المعجم الكبير للطبراني

سیدنا سلمان الخیر رضی اللہ عنہ سے روایت ہے کہ رسول اللہ ﷺ نے فرمایا: ”ایک دن اور ایک رات کا پہرہ دینا ایک مہینے کے روزے اور قیام سے افضل ہے، اور جو شخص اللہ کے راستے میں پہرہ دیتے ہوئے فوت ہو جائے، اسے ثواب میں یہی درجہ ملتا رہے گا، اور اس کا رزق جاری رہے گا، اور وہ فتنے سے محفوظ رہے گا۔“

سیدنا سلمان رضی اللہ عنہ بیان کرتے ہیں، میں نے رسول اللہ ﷺ کو یہ فرماتے سنا: ”اللہ کے راستے میں ایک دن اور ایک رات کا پہرہ دینا ایک مہینے کے روزے اور قیام سے بہتر ہے، اور جو شخص پہرہ دیتے ہوئے فوت ہو جائے، اس کا وہی عمل جاری رہتا ہے جو وہ کرتا تھا، اور وہ فتنے سے محفوظ رہتا ہے۔“

شرحبیل بن سِمط بیان کرتے ہیں کہ انہوں نے سیدنا سلمان فارسی رضی اللہ عنہ کو حمص کے ساحل پر پہرہ دیتے دیکھا تو پوچھا: آپ یہاں کس لیے ہیں؟ فرمایا: پہرہ دے رہا ہوں۔ سیدنا سلمان رضی اللہ عنہ نے فرمایا، میں نے رسول اللہ ﷺ کو یہ فرماتے سنا: ”اللہ کے راستے میں ایک دن کا پہرہ دینا ایک مہینے کے روزے اور قیام کی طرح ہے، اور جو شخص پہرہ دیتے ہوئے فوت ہو جائے، اس کا وہی عمل جاری رہتا ہے جو وہ کرتا تھا، اور وہ فتنے سے محفوظ رہتا ہے، اور قیامت کے دن اسے شہید کے طور پر اٹھایا جائے گا۔“

سیدنا سلمان فارسی رضی اللہ عنہ بیان کرتے ہیں: میں دین کی تلاش میں نکلا تو راہبوں میں اہلِ کتاب کے باقی ماندہ لوگوں سے ملا، اللہ عزوجل نے فرمایا ہے: {وہ اسے ایسے پہچانتے ہیں جیسے اپنے بیٹوں کو پہچانتے ہیں} [البقرة: 146]، وہ کہا کرتے تھے: یہ ایک نبی کا زمانہ ہے جو قریب آ چکا ہے، وہ عرب کی سرزمین سے ظاہر ہوگا، اس کی کچھ نشانیاں ہیں، ان میں سے ایک اس کے دونوں کندھوں کے درمیان گول تل ہے جو مہرِ نبوت ہے۔ چنانچہ میں عرب کی سرزمین میں جا پہنچا، اور نبی کریم ﷺ مبعوث ہو چکے تھے، تو میں نے وہ سب کچھ دیکھا جو انہوں نے بتایا تھا، اور میں نے مہرِ نبوت بھی دیکھ لی، تو میں نے گواہی دی کہ اللہ کے سوا کوئی سچا معبود نہیں اور محمد ﷺ اللہ کے رسول ہیں، اور میں نے آپ ﷺ کو یہ فرماتے سنا: ”ایک دن اور ایک رات کا پہرہ دینا ایک مہینے کے روزے اور قیام سے افضل ہے، (گویا وہ) ایسا قیام کرنے والا ہے جو سستی نہ کرے اور ایسا روزہ دار ہے جو افطار نہ کرے، اور اگر وہ پہرہ دیتے ہوئے فوت ہو جائے تو اس کے نیک عمل جیسا اجر اسے دوبارہ اٹھائے جانے تک ملتا رہتا ہے، اور وہ عذابِ قبر سے محفوظ رکھا جاتا ہے۔“

سیدنا سلمان الخیر رضی اللہ عنہ سے روایت ہے کہ نبی کریم ﷺ نے فرمایا: ”زندوں کے چار عمل ایسے ہیں جن کا اجر فوت شدگان کو ملتا رہتا ہے: ایک وہ شخص جو نیک اولاد چھوڑ جائے جو اس کے لیے دعا کرتی رہے، تو ان کی دعا اسے پہنچتی رہتی ہے، دوسرا وہ شخص جو اپنے بعد جاری رہنے والا صدقہ کر جائے، تو جب تک وہ جاری رہے اسے اس کا اجر ملتا رہتا ہے، تیسرا وہ شخص جو کوئی علم سکھائے پھر اس پر اس کے بعد عمل کیا جائے، تو اسے اس شخص جتنا ہی اجر ملتا ہے جو اس پر عمل کرتا ہے، بغیر اس کے کہ عمل کرنے والے کے اجر میں کوئی کمی ہو۔“