے کے بعد دوبارہ وضو نہیں کرتے تھے ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی محمد بن سعید مصلوب ہے ، اور وہ کذاب ہے ۔

سیدنا ابوامامہ باہلی رضی اللہ عنہ بیان کرتے ہیں : نبی اکرم صلی اللہ علیہ وسلم سیدہ صفیہ بنت عبدالمطلب رضی اللہ عنہا کے پاس تشریف لائے ، تو انہوں نے ہڈی والا گوشت آپ کی خدمت میں پیش کیا ، وہ انہوں نے آپ کے سامنے رکھا ، پھر مزید پیش کیا اور آپ صلی اللہ علیہ وسلم کے سامنے رکھا ، نبی اکرم صلی اللہ علیہ وسلم نے اسے کھا لیا ، پھر مؤذن آیا تو اس نے کہا: آپ وضو کر لیں ، آپ وضو کر لیں ، نبی اکرم صلی اللہ علیہ وسلم نے ارشاد فرمایا : ہم پر وضو کرنا اس چیز کے حوالے سے لازم ہوتا ہے ، جو ( جسم میں اندر سے ) باہر آتی ہے ، اس چیز کی وجہ سے لازم نہیں ہوتا ، جو ( باہر سے جسم کے ) اندر جاتی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے : اُسے عبیداللہ بن زحر نے علی بن یزید سے نقل کیا ہے ، یہ دونوں راوی ضعیف ہیں اور ان دونوں سے استدلال کرنا جائز نہیں ہے ۔

سیدنا رافع بن خدیج رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا ، آپ نے دستی کا گوشت کھایا ، جب آپ فارغ ہوئے ، تو آپ صلی اللہ علیہ وسلم نے اپنی انگلیاں دیوار پر پھیر لیں ، پھر آپ صلی اللہ علیہ وسلم نے دوبارہ وضو کیے بغیر عصر اور مغرب کی نمازیں ادا کیں ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے : اسے عمرو بن قیس مکی نے ابراہیم بن محمد بن خالد بن زبیر سے نقل کیا ہے ، میں نے کسی کو ان دونوں کے حالات بیان کرتے ہوئے نہیں دیکھا ہے ،
یہ روایت ایک اور سند کے ساتھ بھی منقول ہے ، جس میں ایک راوی واقدی ہے اور وہ کذاب ہے ۔

سیدنا امام حسن بن علی رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم اُن کے پاس سے گزرے ، اُن کے ہاتھ میں ہڈی والا گوشت تھا جس میں سے وہ کھا رہے تھے ، نبی اکرم صلی اللہ علیہ وسلم نے اُسے لیا اور اس میں سے ایک یا دو مرتبہ کھایا ، پھر آپ نے دوبارہ وضو کیے بغیر نماز ادا کر لی
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن اسحاق ہے ، وہ ثقہ ہے ، لیکن تدلیس کرنے والا ہے ، اور
یہ روایت اس نے ” عنعنہ “ کے ساتھ نقل کی ہے ۔

سیدنا امام حسن بن علی رضی اللہ عنہما کے حوالے سے یہ بات منقول ہے : ایک مرتبہ وہ سیدہ فاطمہ رضی اللہ عنہا کے گھر میں نبی اکرم صلی اللہ علیہ وسلم کے پاس آئے ، سیدہ فاطمہ رضی اللہ عنہا نے نبی اکرم صلی اللہ علیہ وسلم کی خدمت میں بکری کے شانے کا پکا ہوا گوشت پیش کیا ، نبی اکرم صلی اللہ علیہ وسلم نے اُسے کھا لیا ، پھر آپ صلی اللہ علیہ وسلم اُٹھ کر نماز ادا کرنے لگے ، تو سیدہ فاطمہ رضی اللہ عنہا نے آپ کا کپڑا پکڑ لیا اور عرض کی : یا رسول اللہ ! کیا آپ وضو نہیں کریں گے ؟ نبی اکرم صلی اللہ علیہ وسلم نے دریافت کیا : اے میری بیٹی ! کس وجہ سے ؟ انہوں نے عرض کی : آپ نے آگ پر پکی ہوئی چیز کھائی ہے ، نبی اکرم صلی اللہ علیہ وسلم نے ارشاد فرمایا : تمہارے کھانے میں سب سے زیادہ پاکیزہ وہ ( کھانا ) ہوتا ہے ، جو آگ پر پکا ہو ۔ اس روایت کو امام طبرانی نے معجم کبیر میں نقل کیا ہے ، اس کی سند میں ایک راوی ابن اسحاق ہے ، وہ تدلیس کرنے والا ہے ، لیکن ثقہ ہے ۔

