مصنف ابن ابي شيبه

حضرت مجاہد فرماتے ہیں کہ حضرت عبداللہ بن مسعود فرمایا کرتے تھے اہل کتاب کی دیت مسلمان کی دیت جیسی ہے۔

حضرت قاسم بن عبدالرحمن فرماتے ہیں کہ حضرت عبداللہ بن مسعود نے ارشاد فرمایا جس کا معاہدہ ہو یا ذمی ہو تو اس کی دیت آزاد مسلمان کی دیت کے برابر ہے حضرت سفیان فرماتے ہیں : پھر اس کے بعد حضرت علی رضی اللہ عنہ نے ارشاد فرمایا : میں بھی یہی بات جانتا ہوں۔

حضرت قاسم بن عبدالرحمن فرماتے ہیں کہ حضرت عبداللہ بن مسعود نے ارشاد فرمایا : حلیف یا ذمی کی دیت آزاد مسلمان کی دیت کے برابر ہے۔

ابراہیم فرماتے ہیں کہ حضرت علقمہ نے ارشادفرمایا : حلیف کی دیت مسلمان کی دیت کی مانند ہے۔

حضرت ابن ابی نجیح فرماتے ہیں کہ حضرت مجاہد اور حضرت عطاء ان دونوں حضرات نے ارشاد فرمایا : حلیف کی دیت مسلمان کی دیت کی مانند ہے۔

حضرت حکم اور حضرت حماد دونوں حضرات فرماتے ہیں کہ ابراہیم نے ارشاد فرمایا : یہودی، عیسائی، مجوسی اور حلیف جس سے معاہدہ کیا گیا ہو اس کی دیت مسلمان کی دیت کی مانند ہے، اور ان کی عورتوں کی دیت آدمیوں کی دیت سے آدھی ہے اور حضرت عامر شعبی یہ آیت تلاوت کرتے تھے ترجمہ :۔ اور اگر مقتول ایسی قوم میں سے ہو کہ تمہارے اور ان کے درمیان معاہدہ ہو توخون بہا ادا کیا جائے اس کے وارثوں کو۔

ایوب فرماتے ہیں کہ میں نے امام زہری کو یوں فرماتے ہوئے سنا : حلیف کی دیت مسلمان کی دیت کی طرح ہے اور اگر مقتول ہو اسی قوم میں سے کہ تمہارے اور ان کے درمیان معاہدہ ہو ۔ الیٰ آ خر الایۃ۔

حضرت منصور فرماتے ہیں کہ ابراہیم نے ارشاد فرمایا : مشرکین میں سے معاہدہ والے لوگوں کی دیت مسلمانوں کی دیت کے مثل ہے۔