المستدرك على الصحيحين

سیدنا ابوسعید خدری رضی اللہ عنہ سے روایت ہے کہ جب ان کی وفات کا وقت قریب آیا تو انہوں نے نئے کپڑے منگوائے اور انہیں زیبِ تن کیا، پھر فرمایا: میں نے رسول اللہ ﷺ کو یہ فرماتے ہوئے سنا ہے: ”بے شک میت کو انہی کپڑوں میں اٹھایا جائے گا جن میں وہ فوت ہوا ہو گا۔“
یہ حدیث شیخین (امام بخاری و امام مسلم) کی شرط پر صحیح ہے لیکن ان دونوں نے اسے اپنی کتب میں روایت نہیں کیا۔

سیدنا فضالہ بن عبید رضی اللہ عنہ رسول اللہ ﷺ سے روایت کرتے ہیں کہ آپ ﷺ نے فرمایا: ”جو شخص (دین کے) ان درجات یا مقامات میں سے جس کسی درجے پر فوت ہوا، اسے قیامت کے دن اسی حالت پر اٹھایا جائے گا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا ابو موسیٰ اشعری رضی اللہ عنہ بیان کرتے ہیں کہ میں نے نبی کریم ﷺ سے ایک یا دو بار نہیں بلکہ کئی مرتبہ یہ ارشاد سنا ہے: ”جب کوئی بندہ (باقاعدگی سے) کوئی نیک عمل کرتا ہو، پھر اسے بیماری یا سفر اس عمل سے روک دے، تو اس کے حق میں ویسا ہی اجر لکھا جاتا ہے جیسا کہ وہ تندرستی اور قیام کی حالت میں عمل کرنے کی صورت میں لکھا جاتا تھا۔“
یہ حدیث امام بخاری کی شرط پر صحیح ہے لیکن شیخین نے اسے اس طرح روایت نہیں کیا!