مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے مجھ سے فرمایا : ” اے عائشہ ! اگر تم گناہ کا ارتکاب کر لیا ہو ، تو تم اللہ تعالیٰ سے مغفرت طلب کرو ، کیونکہ گناہ سے توبہ یہ ہے کہ ندامت کا شکار ہوا جائے اور مغفرت طلب کی جائے ۔ “
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ابتدائی حصہ مذکور ہے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ، صرف محمد بن یزید واسطی کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” گناہ کا کفارہ ندامت ہے “ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے اور اس کی سند میں ایک راوی یحیی بن عمرو بن مالک نکری ہے اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے یہ فرمان نقل کرتے ہیں : ” ندامت کا شکار شخص ، توبہ کا منتظر ہوتا ہے اور خود پسندی کا شکار شخص ، ناراضگی کا منتظر ہوتا ہے ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی مطرف بن مازن ہے اور وہ ضعیف ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ندامت ، توبہ ہے ۔ “
یہ روایت امام بزار نے اپنے استاد عمرو بن مالک رواسی سے نقل کی ہے ، جسے ایک سے زیادہ افراد نے ضعیف قرار دیا ہے ، جبکہ ابن حبان نے اسے ثقہ کہا: ہے ، وہ کہتے ہیں : یہ غریب روایات نقل کرتا ہے اور غلطی بھی کر جاتا ہے ، اس روایت کے بقیہ رجال ” صحیح “ کے رجال ہیں ۔

سیدنا وائل بن حجر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ندامت ، توبہ ہے ۔ “
یہ روایت امام طبرانی نے نقل کی ہے ، اس کی سند میں ایک راوی اسماعیل بن عمرو بجلی ہے ، جسے ابن حبان نے ثقہ قرار دیا ہے ، اور ایک سے زیادہ افراد نے اسے ضعیف کہا: ہے ، اس روایت کے بقیہ رجال کی توثیق کی گئی ہے ۔

سیدنا ابوسعید خدری رضی اللہ عنہ کے صاحبزادے اپنے والد کے حوالے سے یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ندامت توبہ ہے ، اور گناہ سے توبہ کرنے والا ، اس شخص کی مانند ہے ، جس کا گناہ نہ ہو ۔ “
یہ روایت امام طبرانی نے نقل کی ہے ، اس کی سند میں ایک ایسا راوی ہے جس سے میں واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ندامت ، توبہ ہے ۔ “
یہ روایت امام طبرانی نے معجم صغیر میں نقل کی ہے اور اس کے رجال کی توثیق کی گئی ہے ، اور ان کے بارے میں اختلاف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی بندہ کسی گناہ کا ارتکاب کرتا ہے ، پھر جب اسے اس کا خیال آتا ہے ، تو اپنا وہ عمل اسے غمگین کر دیتا ہے ، جب اللہ تعالیٰ اس کی طرف سے یہ بات دیکھتا ہے کہ وہ اپنے کئے ہوئے پر غمگین ہے ، تو اللہ تعالیٰ اس کی مغفرت کر دیتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی داؤد بن محبر ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص گناہ کا ارتکاب کرے اور پھر ندامت کا شکار ہو جائے ، اللہ تعالیٰ اس کے مغفرت طلب کرنے سے پہلے ، اس شخص کے اس گناہ کی مغفرت کر دیتا ہے ، اور جس شخص کو اللہ تعالیٰ کوئی نعمت عطا کرے اور وہ شخص یہ بات جانتا ہو ( یعنی اس بات پر ایمان رکھتا ہو ) کہ وہ نعمت اللہ تعالیٰ کی طرف سے ہے ، تو اللہ تعالیٰ اس شخص کے لئے اس نعمت کا شکر نوٹ کر لیتا ہے ، اس سے پہلے کہ اس شخص نے اس نعمت کے حوالے سے اللہ تعالیٰ کی حمد بیان کی ہو ، اور جس شخص کو اللہ تعالیٰ لباس پہننے کے لئے دے اور وہ شخص یہ بات جانتا ہو کہ یہ اللہ تعالیٰ ہی نے اسے پہننے کے لیے دیا ہے ، تو اس لباس کے اس کے گھٹنوں تک پہنچنے سے پہلے اس شخص کی مغفرت ہو جاتی ہے ۔ “
یہ روایت امام طبرانی نے معجم اوسط میں دو اسناد کے ساتھ نقل کی ہے ، ان دونوں میں سے ایک میں ایک راوی بزیع بن حسان ابوخلیل ہے اور دوسری میں ایک راوی سلیمان بن داؤد منقری ہے اور یہ دونوں ضعیف ہیں ۔