المستدرك على الصحيحين

ابواسحاق سے روایت ہے کہ رسول اللہ ﷺ نے سیدنا عقیل بن ابی طالب رضی اللہ عنہ سے فرمایا: ”اے ابویزید! میں تم سے دو وجہ سے محبت کرتا ہوں: ایک میری تمہارے ساتھ قرابت داری کی وجہ سے اور دوسری اس محبت کی وجہ سے جو میرے چچا کو تم سے تھی، جس کا مجھے علم ہے۔“

سیدنا حذیفہ رضی اللہ عنہ سے روایت ہے کہ نبی کریم ﷺ سیدنا عقیل رضی اللہ عنہ سے فرمایا کرتے تھے: ”اے عقیل! میں تم سے دو وجہ سے محبت کرتا ہوں: ایک تمہاری ذات کی وجہ سے، اور دوسری اس محبت کی وجہ سے جو ابوطالب کو تم سے تھی۔“

سیدنا علی بن حسین اپنے والد سے اور وہ اپنے دادا سے روایت کرتے ہیں کہ رسول اللہ ﷺ ایک مکان سے جھانکے جبکہ آپ کے ساتھ آپ کے دونوں چچا سیدنا عباس اور سیدنا حمزہ رضی اللہ عنہما تھے، اور سیدنا علی، سیدنا جعفر اور سیدنا عقیل رضی اللہ عنہم ایک زمین میں کام کر رہے تھے، تو رسول اللہ ﷺ نے اپنے دونوں چچاوں سے فرمایا: ”ان میں سے (کفالت کے لیے) انتخاب کر لیں،“ تو ایک نے جعفر کو چن لیا اور دوسرے نے عقیل کو، آپ ﷺ نے فرمایا: ”تم دونوں نے انتخاب کر لیا ہے، اور اللہ نے میرے لیے علی کا انتخاب فرمایا ہے۔“

سیدنا عقیل بن ابی طالب رضی اللہ عنہ سے روایت ہے کہ قریش ابوطالب کے پاس آئے اور کہا: آپ کا بھتیجا ہمیں ہماری محفلوں اور مجلسوں میں تکلیف پہنچاتا ہے، اسے ہمیں ایذا دینے سے روکیں، تو انہوں نے مجھ سے فرمایا: اے عقیل! محمد ﷺ کو بلا لاؤ، وہ کہتے ہیں کہ میں آپ کے پاس گیا اور آپ کو ایک چھوٹے سے گھر سے نکالا، آپ ﷺ دوپہر کے وقت شدید گرمی میں تشریف لائے اور تپتی زمین کی تپش کی وجہ سے سائے کی تلاش میں چل رہے تھے، جب ہم ان لوگوں کے پاس پہنچے تو ابوطالب نے کہا: تمہارے چچا زاد بھائیوں کا دعویٰ ہے کہ تم انہیں ان کی محفلوں اور مجلسوں میں تکلیف پہنچاتے ہو، لہٰذا اس سے باز آ جاؤ، تو رسول اللہ ﷺ نے اپنی نظر آسمان کی طرف اٹھائی اور فرمایا: ”کیا تم اس سورج کو دیکھ رہے ہو؟“ انہوں نے کہا: جی ہاں، آپ ﷺ نے فرمایا: ”میں اس کام کو چھوڑنے پر اس سے زیادہ قدرت نہیں رکھتا جتنا تم اس بات پر کہ تم اس سورج سے آگ کا ایک شعلہ روشن کر لو،“ ابوطالب نے (قریش سے) کہا: میرے بھتیجے نے کبھی جھوٹ نہیں بولا، لہٰذا تم واپس چلے جاؤ۔

حسن بصری سے روایت ہے کہ سیدنا عقیل بن ابی طالب رضی اللہ عنہ ہمارے ہاں تشریف لائے اور بنو جشم بن سعد کی ایک خاتون سے نکاح کیا، جب وہ نکاح کے بعد باہر آئے تو لوگوں نے انہیں زمانہ جاہلیت کی دعا دیتے ہوئے کہا: ”اللہ نباہ کرے اور بیٹے عطا کرے،“ تو انہوں نے فرمایا: یہ نہ کہو، کیونکہ رسول اللہ ﷺ نے ہمیں اس طرح کہنے سے منع فرمایا ہے اور ہمیں یہ کہنے کا حکم دیا ہے: «بَارَكَ اللهُ لَكَ، وَبَارَكَ عَلَيْكَ» ”اللہ تمہیں برکت عطا فرمائے اور تم پر برکت نازل فرمائے۔“
معقل بن یسار مزنی رضی اللہ عنہ کا ذکر۔