المستدرك على الصحيحين

محمد بن منکدر کہتے ہیں: میں نے سیدنا جابر بن عبداللہ رضی اللہ عنہما کو فرماتے ہوئے سنا: رسول اللہ ﷺ نے فرمایا: ”کیا میں تمہیں تمہارے برے لوگوں میں سے تمہارے بہترین لوگوں کے بارے میں نہ بتاؤں؟“ صحابہ نے عرض کیا: کیوں نہیں! آپ ﷺ نے فرمایا: ”تم میں سے بہترین وہ ہیں جن کی عمریں سب سے لمبی اور اعمال سب سے اچھے ہوں۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ اور اس کے لیے امام مسلم کی شرط پر ایک صحیح شاہد موجود ہے:

سیدنا ابوبکرہ رضی اللہ عنہ سے روایت ہے کہ ایک شخص نے عرض کیا: ”اے اللہ کے رسول! لوگوں میں سب سے بہتر کون ہے؟“ آپ ﷺ نے فرمایا: ”وہ شخص جس کی عمر طویل ہو اور اس کے اعمال اچھے ہوں۔“ اس شخص نے پھر دریافت کیا: ”تو لوگوں میں سب سے برا کون ہے؟“ آپ ﷺ نے فرمایا: ”وہ جس کی عمر تو لمبی ہو مگر اس کے اعمال برے ہوں۔“

سیدنا انس رضی اللہ عنہ سے روایت ہے کہ نبی کریم ﷺ نے فرمایا: ”جب اللہ تعالیٰ کسی بندے کے ساتھ بھلائی کا ارادہ فرماتا ہے تو اسے (اپنے دین کے لیے) استعمال کر لیتا ہے۔“ عرض کیا گیا: ”اللہ اسے کیسے استعمال فرماتا ہے؟“ آپ ﷺ نے فرمایا: ”وہ اسے موت سے پہلے عملِ صالح کی توفیق عطا فرما دیتا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، جبکہ اس کی ایک شاہد حدیث درج ذیل صحیح سند کے ساتھ موجود ہے:

سیدنا عمرو بن حمق رضی اللہ عنہ بیان کرتے ہیں کہ رسول اللہ ﷺ نے فرمایا: ”جب اللہ عزوجل کسی بندے سے محبت فرماتا ہے تو اسے «عَسَلَه» ”شہد جیسا میٹھا“ بنا دیتا ہے۔“ عرض کیا گیا: ”اے اللہ کے رسول! اسے شہد جیسا میٹھا بنانے سے کیا مراد ہے؟“ آپ ﷺ نے فرمایا: ”وہ اس کی موت سے ذرا پہلے اسے کسی عملِ صالح کی توفیق بخشتا ہے یہاں تک کہ اس کے پڑوسی“ یا آپ ﷺ نے فرمایا ”اس کے ارد گرد رہنے والے اس سے راضی و خوش ہو جاتے ہیں۔“