سیدنا محمد بن مسلمہ رضی اللہ عنہ بیان کرتے ہیں : دونوں معاملات میں سے آخری یہ ہے کہ نبی اکرم صلی اللہ علیہ وسلم نے گوشت کھا کر دوبارہ وضو کیے بغیر نماز ادا کر لی تھی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یونس بن ابوخالد ہے ، میں نے کسی کو اُس کا ذکر کرتے ہوئے نہیں دیکھا ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے آگ پر پکی ہوئی چیز کھانے کے بعد جو وضو کرنے کا حکم دیا ہے ، اس سے مراد دونوں ہاتھ اور منہ کو دھونا ہے ، یہ صفائی کے لیے ہے ، واجب نہیں ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مطرف بن مازن ہے ، جس کی نسبت جھوٹ بولنے کی طرف کی گئی ہے ۔

سیدنا معاذ بن جبل رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم میرے پاس سے گزرے ، میں اُس وقت بکری کی کھال اتارنے لگا تھا ، نبی اکرم صلی اللہ علیہ وسلم نے مجھ سے فرمایا : اے معاذ ! مجھے دو ! راوی کو شک ہے ، یا شاید یہ الفاظ ہیں : مجھے دکھاؤ ! پھر نبی اکرم صلی اللہ علیہ وسلم نے گوشت اور جلد کے درمیان دو مرتبہ ہاتھ ڈالا اور پھر ارشاد فرمایا : اے معاذ ! اس طرح کرتے ہیں ، پھر آپ صلی اللہ علیہ وسلم نماز کے لئے تشریف لے گئے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

حسن بن ابوالحسن بیان کرتے ہیں : سیدہ فاطمہ رضی اللہ عنہا بیان کرتی ہیں : ایک مرتبہ نبی اکرم صلی اللہ علیہ وسلم میرے ہاں تشریف لائے ، آپ صلی اللہ علیہ وسلم نے ہڈی والا گوشت کھایا ، سیدنا بلال رضی اللہ عنہ آپ کو بلانے کے لیے آئے ، تو آپ نماز ادا کرنے کے لیے اُٹھ گئے ، میں نے آپ کا کپڑا پکڑا ، اور میں نے عرض کی : یا رسول اللہ ! کیا آپ وضو نہیں کریں گے ؟ نبی اکرم صلی اللہ علیہ وسلم نے فرمایا : اے میری بیٹی ! میں کس وجہ سے وضو کروں ؟ میں نے عرض کی : آگ پر پکی ہوئی چیز کھانے کی وجہ سے ، نبی اکرم صلی اللہ علیہ وسلم نے ارشاد فرمایا : کیا تمہارا سب سے زیادہ پاکیزہ کھانا وہ نہیں ہوتا ، جو آگ پر پکا ہو ؟ ۔
یہ روایت امام أحمد اور امام ابویعلیٰ نے نقل کی ہے ، تاہم انہوں نے یہ لفظ نقل کیا ہے : ” سب سے زیادہ پاک کھانا “ ۔ حسن بن ابوالحسن نامی راوی کی پیدائش ، سیدہ فاطمہ رضی اللہ عنہا کے انتقال کے بعد ہوئی تھی اور
یہ روایت ” منقطع “ ہے ۔

سیدہ عائشہ صدیقہ رضی اللہ عنہا بیان کرتی ہیں : بعض اوقات نبی اکرم صلی اللہ علیہ وسلم ہنڈیا کے پاس سے گزرتے ہوئے ہڈی والا گوشت لے لیتے تھے اور اُسے کھا لیتے تھے اور پھر دوبارہ وضو کیے بغیر نماز ادا کر لیتے تھے ، آپ پانی استعمال نہیں کرتے تھے ۔
یہ روایت امام أحمد ، امام ابویعلیٰ ، امام بزار نے نقل کی ہے اور اس کے رجال ” صحیح “ کے رجال ہیں ۔

