المستدرك على الصحيحين

موسیٰ بن طلحہ سے روایت ہے، انہوں نے کہا: سیدنا علی بن ابی طالب، سیدنا زبیر، سیدنا طلحہ بن عبید اللہ اور سیدنا سعد بن ابی وقاص رضی اللہ عنہم کے بارے میں کہا جاتا تھا کہ یہ «عذار عام واحد» (ایک ہی سال کے پٹے) ہیں، ابراہیم کہتے ہیں: اس کا مطلب یہ ہے کہ وہ سب ایک ہی سال پیدا ہوئے تھے۔

ہشام بن عروہ اپنے والد سے روایت کرتے ہیں، انہوں نے بیان کیا کہ سیدنا زبیر بن عوام رضی اللہ عنہ کی وفات پر ان کی زوجہ عاتکہ بنت زید بن عمرو بن نفیل رضی اللہ عنہا ان کی وارث بنیں، ان کے حصے میں آنے والی میراث کی رقم اسی ہزار درہم تک پہنچی۔ انہوں نے سیدنا زبیر رضی اللہ عنہ کا مرثیہ بیان کرتے ہوئے یہ اشعار کہے: ”ابن جرموز نے معرکے کے دن ایک ایسے بہادر شہسوار کے ساتھ غداری کی جو کبھی پیٹھ دکھانے والا نہیں تھا۔ اے عمرو! اگر تم انہیں چوکنا کر دیتے تو تم انہیں ایسا پاتے کہ نہ ان کی انگلیاں لرزتیں اور نہ ہی ہاتھ (یعنی وہ نہایت ثابت قدم رہتے)۔ تیری ماں تجھ پر روئے! کیا تو نے ماضی میں صبح و شام آنے جانے والوں میں سے کسی ایسے شہسوار پر فتح پائی ہے جو ان جیسا ہو؟ انہوں نے کتنے ہی کٹھن معرکوں کا سامنا کیا جن سے تمہارے جیسے بزدل انہیں پیچھے نہ ہٹا سکے، اللہ کی قسم جو تمہارا رب ہے! اگر تم نے کسی مسلمان کو (ناحق) قتل کیا ہے تو تم پر جان بوجھ کر قتل کرنے والے کی سزا ثابت ہو چکی ہے۔“