المستدرك على الصحيحين

محمد بن اسحاق بیان کرتے ہیں کہ عبد اللہ بن مسعود بن حارث بن شمخ بن مخزوم بن کاہل بن حارث بن سعد بن ہذیل بنو زہرہ کے حلیفوں میں سے تھے۔

محمد بن عمر بیان کرتے ہیں کہ عبد اللہ بن مسعود بن غافل بن حبیب بن شمخ بن فار بن مخزوم بن صاہلہ بن کاہل بن حارث بن تمیم بن سعد بن ہذیل بن مدرکہ، ان کی کنیت ان کے بیٹے عبد الرحمن کے نام پر ابو عبد الرحمن تھی، ان کے والد مسعود بن غافل نے جاہلیت میں عبد الحارث بن زہرہ سے حلف کا معاہدہ کیا تھا، عبد اللہ بن مسعود رسول اللہ ﷺ کے دارِ ارقم میں تشریف لانے سے قبل ہی اسلام لے آئے تھے، تمام سیرت نگاروں کے نزدیک انہوں نے غزوہ بدر، احد، خندق اور رسول اللہ ﷺ کے ہمراہ تمام غزوات میں شرکت فرمائی، انہوں نے دو ہجرتیں کیں، وہ رسول اللہ ﷺ کے راز دان اور آپ کے تکیے، مسواک، جوتے اور وضو کے پانی کے نگران تھے، وہ دبلے پتلے، پستہ قد اور گہرے گندمی رنگ کے حامل تھے، ان کی وفات سن 32 ہجری میں مدینہ منورہ میں ہوئی اور انہیں جنت البقیع میں دفن کیا گیا، وفات کے وقت ان کی عمر ساٹھ سال سے کچھ اوپر بتائی جاتی ہے۔

محمد بن عبد اللہ بن نمیر بیان کرتے ہیں کہ سیدنا عبد اللہ بن مسعود رضی اللہ عنہ کی وفات مدینہ منورہ میں سن 32 ہجری میں ہوئی جب سیدنا عثمان رضی اللہ عنہ کی شہادت کا وقت قریب تھا، انہوں نے سیدنا زبیر بن عوام رضی اللہ عنہ کو وصیت فرمائی تھی چنانچہ انہوں نے ہی ان کی نمازِ جنازہ پڑھائی، ایک قول یہ بھی ہے کہ سیدنا عمار بن یاسر رضی اللہ عنہ نے ان کی نمازِ جنازہ پڑھائی، انہیں رات کے وقت جنت البقیع میں دفن کیا گیا اور اس وقت ان کی عمر ساٹھ سال سے کچھ اوپر تھی۔

سیدنا عبد اللہ بن مسعود رضی اللہ عنہ سے روایت ہے کہ نبی کریم ﷺ نے ان کی کنیت ”ابو عبد الرحمن“ رکھی تھی حالانکہ اس وقت ان کے ہاں کوئی اولاد پیدا نہیں ہوئی تھی۔

مصعب بن عبد اللہ زبیری اپنے والد سے روایت کرتے ہیں کہ سیدنا عبد اللہ بن مسعود رضی اللہ عنہ کی والدہ ام عبد بنت عبد بن حارث بن زہرہ تھیں۔

یحییٰ بن معین بیان کرتے ہیں کہ سیدنا عبد اللہ بن مسعود رضی اللہ عنہ کی کنیت ابو عبد الرحمن تھی۔

ابراہیم نخعی سے روایت ہے کہ سیدنا ابن مسعود رضی اللہ عنہ نے علقمہ کی کنیت ”ابو شبل“ رکھی تھی جبکہ ابھی ان کے ہاں کوئی اولاد پیدا نہیں ہوئی تھی، جب ان سے اس بارے میں پوچھا گیا تو انہوں نے بتایا کہ علقمہ نے انہیں سیدنا عبد اللہ بن مسعود رضی اللہ عنہ کے حوالے سے یہ حدیث بیان کی ہے کہ رسول اللہ ﷺ نے ان کی کنیت ”ابو عبد الرحمن“ ان کے ہاں اولاد پیدا ہونے سے پہلے ہی رکھ دی تھی۔