سیدہ صفیہ بنت حیی رضی اللہ عنہا بیان کرتی ہیں : نبی اکرم صلی اللہ علیہ وسلم میرے ہاں تشریف لائے ، میں نے آپ کی خدمت میں کندھے کا ٹھنڈا گوشت پیش کیا ، میں نے اسے تیار کیا تھا ، آپ نے اُسے کھا لیا اور پھر اٹھ کر نماز ادا کر لی ۔
یہ روایت امام ابویعلیٰ نے اور امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیده ضباعہ بنت زبیر رضی اللہ عنہا بیان کرتی ہیں : اُنہوں نے نبی اکرم صلی اللہ علیہ وسلم کی خدمت میں گوشت پیش کیا ، تو نبی اکرم صلی اللہ علیہ وسلم نے اُسے کھایا اور پھر دوبارہ وضو کیے بغیر نماز ادا کر لی ۔
یہ روایت امام ابویعلیٰ اور امام أحمد نے نقل کی ہے اور اس کے رجال ثقہ ہیں ۔

سیدنا عبداللہ بن حارث بن نوفل رضی اللہ عنہ بیان کرتے ہیں : سیدہ ام حکیم بنت زبیر رضی اللہ عنہا نے انہیں یہ بات بتائی : ایک مرتبہ نبی اکرم صلی اللہ علیہ وسلم سیدہ ضباعہ رضی اللہ عنہا کے ہاں تشریف لائے ، تو آپ نے اُن کے ہاں ( جانور کے ) کندھے کا گوشت کھایا اور پھر نماز ادا کر لی ، آپ نے اس کی وجہ سے دوبارہ وضو نہیں کیا ۔
یہ روایت امام طبرانی نے معجم کبیر میں اور امام أحمد نے نقل کی ہے اور اس کے رجال ” صحیح “ کے رجال ہیں ۔

سیدہ ام حکیم بنت زبیر رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو کندھے کا گوشت پیش کیا ، آپ صلی اللہ علیہ وسلم نے اس میں سے کھا لیا اور پھر نماز ادا کی ۔
یہ روایت امام أحمد نے نقل کی ہے اور اس کے رجال ثقہ ہیں ۔

محمد بن منکدر نے ، سیدہ ام ہانی رضی اللہ عنہا کے حوالے سے یہ بات نقل کی ہے : ” آپ صلی اللہ علیہ وسلم نے کندھے کا گوشت کھایا اور پھر دوبارہ وضو کیے بغیر نماز ادا کر لی “ ۔ ان کی مراد یہ تھی کہ نبی اکرم صلی اللہ علیہ وسلم نے ایسا کیا ،
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدہ ام مبشر رضی اللہ عنہا بیان کرتی ہیں : نبی اکرم صلی اللہ علیہ وسلم نے کندھے کا گوشت کھایا اور پھر دوبارہ وضو کیے بغیر نماز ادا کر لی ۔
یہ روایت امام طبرانی نے نقل کی ہے ، اس کی سند میں ایک راوی محمد بن سکن ہے ، میں نے کسی کو اس کا ذکر کرتے ہوئے نہیں پایا ہے ، اس روایت کے بقیہ رجال ثقہ ہیں ۔

سیدہ ام حکیم بنت زبیر رضی اللہ عنہا کے بارے میں یہ بات منقول ہے : اُنہوں نے نبی اکرم صلی اللہ علیہ وسلم کے لیے کھانا تیار کیا اور آپ صلی اللہ علیہ وسلم کو پیغام بھیج کر بلوایا ، نبی اکرم صلی اللہ علیہ وسلم بعض اوقات اُن کے ہاں تشریف لا کر اُن کے ہاں کھانا کھایا کرتے تھے ، وہ خاتون بیان کرتی ہیں : نبی اکرم صلی اللہ علیہ وسلم ایک دن اُن کے ہاں تشریف لائے ، تو انہوں نے نبی اکرم صلی اللہ علیہ وسلم کی خدمت میں کندھے کا گوشت پیش کیا ، وہ خاتون بیان کرتی ہیں : میں نے وہ نبی اکرم صلی اللہ علیہ وسلم کے لیے تیار کیا تھا ، وہ خاتون بیان کرتی ہیں : نبی اکرم صلی اللہ علیہ وسلم نے اُسے کھا لیا اور پھر دوبارہ وضو کیے بغیر نماز ادا کر لی ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدہ عمرہ بنت حزام رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم کے لیے کھجور کے باغ میں صفائی کر کے جگہ تیار کی ۔ انہوں نے نبی اکرم صلی اللہ علیہ وسلم کے لئے بکری ذبح کروائی ، نبی اکرم صلی اللہ علیہ وسلم نے اُس کا گوشت کھایا ، پھر آپ صلی اللہ علیہ وسلم نے وضو کر کے ظہر کی نماز ادا کی ، اس خاتون نے آپ کی خدمت میں اس بکری کا گوشت پیش کیا ، پھر نبی اکرم صلی اللہ علیہ وسلم نے دوبارہ وضو کیے بغیر عصر کی نماز ادا کر لی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن ثابت بنانی ہے اور وہ ضعیف ہے ، اس روایت کے بقیہ رجال ” صحیح “ کے رجال ہیں ۔

