المعجم الكبير للطبراني

سیدنا طلحہ بن عبیداللہ رضی اللہ عنہ سے روایت ہے، فرماتے ہیں: رسول اللہ ﷺ نے فرمایا: ”جس نے مجھ پر جان بوجھ کر جھوٹ باندھا، وہ اپنا ٹھکانہ جہنم میں بنا لے۔“

سیدنا طلحہ رضی اللہ عنہ سے روایت ہے، فرماتے ہیں: میں نے رسول اللہ ﷺ کو فرماتے سنا: ”اللہ کے لیے تواضع میں سے یہ بھی ہے کہ مجلس میں بلند جگہ کی بجائے کم تر جگہ پر راضی ہو جانا۔“

سیدنا طلحہ رضی اللہ عنہ سے روایت ہے، فرماتے ہیں: میں نے رسول اللہ ﷺ کو فرماتے سنا: ”اپنی برادری میں نکاح کرنے والا ایسا ہے جیسے اپنے گھر میں گھاس اگانے والا۔“

سیدنا طلحہ رضی اللہ عنہ سے روایت ہے، فرماتے ہیں: میں نے رسول اللہ ﷺ کو فرماتے سنا: ”کبھی کوئی نبوت ایسی نہیں گزری جس کے بعد قتل اور سولی کا دور نہ آیا ہو۔“

سیدنا طلحہ رضی اللہ عنہ سے روایت ہے، فرماتے ہیں: میں نے رسول اللہ ﷺ کو فرماتے سنا: ”عمرو بن العاص قریش کے نیک لوگوں میں سے ہیں۔“

سیدنا طلحہ رضی اللہ عنہ سے روایت ہے، فرماتے ہیں: میں نے رسول اللہ ﷺ کو فرماتے سنا: ”اے عمرو! بےشک تم اسلام میں دانشمندانہ رائے رکھنے والے ہو۔“

…اور اس بات کو اے رسول اللہ ﷺ کے حواری! کون ناپسند کرے گا؟ طلحہ نے کہا: میں نے رسول اللہ ﷺ کو فرماتے سنا: ”جو شخص کسی قوم کی امامت کرے جبکہ وہ اسے ناپسند کرتے ہوں، تو اس کی نماز اس کے کانوں سے تجاوز نہیں کرتی۔“

سیدنا طلحہ رضی اللہ عنہ سے روایت ہے، فرماتے ہیں: رسول اللہ ﷺ نے فرمایا: ”جسے کوئی احسان کیا جائے وہ اسے یاد رکھے، جس نے اسے یاد رکھا اس نے شکر ادا کیا، اور جس نے اسے چھپایا اس نے ناشکری کی۔“

…میرے والد نے مجھ سے، انہوں نے میرے دادا سے، انہوں نے موسیٰ بن طلحہ سے، انہوں نے اپنے والد طلحہ سے روایت کی، وہ کہتے ہیں: رسول اللہ ﷺ کی سواری کا کجاوہ اور آپ ﷺ کی خوشبو کا سامان میرے پاس ہوتا تھا۔ ایک آدمی آیا اور آپ ﷺ سے ان دونوں میں سے ایک چیز مانگی، تو آپ ﷺ نے فرمایا: ”یہ تو طلحہ بن عبیداللہ کے پاس ہے۔“ وہ میرے پاس آیا اور مجھے بتایا، تو میں نے اسے دینے سے انکار کر دیا۔ وہ دوبارہ نبی کریم ﷺ کے پاس گیا اور آپ ﷺ سے سوال کیا، تو آپ ﷺ نے اسے پھر وہی جواب دیا، وہ میرے پاس آیا اور مجھے بتایا، تو میں نے پھر انکار کر دیا۔ وہ پھر نبی کریم ﷺ کے پاس واپس گیا اور اسی طرح کہا، تو وہ میرے پاس واپس آیا۔ میں نے اپنے دل میں کہا: آپ ﷺ نے اسے میرے پاس اس کے سوا کسی اور وجہ سے نہیں بھیجا کہ آپ چاہتے ہیں کہ اس کی حاجت پوری ہو جائے، اور رسول اللہ ﷺ سے شاید ہی کوئی چیز مانگی جاتی اور آپ اسے نہ کرتے۔ تو میں نے اپنے دل میں کہا: رسول اللہ ﷺ کے جسم کی خدمت کرنا مجھے ان کے کجاوے کی خدمت کرنے سے زیادہ محبوب ہے، چنانچہ میں نے وہ اسے دے دیا۔ پھر نبی کریم ﷺ نے سفر کا ارادہ کیا تو حکم دیا کہ آپ کے لیے کجاوہ کسا جائے۔ وہ خادم میرے پاس آیا اور پوچھا: رسول اللہ ﷺ کو دونوں کجاووں میں سے کون زیادہ پسند تھا؟ میں نے کہا: طائفی کجاوہ۔ تو اس نے وہ کسا اور آپ ﷺ کے قریب کیا، جب آپ ﷺ اس پر سوار ہونے لگے تو وہ الٹ گیا، تو آپ ﷺ نے پوچھا: ”اسے کس نے کسا تھا؟“ لوگوں نے کہا: فلاں شخص نے۔ آپ ﷺ نے فرمایا: ”اسے طلحہ کے حوالے کر دو۔“ چنانچہ وہ مجھے واپس مل گیا۔ طلحہ کہتے ہیں: اللہ کی قسم! میں نے اسلام میں اس کے سوا کسی کے ساتھ دھوکہ نہیں کیا، تاکہ رسول اللہ ﷺ کا کجاوہ مجھے واپس مل جائے۔

