المستدرك على الصحيحين

محرر بن ابی ہریرہ سے مروی ہے کہ میرے والد کا نام عبد عمرو بن عبد غنم تھا۔

سیدنا ابو ہریرہ رضی اللہ عنہ سے روایت ہے کہ انہوں نے فرمایا: ”زمانہ جاہلیت میں میرا نام عبد شمس بن صخر تھا، پھر رسول اللہ ﷺ نے میرا نام عبدالرحمن رکھا۔“

سعید بن عبدالعزیز سے روایت ہے کہ سیدنا ابوہریرہ رضی اللہ عنہ کا نام (زمانہ جاہلیت میں) ”عبد غنم“ تھا۔

ابومسہر سے مروی ہے کہ سیدنا ابوہریرہ رضی اللہ عنہ کا نام ”علی بن عبد شمس“ تھا۔ جبکہ امام احمد بن حنبل، ابوعبیدہ الحداد کے واسطے سے بیان کرتے ہیں کہ ان کا نام ”عبداللہ“ تھا۔

یزید بن ابی حبیب سے روایت ہے کہ سیدنا ابوہریرہ رضی اللہ عنہ کا نام ”عبد نہم بن عامر“ تھا۔

یحییٰ بن بکیر سے روایت ہے کہ سیدنا ابوہریرہ رضی اللہ عنہ کی وفات مقامِ ”عقیق“ میں ہوئی، ان کا نام ”عبداللہ بن عمرو“ تھا اور بعض لوگوں نے ”ابن عبدالعزیٰ“ بھی کہا ہے۔

امام احمد بن حنبل سے مروی ہے کہ سیدنا ابوہریرہ رضی اللہ عنہ کے نام کے بارے میں عبد شمس، عبد نہم، عبد غنم اور سکین کے الفاظ کہے گئے ہیں۔

ابن عائشہ سے مروی ہے کہ سیدنا ابوہریرہ رضی اللہ عنہ کا نام ”سکین“ تھا۔ (امام حاکم فرماتے ہیں کہ) ابوہریرہ رضی اللہ عنہ کے نام میں پایا جانے والا یہ اختلاف نو (9) مختلف اقوال تک پہنچا ہے، میرے نزدیک ان میں سب سے صحیح قول یہ ہے کہ جاہلیت میں ان کا نام ”عبد شمس“ اور اسلام میں ”عبدالرحمن“ تھا، اسی طرح ان کی عمر میں بھی اختلاف ہے۔

ابو معشر سے روایت ہے کہ سیدنا ابوہریرہ رضی اللہ عنہ کی وفات سیدنا معاویہ رضی اللہ عنہ کے دورِ خلافت میں 58 ہجری میں ہوئی، اور اسی سال سعید بن عاص، سیدہ عائشہ اور سیدنا سعد بن ابی وقاص (مالک) رضی اللہ عنہم اجمعین کی وفات ہوئی۔