المستدرك على الصحيحين

سیدنا ابن عمر رضی اللہ عنہما بیان کرتے ہیں کہ رسول اللہ ﷺ حجرِ اسود کے سامنے تشریف لائے، اس کا استلام کیا (اسے چھوا)، پھر اس پر اپنے لب مبارک رکھ کر دیر تک روتے رہے، پھر مڑ کر دیکھا تو سیدنا عمر رضی اللہ عنہ بھی رو رہے تھے، آپ ﷺ نے فرمایا: ”اے عمر! یہی وہ جگہ ہے جہاں آنسو بہائے جاتے ہیں۔“
اس حدیث کی اسناد صحیح ہیں لیکن شیخین نے اسے روایت نہیں کیا۔

سیدنا جابر بن عبداللہ رضی اللہ عنہ بیان کرتے ہیں کہ ہم چاشت کے وقت مکہ میں داخل ہوئے، نبی کریم ﷺ مسجد کے دروازے پر تشریف لائے، اپنی اونٹنی بٹھائی اور مسجد میں داخل ہوئے، آپ ﷺ نے حجرِ اسود سے آغاز فرمایا، اس کا استلام کیا اور آپ کی آنکھیں اشکبار ہو گئیں، پھر تین چکر رمل کیا اور چار چکر عام چال چلے یہاں تک کہ طواف مکمل کر لیا، پھر حجرِ اسود کو بوسہ دیا، اس پر اپنے دونوں ہاتھ رکھے اور انہیں اپنے چہرہ مبارک پر پھیرا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

جعفر بن عبداللہ بن حکم بیان کرتے ہیں کہ میں نے محمد بن عباد بن جعفر کو دیکھا کہ انہوں نے حجرِ اسود کو بوسہ دیا اور اس پر سجدہ کیا، پھر فرمایا: میں نے تمہارے ماموں ابن عباس کو دیکھا کہ وہ اسے بوسہ دیتے اور اس پر سجدہ کرتے تھے، اور ابن عباس رضی اللہ عنہما نے فرمایا کہ میں نے عمر بن خطاب رضی اللہ عنہ کو دیکھا کہ انہوں نے اسے بوسہ دیا اور اس پر سجدہ کیا، پھر عمر رضی اللہ عنہ نے فرمایا: میں نے رسول اللہ ﷺ کو ایسا کرتے دیکھا تھا اس لیے میں نے بھی ایسا ہی کیا۔
اس حدیث کی اسناد صحیح ہیں لیکن شیخین نے اسے روایت نہیں کیا۔

سیدنا عبداللہ بن سائب رضی اللہ عنہ سے روایت ہے کہ انہوں نے نبی کریم ﷺ کو رکنِ بنی جمح (رکنِ یمانی) اور حجرِ اسود کے درمیان یہ فرماتے ہوئے سنا: «رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ» ”اے ہمارے رب! ہمیں دنیا میں بھی بھلائی عطا فرما اور آخرت میں بھی بھلائی عطا فرما اور ہمیں آگ کے عذاب سے بچا۔“ [سورة البقرة: 201]
یہ حدیث امام مسلم کی شرط پر صحیح ہے، لیکن شیخین نے اسے روایت نہیں کیا۔