…موسیٰ بن طلحہ اپنے والد سے روایت کرتے ہیں، وہ کہتے ہیں: جب احد کا دن ہوا تو میں نے رسول اللہ ﷺ کو اپنی پیٹھ پر اٹھا لیا یہاں تک کہ آپ ﷺ چٹان پر چڑھ گئے اور مشرکین سے اوجھل ہو گئے، تو آپ ﷺ نے فرمایا: ”ایسے ہی“ اور اپنے ہاتھ سے میری پیٹھ کے پیچھے اشارہ کیا: ”یہ جبریل علیہ السلام ہیں، انہوں نے مجھے بتایا ہے کہ وہ قیامت کے دن جس ہولناکی میں بھی تمہیں دیکھیں گے تمہیں اس سے بچا لیں گے۔“

موسیٰ بن طلحہ اپنے والد سے روایت کرتے ہیں، وہ کہتے ہیں: جب احد کا دن ہوا تو مجھے تیر لگا، میں نے تکلیف سے ”ہائے“ کہا، تو نبی کریم ﷺ نے فرمایا: ”اگر تم ‘بسم اللہ’ کہتے تو فرشتے تمہیں اٹھا کر لوگوں کے دیکھتے دیکھتے اڑا لے جاتے۔“

موسیٰ بن طلحہ اپنے والد سے روایت کرتے ہیں، وہ کہتے ہیں: نبی کریم ﷺ جب مجھے دیکھتے تو فرماتے: ”جو کسی ایسے شہید کو دیکھنا چاہے جو زمین پر چل رہا ہو، وہ طلحہ بن عبیداللہ کو دیکھ لے۔“

موسیٰ بن طلحہ اپنے والد سے روایت کرتے ہیں، وہ کہتے ہیں: نبی کریم ﷺ جب مجھے دیکھتے تو فرماتے: ”تم دنیا میں بھی میرے پیش رو ہو اور آخرت میں بھی میرے پیش رو ہو۔“

…پھر آپ ﷺ نے یہ آیت پڑھی: ”ایسے مرد جنہوں نے اللہ سے کیے ہوئے عہد کو سچ کر دکھایا“ [الاحزاب: 23] پوری آیت پڑھی۔ تو ایک آدمی کھڑا ہوا اور عرض کیا: یا رسول اللہ! یہ کون لوگ ہیں؟ راوی (طلحہ) کہتے ہیں: تو میں اس حال میں آگے بڑھا کہ مجھ پر دو سبز کپڑے تھے، تو آپ ﷺ نے فرمایا: ”اے سوال کرنے والے! یہ انہی میں سے ہے۔“

موسیٰ بن طلحہ اپنے والد سے روایت کرتے ہیں، وہ کہتے ہیں: احد کے دن نبی کریم ﷺ نے مجھے ”طلحۃ الخیر“، غزوہ ذات العشیرہ کے دن ”طلحۃ الفیاض“، اور حنین کے دن ”طلحۃ الجود“ کا نام دیا۔

…طلحہ اپنے والد سے روایت کرتے ہیں، وہ کہتے ہیں: میں نبی کریم ﷺ کے پاس آیا جبکہ آپ ﷺ اپنے کچھ صحابہ کے ساتھ تھے، اور آپ ﷺ کے ہاتھ میں ایک بہی (پھل) تھا جسے آپ الٹ پلٹ رہے تھے۔ جب میں آپ ﷺ کے پاس بیٹھا تو آپ نے وہ میری طرف بڑھا دیا، پھر فرمایا: ”یہ لے لو، ابومحمد! یہ دل کو مضبوط کرتی ہے، طبیعت کو خوشگوار بناتی ہے، اور سینے کی گھٹن دور کرتی ہے۔“