المستدرك على الصحيحين

شقیق سے روایت ہے کہ ایک شخص کو پیٹ میں صفرا (زرداب) کی شکایت ہوئی تو اس کے لیے نشہ آور مشروب «السَّكَرُ» تجویز کیا گیا، جب اس کا تذکرہ سیدنا عبداللہ بن مسعود رضی اللہ عنہ سے کیا گیا تو انہوں نے فرمایا: بے شک اللہ تعالیٰ نے تمہاری شفا ان چیزوں میں نہیں رکھی جو اس نے تم پر حرام کی ہیں۔

نافع سے روایت ہے، وہ کہتے ہیں کہ سیدنا ابن عمر رضی اللہ عنہما جب اپنے گھر کے کسی فرد کے علاج کے لیے طبیب کو بلاتے تو اس پر یہ شرط لگاتے کہ وہ کسی ایسی چیز سے علاج نہ کرے جسے اللہ عزوجل نے حرام قرار دیا ہے۔

سیدنا ابوہریرہ رضی اللہ عنہ سے روایت ہے کہ ایک خاتون نبی کریم ﷺ کی خدمت میں حاضر ہوئی اور عرض کیا کہ اسے شیطان کا اثر (مرگی یا جنون) ہوتا ہے، تو رسول اللہ ﷺ نے فرمایا: ”اگر تم چاہو تو میں اللہ عزوجل سے دعا کر دیتا ہوں اور وہ تمہیں تندرست کر دے گا، اور اگر تم چاہو (تو اس بیماری پر صبر کرو) پھر تمہارا کوئی حساب اور عذاب نہیں ہوگا“، اس خاتون نے عرض کیا: یا رسول اللہ! تب میں (صبر ہی) کروں گی۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا فضالہ بن عبید رضی اللہ عنہ سے روایت ہے کہ اہل عراق کے دو آدمی اپنے والد کے لیے شفا کی تلاش میں آئے جن کا پیشاب بند ہو گیا تھا، لوگوں نے انہیں فضالہ کی طرف رہنمائی کی، وہ دونوں فضالہ کے پاس آئے اور اپنے والد کی تکلیف کا ذکر کیا، تو فضالہ نے کہا: میں نے رسول اللہ ﷺ کو فرماتے ہوئے سنا ہے: ”تم میں سے جس کسی کو کوئی تکلیف ہو - یا اس کے کسی بھائی کو تکلیف پہنچے - تو اسے چاہیے کہ یہ دعا پڑھے: «رَبَّنَا الَّذِي فِي السَّمَاءِ تَقَدَّسَ اسْمُكَ، أَمْرُكَ فِي السَّمَاءِ وَالْأَرْضِ، كَمَا رَحْمَتُكَ فِي السَّمَاءِ وَالْأَرْضِ، اغْفِرْ لَنَا حُوبَنَا وَخَطَايَانَا يَا رَبَّ الطَّيِّبِينَ، أَنْزِلْ شِفَاءً مِنْ شِفَائِكَ وَرَحْمَةً مِنْ رَحْمَتِكَ عَلَى هَذَا الْوَجَعِ» ”اے ہمارے رب جو آسمان میں ہے، تیرا نام پاک ہے، تیرا حکم آسمان اور زمین دونوں میں نافذ ہے، جیسے تیری رحمت آسمان میں ہے ویسے ہی زمین پر بھی (نازل فرما)، اے پاکیزہ لوگوں کے رب! ہمارے گناہوں اور ہماری خطاؤں کو معاف فرما، اپنی شفا میں سے اس تکلیف پر شفا اور اپنی رحمت میں سے رحمت نازل فرما“، تو وہ تندرست ہو جائے گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