المستدرك على الصحيحين

سیدنا عقبہ بن عامر جہنی رضی اللہ عنہ سے روایت ہے کہ وہ دس سواروں کے ایک قافلے کے ساتھ نبی کریم ﷺ کی خدمت میں حاضر ہوئے، آپ ﷺ نے ان میں سے نو افراد سے بیعت لی اور ایک شخص سے رک گئے، انہوں نے عرض کیا: اس شخص کا کیا معاملہ ہے کہ آپ اس سے بیعت نہیں لے رہے؟! آپ ﷺ نے فرمایا: ”اس کے بازو پر تعویذ بندھا ہوا ہے“، تب اس شخص نے وہ تعویذ کاٹ دیا تو رسول اللہ ﷺ نے اس سے بیعت لی اور پھر فرمایا: ”جس نے (تعویذ) لٹکایا اس نے شرک کیا۔“

سیدنا عثمان بن ابی العاص رضی اللہ عنہ سے روایت ہے کہ انہوں نے عرض کیا: یا رسول اللہ! شیطان میری نماز اور میری قرات کے درمیان حائل ہو جاتا ہے، تو آپ ﷺ نے فرمایا: ”وہ ایک شیطان ہے جسے ”خنزب“ کہا جاتا ہے، جب تم اسے محسوس کرو تو اس سے اللہ کی پناہ مانگو اور اپنی بائیں جانب (تین بار) تھوک دو“، انہوں نے کہا: میں نے ایسا ہی کیا تو اللہ نے مجھ سے وہ وسوسہ دور کر دیا۔
یہ حدیث صحیح الاسناد ہے لیکن شیخین نے اسے روایت نہیں کیا۔

ثابت بنانی سے روایت ہے کہ جب تمہیں کوئی تکلیف ہو تو اپنا ہاتھ وہاں رکھو جہاں درد ہے، پھر کہو: «بِاسْمِ اللَّهِ، أَعُوذُ بِعِزَّةِ اللَّهِ وَقُدْرَتِهِ مِنْ شَرِّ مَا أَجِدُ مِنْ وَجَعِي هَذَا» ”اللہ کے نام کے ساتھ، میں اللہ کی عزت اور اس کی قدرت کی پناہ مانگتا ہوں اس شر سے جو میں اپنی اس تکلیف میں محسوس کر رہا ہوں“، پھر اپنا ہاتھ اٹھاؤ اور اسے طاق تعداد میں دہراؤ، کیونکہ سیدنا انس بن مالک رضی اللہ عنہ نے مجھے بتایا ہے کہ رسول اللہ ﷺ نے انہیں اسی طرح کی ہدایت فرمائی تھی۔
یہ حدیث صحیح الاسناد ہے لیکن شیخین نے اسے روایت نہیں کیا۔