مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” چھ لوگ ایسے ہیں ، جن پر میں نے لعنت کی ہے ، اُن پر اللہ تعالیٰ نے اور ہر مستجاب الدعوات نبی نے لعنت کی ہے ، اللہ کی کتاب میں اضافہ کرنے والا ، اللہ کی تقدیر کو جھٹلانے والا ، اللہ تعالیٰ کی مقرر کردہ حرمت کو حلال کرنے والا ، میری عترت کے حوالے سے اُس چیز کو حلال کرنے والا ، جسے اللہ تعالیٰ نے حرام قرار دیا ہے ، اور سنت کو ترک کرنے والا ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبیداللہ بن عبدالرحمن بن موہب ہے ، یعقوب بن شیبہ بیان کرتے ہیں : اس میں ضعف پایا جاتا ہے ، ایک روایت کے مطابق یحیی بن معین نے اسے ضعیف قرار دیا ہے اور دوسری روایت کے مطابق انہوں نے اسے ثقہ قرار دیا ہے ، ابوحاتم کہتے ہیں : یہ صالح الحدیث ہے ، ابن حبان نے اسے ثقہ قرار دیا ہے ، اس روایت کے رجال صحیح کے جال ہیں ۔

سیدنا عمرو بن شغوی یافعی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سات افراد ایسے ہیں ، جن پر میں نے اور ہر مستجاب الدعوات نبی نے لعنت کی ہے ، اللہ تعالیٰ کی کتاب میں اضافہ کرنے نے والا ، اللہ تعالیٰ کی مقرر کردہ تقدیر کو جھٹلانے والا ، اللہ تعالیٰ کی حرمت کو حلال قرار دینے والا ، میری عترت کے حوالے سے اس چیز کو حلال قرار دینے والا ، جسے اللہ تعالیٰ نے حرام قرار دیا ہے ، میری سنت کو ترک کرنے والا ، مال فے کے بارے میں امتیازی سلوک کرنے والا ، اور اپنی حکومت کی وجہ سے جبر کرنے والا ، تاکہ وہ اُس کی عزت کرے ، جسے اللہ تعالیٰ نے ذلیل کیا ہے ، اور اُسے ذلیل کرے ، جسے اللہ تعالیٰ نے عزت عطا کی ہے ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے اور ایک راوی ابورمعشر حمیری ہے ، میں نے کسی کو اُس کا ذکر کرتے ہوئے نہیں دیکھا ہے ۔

سیدنا عبداللہ بن عمر رضی اللہ عنہما بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” حلال چیز کو حرام قرار دینے والا ، حرام کو حلال قرار دینے والے کی مانند ہے ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

ام معبد جو قرظہ بن کعب کی مالکن ہیں : انہوں نے فرمایا : اے میرے بیٹے ! جس چیز کو اللہ تعالیٰ نے حلال قرار دیا ہے ، اُسے حرام قرار دینے والا ، اس شخص کی مانند ہے جو اللہ تعالیٰ کی حرام قرار دی ہوئی چیز کو حلال قرار دیتا ہے ۔
یہ روایت امام طبرانی نے معجم کبیر میں نقل کی ہے اور اس کی سند ایسی ہے کہ اس کے زیادہ تر راویوں کا ذکر کرتے ہوئے میں نے کسی کو نہیں دیکھا ہے ۔

سیدنا عہدہ سوائی بیان کرتے ہیں : نبی اکرم صلی اللہ علیہ وسلم کے قریب کچھ لوگ شور و غوغا کر رہے تھے ، آپ صلی اللہ علیہ وسلم کے اصحاب نے عرض کی : یا رسول اللہ ! اگر آپ کسی کو ان لوگوں کی طرف بھجوائیں جو انہیں اس حرکت سے منع کر دے ( تو یہ مناسب ہو گا ) نبی اکرم صلی اللہ علیہ وسلم نے ارشاد فرمایا : اگر میں ان کی طرف پیغام بھیج کر انہیں اس بات سے منع کر دوں کہ انہوں نے ” حجون “ نہیں جانا ، تو ان میں سے کوئی وہاں بھی چلا جائے گا ، اگرچہ اسے وہاں کوئی کام نہ ہو ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا ابوجحیفہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم تشریف فرما تھے ، آپ کے آگے کچھ لوگ ایسی حرکتیں کر رہے تھے ، جو آپ کو ناگوار گزر رہی تھیں ، ان کا کلام اور ان کا شور و غوغا ( آپ کو ناگوار گزر رہا تھا ) عرض کی گئی : یا رسول اللہ ! آپ انہیں منع کیوں نہیں کرتے ہیں ؟ نبی اکرم صلی اللہ علیہ وسلم نے ارشاد فرمایا : اگر میں انہیں ” حجون “ جانے سے منع کر دوں ، تو ان میں سے کوئی ایک وہاں بھی چلا جائے گا اگرچہ اسے وہاں کوئی کام نہ ہو ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : عنقریب ایسا ہو گا کہ کوئی شخص یہ کہے گا : بیشک اللہ تعالیٰ نے یہ حکم دیا ہے اور اس چیز سے منع کیا ہے ، تو اللہ تعالیٰ اُس سے فرمائے گا : تم نے جھوٹ بولا: ہے ، یا وہ شخص یہ کہے گا : بے شک اللہ تعالیٰ نے اس چیز کو حرام قرار دیا ہے اور اس نے اس کو حلال قرار دیا ہے ، تو اللہ تعالیٰ اس سے فرمائے گا : تم نے جھوٹ بولا: ہے ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبداللہ بن مسعود رضی اللہ عنہ فرماتے ہیں : بیشک حلال چیز کو حرام قرار دینے والا ، حرام چیز کو حلال قرار دینے والے کی مانند ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ، اس کے اور بھی طرق ہیں ، جو شکار سے متعلق کتاب میں آئیں گے ۔

سیدنا صہیب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو ارشاد فرماتے ہوئے سنا ہے : ” وہ شخص قرآن پر ایمان نہیں رکھتا جو اس کی حرام قرار دی ہوئی چیزوں کو حلال قرار دیتا ہے ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن یزید بن سنان رہاوی ہے ، جسے امام بخاری رحمہ اللہ اور دیگر حضرات نے ضعیف قرار دیا ہے ، جبکہ ابن حبان نے اس کا تذکرہ کتاب الثقات میں کیا ہے اس کے باپ یزید کو امام ابوداؤد اور دیگر حضرات نے ضعیف کہا: ہے ، امام بخاری رحمہ اللہ فرماتے ہیں : یہ ” مقارب الحدیث “ ہے ۔