المستدرك على الصحيحين

ابواسحاق سے روایت ہے کہ میں نے قثم بن عباس سے پوچھا: ”سیدنا علی رضی اللہ عنہ آپ لوگوں (عباس بن عبدالمطلب کی اولاد) کی موجودگی میں رسول اللہ ﷺ کے وارث کیسے بنے؟“ انہوں نے جواب دیا: ”اس لیے کہ وہ ہم سب میں پہلے آپ ﷺ کے ساتھ ملے اور سب سے زیادہ آپ ﷺ کے ساتھ جڑے رہنے والے تھے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

اسماعیل بن اسحاق القاضی نے قثم بن عباس کے اس قول پر تبصرہ کرتے ہوئے فرمایا: ”وارث تو نسب یا ولاء کے ذریعے وراثت پاتا ہے، اور اہل علم کے درمیان اس میں کوئی اختلاف نہیں کہ چچا کی موجودگی میں ابن العم (چچا زاد) مالی وارث نہیں ہوتا، لہٰذا اس اجماع سے یہ ثابت ہوا کہ سیدنا علی رضی اللہ عنہ نے آپ ﷺ سے علم کی وراثت پائی تھی۔“

سیدنا عبداللہ بن عباس رضی اللہ عنہما سے روایت ہے کہ سیدنا علی رضی اللہ عنہ رسول اللہ ﷺ کی زندگی میں ہی فرمایا کرتے تھے: ”بے شک اللہ تعالیٰ کا فرمان ہے: ﴿أَفَإِنْ مَاتَ أو قُتِلَ انْقَلَبْتُمْ عَلَى أَعْقَابِكُمْ﴾ ”بھلا اگر وہ وفات پا جائیں یا شہید کر دیے جائیں تو کیا تم الٹے پاؤں پھر جاؤ گے؟“ [سورة آل عمران: 144] اللہ کی قسم! اللہ کی طرف سے ہدایت ملنے کے بعد ہم ہرگز الٹے پاؤں نہیں پھریں گے، بخدا اگر آپ ﷺ وفات پا گئے یا شہید کر دیے گئے تو میں اسی مشن پر قتال کروں گا جس پر آپ ﷺ نے قتال کیا یہاں تک کہ میں مر جاؤں، اللہ کی قسم! میں ان کا بھائی، ان کا ولی، ان کا چچا زاد اور ان کے علم کا وارث ہوں، تو مجھ سے زیادہ ان کا حقدار کون ہو سکتا ہے؟“

سیدنا عبداللہ بن عباس رضی اللہ عنہما سے روایت ہے کہ نبی کریم ﷺ نے حجۃ الوداع کے موقع پر خطبہ دیتے ہوئے فرمایا: ”میں ایک لشکر کے ساتھ عمالقہ سے ضرور قتال کروں گا،“ تو جبریل علیہ السلام نے عرض کیا: (یا) علی (یعنی علی قتال کریں گے)؟ آپ ﷺ نے فرمایا: ”یا علی بن ابی طالب (قتال کریں گے)۔“