مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت کے آٹھ دروازے ہیں ، اُن میں سے سات دروازے بند ہیں ، اور ایک دروازہ توبہ کے لئے کھلا ہوا ہے اور یہ اس وقت تک کھلا رہے گا جب تک سورج اس طرف سے ( یعنی مغرب کی طرف سے ) طلوع نہیں ہو جاتا ۔ “
یہ روایت امام ابویعلیٰ اور امام طبرانی نے نقل کی ہے اور اس کی سند عمدہ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص سورج کے مغرب کی طرف سے طلوع ہونے سے پہلے توبہ کر لے گا ، اللہ تعالیٰ اس کی توبہ قبول کر لے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حسن بن ابوجعفر ہے اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : ” ابن آدم کے لئے توبہ کی گنجائش رہے گی ، جب تک تین میں سے کوئی ایک چیز سامنے نہیں آ جاتی ، سورج کا مغرب کی طرف سے طلوع ہونا ، دابۃ الارض کا نکلنا ، یاجوج ماجوج کا نکلنا ۔ “
یہ روایت امام طبرانی نے منقطع سند کے ساتھ نقل کی ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ بندے کی توبہ قبول کرتا رہتا ہے ( راوی کو شک ہے ، یا شاید یہ الفاظ ہیں : ) اللہ تعالیٰ بندے کی مغفرت کرتا رہتا ہے ، جب تک حجاب واقع نہیں ہو جاتا ، عرض کی گئی : حجاب واقع ہونے سے مراد کیا ہے ؟ آپ نے فرمایا : جان کا ایسی حالت میں نکلنا کہ وہ مشرک ہو ۔ “
یہ روایت امام أحمد اور امام بزار نے نقل کی ہے ، اس کی سند میں ایک راوی عبدالرحمن بن ثابت بن ثوبان ہے ، جسے ایک جماعت نے ثقہ قرار دیا ہے ، اور دوسرے لوگوں نے اسے ضعیف کہا: ہے ، اس روایت کے بقیہ رجال ” ثقہ “ ہیں ، امام بزار کی دو اسناد میں سے ، ایک میں ایک راوی ابراہیم بن ہانی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ مسلسل بندے کی توبہ قبول کرتا رہتا ہے ، جب تک بندے پر نزع کا عالم طاری نہیں ہوتا ۔ “
یہ روایت امام بزار نے نقل کی ہے ، اس کی سند میں ایک راوی یزید بن عبدالملک نوفلی ہے اور وہ متروک ہے ۔