عمرو بن محمد بن عمرو بن سعد بن معاذ بیان کرتے ہیں : میں نے ہند بنت سعید بن سیدنا ابوسعید خدری رضی اللہ عنہ کو اپنی پھوپھی کے حوالے سے یہ روایت نقل کرتے ہوئے سنا ہے : وہ خاتون بیان کرتی ہیں : نبی اکرم صلی اللہ علیہ وسلم سیدنا ابوسعید خدری رضی اللہ عنہ کی عیادت کرنے کے لیے تشریف لائے ، تو ہم نے آپ کی خدمت میں بکری کی دستی کا گوشت پیش کیا ، آپ نے اُسے کھا لیا ، نماز کا وقت ہوا ، تو آپ نے کلی کر کے دوبارہ وضو کیے بغیر نماز ادا کر لی ۔
یہ روایت امام طبرانی نے معجم کبیر میں مختلف طرق کے حوالے سے نقل کی ہے ، جن میں سے بعض کے رجال ”صحیح“ کے رجال ہیں ، البتہ ہند بنت سعید نامی خاتون کا معاملہ مختلف ہے ، ابن حبان نے انہیں ” ثقہ “ قرار دیا ہے ۔

سیدہ ام سلیم رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کی خدمت میں کندھے کا بھنا ہوا گوشت پیش کیا ، آپ نے اسے کھا لیا ، پھر آپ نماز کے لئے تشریف لے گئے اور آپ نے دوبارہ وضو نہیں کیا ۔
یہ روایت امام طبرانی نے معجم کبیر میں محمد بن یوسف نامی راوی کے حوالے سے ، اس خاتون سے نقل کی ہے ، میں نے کسی کو محمد نامی اس راوی کا ذکر کرتے ہوئے نہیں پایا ہے ۔

سیدہ ام عامر بنت یزید بن سکن رضی اللہ عنہا ، جو نبی اکرم صلی اللہ علیہ وسلم کے دست اقدس پر بیعت کرنے والی خواتین میں سے ایک ہیں ، وہ بیان کرتی ہیں : وہ نبی اکرم صلی اللہ علیہ وسلم کی خدمت میں ہڈی والا گوشت لے کر حاضر ہوئیں ، تو نبی اکرم صلی اللہ علیہ وسلم نے اسے کھایا آپ اس وقت بنو عبداشہل کی مسجد میں موجود تھے ، پھر آپ نے اُٹھ کر نماز ادا کی اور دوبارہ وضو نہیں کیا ۔
یہ روایت امام طبرانی نے معجم کبیر میں ابراہیم بن اسماعیل بن ابوخلیفہ کے حوالے سے ، عبدالرحمن بن عبدالرحمن بن ثابت بن صامت کے حوالے سے اس خاتون سے نقل کی ہے اور میں نے کسی کو ان دونوں کا ذکر کرتے ہوئے نہیں پایا ہے ۔

علقمہ بیان کرتے ہیں : ہم ایک بڑا برتن لے کر آئے ، ہم سیدنا عبداللہ بن مسعود رضی اللہ عنہ کے ساتھ تھے ، انہوں نے اس برتن کے بارے میں حکم دیا ، تو وہ راستے میں رکھ دیا گیا ، انہوں نے اس میں سے کھایا ، اُن کے ساتھ ہم نے بھی کھایا ، وہ ہر گزرنے والے فرد کو بھی دعوت دے دیتے ، پھر ہم نماز ادا کرنے کے لئے گئے ، تو انہوں نے صرف یہ کیا کہ انگلیوں کے کونے دھو لیے اور منہ میں کلی کر لی ، اور پھر نماز ادا کی ۔ ایک روایت میں یہ الفاظ ہیں : سیدنا عبداللہ بن مسعود رضی اللہ عنہ کے گھر سے ایک برتن ہمارے پاس لایا گیا ، جس میں روٹی اور گوشت موجود تھا ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ۔
یہ روایت امام طبرانی نے معجم کبیر میں نقل کی ہے ، ان دونوں روایات کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : میں کوئی بری بات کرنے کے بعد وضو کروں ، یہ میرے نزدیک اس سے زیادہ پسندیدہ ہو گا کہ میں پاکیزہ کھانا کھانے کے بعد وضو کروں ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