المستدرك على الصحيحين

عبید اللہ بن ولید وصافی اپنے والد سے روایت کرتے ہیں کہ جب عمرو بن جرموز نے سیدنا زبیر بن عوام رضی اللہ عنہ کو شہید کیا تو ان کی زوجہ عاتکہ بنت زید بن عمرو بن نفیل رضی اللہ عنہا نے اشعار پڑھے —اور وہ ہجرت کرنے والی جلیل القدر خواتین میں سے تھیں— وہ کہہ رہی تھیں: ”ابن جرموز نے مقابلے کے دن ایک ایسے عظیم شہسوار کے ساتھ غداری کی جو میدان سے بھاگنے والا نہیں تھا۔ اے عمرو! اگر تم انہیں بیدار یا چوکنا کر دیتے تو تم انہیں ایسا پاتے کہ نہ ان کی انگلیاں کانپتیں اور نہ ہاتھ۔ تیری ماں تجھے روئے! کیا تو نے ماضی میں صبح و شام آنے جانے والوں میں سے ان جیسی کسی ہستی پر غلبہ پایا ہے؟ انہوں نے کتنے ہی کٹھن معرکوں میں شمولیت اختیار کی جن سے تمہارے جیسا بزدل انہیں ہٹا نہیں سکا“۔
طلحہ بن عبید اللہ تیمی رضی اللہ عنہ کے مناقب کا ذکر۔

عروہ بن زبیر رضی اللہ عنہ سے روایت ہے کہ سیدنا طلحہ بن عبید اللہ بن عثمان بن عمرو بن کعب بن سعد بن تیم بن مرہ رضی اللہ عنہ ملک شام میں تھے (جب غزوہ بدر پیش آیا)، انہوں نے رسول اللہ ﷺ سے (مالِ غنیمت میں) اپنے حصے کے متعلق عرض کی تو آپ ﷺ نے ان کا حصہ مقرر فرما دیا، انہوں نے دریافت کیا: اے اللہ کے رسول ﷺ! کیا مجھے اجر بھی ملے گا؟ آپ ﷺ نے فرمایا: ”اور تمہارا اجر بدر کے دن سے (ثابت) ہے۔“

سیدنا عبداللہ بن عباس رضی اللہ عنہما سے روایت ہے، انہوں نے کہا: سیدنا ابوبکر صدیق، سیدنا عثمان، سیدنا طلحہ، سیدنا عمار بن یاسر، سیدنا عبدالرحمن بن عوف اور سیدنا زبیر رضی اللہ عنہم کی ماؤں نے اسلام قبول کیا، نیز سیدنا سعد رضی اللہ عنہ اور ان کی والدہ نے بھی (نبی کریم ﷺ کی) زندگی میں اسلام قبول کیا۔

ابن شہاب زہری سے روایت ہے کہ سیدنا طلحہ بن عبید اللہ بن عثمان بن عمرو بن کعب بن سعد بن تیم بن مرہ رضی اللہ عنہ نبی کریم ﷺ کی بدر سے واپسی کے بعد ملک شام سے تشریف لائے، انہوں نے نبی کریم ﷺ سے (مالِ غنیمت میں) اپنے حصے کے بارے میں کلام کیا تو نبی کریم ﷺ نے ان سے فرمایا: ”تمہارا حصہ تمہارے لیے (ثابت) ہے۔“ انہوں نے عرض کی: اے اللہ کے رسول ﷺ! کیا میرا اجر بھی ہے؟ آپ ﷺ نے فرمایا: ”اور تمہارے لیے تمہارا اجر بھی ہے۔“