مصنف ابن ابي شيبه

حضرت ابن عباس رضی اللہ عنہما فرماتے ہیں کہ پھلوں کی بیع سے منع کیا گیا ہے یہاں تک کہ وہ پک کر کھانے کے قابل ہوجائیں، اور حضرت ابن عمر رضی اللہ عنہما فرماتے ہیں کہ جب پک کر ظاہر ہوجائیں تو بیع جائز ہے۔

حضرت عمر رضی اللہ عنہارشاد فرماتے ہیں کہ پکنے سے قبل پھلوں کی بیع کرنا سود ہے۔

حضرت الاسود رحمہ اللہ فرماتے ہیں کہ کھجور میں بیع سلم مت کر یہاں تک کہ وہ زرد یا سرخ نہ ہوجائے ، اور اسی طرح چھوٹی کھیتی میں ، اس حال میں کہ وہ سرسبز ہو، یہاں تک کہ اس کا پھول آجائے۔

حضرت سالم رحمہ اللہ اپنے والد سے روایت کرتے ہیں کہ آنحضرت صلی اللہ علیہ وسلم نے پھلوں کو پکنے سے قبل بیع کرنے سے منع فرمایا ہے۔

ابراہیم رحمہ اللہ فرماتے ہیں کہ جب تک کھجور کی گٹھلی سخت نہ ہوجائے اور وہ آفت سے محفوظ نہ ہوجائے اس کی بیع نہیں کریں گے۔

حضرت خارجہ بن زید بن ثابت رضی اللہ عنہ پھلوں کے درخت کی بیع فرما دیتے تھے جب ثریا ستارہ طلوع ہوتا تھا۔ ( یہ اس کے پکنے کی علامت ہوتی)

حضرت جابر رضی اللہ عنہ سے مروی ہے کہ حضرت سالم رحمہ اللہ اپنے والد سے روایت کرتے ہیں کہ آنحضرت صلی اللہ علیہ وسلم نے پھلوں کو پکنے سے قبل بیع کرنے سے منع فرمایا ہے۔

حضرت سعید بن المسیب رحمہ اللہ فرماتے ہیں کہ پھلوں کی بیع مت کرو یہاں تک کہ وہ نشو و نما پالیں اور آفت سے محفوظ ہوجائیں۔

حضرت انس رضی اللہ عنہ سے مروی ہے کہ آنحضرت صلی اللہ علیہ وسلم نے بُدُوّ صلاح سے قبل پھلوں کی بیع سے منع فرمایا ہے ۔ حضرت انس رضی اللہ عنہ سے عرض کیا گیا بُدُوّ صلاح سے کیا مرد ہے ؟ آپ رضی اللہ عنہ نے فرمایا پھل سرخ یا زرد ہوجائے۔

حضرت عامر رحمہ اللہ فرماتے ہیں کہ کھجور جب تک سرخ یا زرد نہ ہوجائے اس کی بیع نہیں کی جائے گی۔

حضرت عطاء فرماتے ہیں کہ اگر کھجور کا بعض حصہ پک کر سرخ ہوجائے تو پھر اس کی بیع میں کوئی حرج نہیں ۔

حضرت ابن عباس رضی اللہ عنہما سے دریافت کیا گیا کہ کھجور کی بیع کب کی جائے گی ؟ آپ رضی اللہ عنہ نے فرمایا جب وہ پک کر سرخ یا زرد ہوجائے۔

حضرت زید بن ثابت رضی اللہ عنہ فرماتے ہیں کہ جب تک ثریا ستارہ طلوع نہ ہوجائے پھلوں کو مت خریدو۔ حضرت زہری رحمہ اللہ فرماتے ہیں کہ میں نے حضرت سالم بن عبد اللہ رحمہ اللہ سے اس کا ذکر فرمایا، آپ رحمہ اللہ نے فرمایا : بیشک آفت بھی ثریا کے طلوع ہونے کے بعد آتی ہے۔

ایک شخص نے حضرت ابن عمر رضی اللہ عنہما سے پھلوں کی بیع کے متعلق دریافت کیا ؟ آپ رضی اللہ عنہ نے فرمایا : آنحضرت صلی اللہ علیہ وسلم نے بُدُوِّ صلاح سے قبل پھلوں کی بیع سے منع فرمایا ہے۔

حضرت عمر رضی اللہ عنہ اور حضرت عبد اللہ رضی اللہ عنہ فرماتے ہیں کہ جب تک کھجور سرخ یا زرد نہ ہوجائے اس کی بیع نہیں کی جائے گی۔

حضرت عمر بن عبد العزیز رحمہ اللہ نے عمّال کو تحریر فرمایا کہ بُدُوِّ صلاح سے قبل پھلوں کی بیع نہ کی جائے۔

حضرت ابوہریرہ رضی اللہ عنہ حضرت معاویہ رضی اللہ عنہ سے روایت کرتے ہیں کہ آپ رضی اللہ عنہ نے پھلوں کی بیع سے منع فرمایا ہے یہاں تک کہ وہ ہر عارض (آفت سے ) محفوظ ہوجائیں۔

حضرت ابو امامہ رضی اللہ عنہ سے مروی ہے کہ آنحضرت صلی اللہ علیہ وسلم نے بُدُوِّ صلاح سے پہلے (پکنے سے قبل) پھلوں کی بیع سے منع فرمایا ہے۔

حضرت ابو سعید رضی اللہ عنہ سے مروی ہے کہ آنحضرت صلی اللہ علیہ وسلم نے ارشاد فرمایا : بُدُوِّ صلاح سے قبل پھلوں کی بیع مت کرو، صحابہ رضی اللہ عنہ م نے عرض کیا کہ بُدُوِّ صلاح سے کیا مراد ہے ؟ آپ صلی اللہ علیہ وسلم نے ارشاد فرمایا : یہاں تک کہ وہ آفت سے محفوظ ہوجائے اور اس کی خوشبو خالص اور کھری اور صاف ہوجائے۔

حضرت ابوہریرہ رضی اللہ عنہ سے مروی ہے کہ آنحضرت صلی اللہ علیہ وسلم نے بُدُوِّ صلاح سے پہلے (پکنے سے قبل) پھلوں کی بیع سے منع فرمایا ہے۔