المستدرك على الصحيحين

سیدنا اسامہ بن زید رضی اللہ عنہما سے روایت ہے کہ رسول اللہ ﷺ عبداللہ بن ابی (منافق) کی عیادت کے لیے اس کی اس علالت میں تشریف لے گئے جس میں اس کا انتقال ہوا، پس جب آپ ﷺ اس کے پاس داخل ہوئے تو آپ ﷺ نے اس کے چہرے پر موت کے آثار پہچان لیے اور فرمایا: ”میں تمہیں یہودیوں کی محبت سے منع کیا کرتا تھا، اس نے جواباً کہا: اسعد بن زرارہ نے ان سے بغض رکھا تھا تو اس کا اسے کیا فائدہ ہوا؟! پھر جب وہ مر گیا تو اس کا بیٹا آپ ﷺ کی خدمت میں حاضر ہوا اور عرض کیا: اے اللہ کے رسول! عبداللہ بن ابی فوت ہو گیا ہے، آپ مجھے اپنی قمیص مبارک عطا فرما دیں تاکہ میں اسے اس میں کفن دے سکوں، چنانچہ رسول اللہ ﷺ نے اپنی قمیص مبارک اتاری اور اسے عطا فرما دی۔“
یہ حدیث امام مسلم کی شرط پر صحیح ہے لیکن شیخین نے اسے اس طرح روایت نہیں کیا۔

سیدنا جابر رضی اللہ عنہ بیان کرتے ہیں کہ نبی کریم ﷺ (پیدل چل کر) میری عیادت کے لیے تشریف لایا کرتے تھے، آپ ﷺ اس وقت نہ کسی خچر پر سوار ہوتے تھے اور نہ ہی کسی ترکی گھوڑے «بِرْذَونٍ» پر۔
یہ حدیث شیخین کی شرط پر صحیح ہے لیکن انہوں نے اسے اپنی صحیح میں جگہ نہیں دی۔