المعجم الكبير للطبراني

سیدہ ام سلمہ رضی اللہ عنہا سے روایت ہے کہ انہوں نے ایک ایسا ہار پہنا جس میں سونے کے چند دانے تھے، نبی کریم ﷺ نے اسے دیکھا تو ناپسند فرمایا اور اس سے منہ پھیر لیا، تو انہوں نے وہ ہار اتار دیا، پھر آپ ﷺ نے فرمایا: ”تمہیں کیا معلوم کہ قیامت کے دن اس کی جگہ تمہیں آگ کے دانوں کا ہار نہ پہنایا جائے؟“

سیدہ ام سلمہ رضی اللہ عنہا سے روایت ہے، نبی کریم ﷺ نے فرمایا: ”جس نے عصر سے پہلے چار رکعتیں پڑھیں، اللہ تعالیٰ اس کے بدن کو آگ پر حرام کر دیتا ہے۔“ میں نے عرض کیا: یا رسول اللہ! میں نے آپ کو کبھی یہ نماز پڑھتے اور کبھی چھوڑتے دیکھا ہے۔ آپ ﷺ نے فرمایا: ”میں تم میں سے کسی ایک کی طرح نہیں ہوں۔“

سیدہ ام سلمہ رضی اللہ عنہا سے روایت ہے کہ سیدہ فاطمہ رضی اللہ عنہا اپنے کچھ کھانے کے ساتھ اپنے والد (ﷺ) کے پاس آئیں، آپ ﷺ اپنے بستر پر تھے، تو آپ ﷺ نے فرمایا: ”جاؤ اور میرے بیٹوں اور اپنے چچا زاد کو بلا لاؤ۔“ فرماتی ہیں: تو انہوں نے ان (سب) کو ایک چادر میں ڈھانپ لیا، یا کہا: میں نے ان پر چادر اوڑھا دی، پھر آپ ﷺ نے فرمایا: ”اے اللہ! یہ میرے اہلِ بیت اور میرے خاص لوگ ہیں، ان سے ناپاکی دور کر دے اور انہیں خوب پاک کر دے۔“ ام سلمہ رضی اللہ عنہا نے عرض کیا: یا رسول اللہ! کیا میں بھی ان کے ساتھ ہوں؟ آپ ﷺ نے فرمایا: ”تم نبی ﷺ کی زوجہ ہو، اور (یہ مقام) میری طرف ہے، بھلائی پر ہے۔“

سیدہ ام سلمہ رضی اللہ عنہا سے روایت ہے کہ وہ سونے کے کنگن پہنا کرتی تھیں، انہوں نے نبی کریم ﷺ سے پوچھا: کیا یہ خزانہ شمار ہوتا ہے؟ آپ ﷺ نے فرمایا: ”جب تم اس کی زکاۃ ادا کر دو تو یہ خزانہ نہیں رہتا۔“