مجمع الزوائد ومنبع الفوائد

زبیر بن بکار بیان کرتے ہیں : سیدنا عمر رضی اللہ عنہ کے ہاں سیدنا عبداللہ بن عمر رضی اللہ عنہما پیدا ہوئے اور ان کی سگی بہن سیدہ حفصہ بنت عمر رضی اللہ عنہما ہیں جو نبی اکرم صلی اللہ علیہ وسلم کی زوجہ محترمہ ہیں اور ایک بھائی عبدالرحمن اکبر ہیں ، ان سب کی والدہ کا نام زینب بنت مظعون بن حبیب بن وہب بن حذافہ بن جمح ہے ، یہ ہجرت کرنے والی خواتین میں سے ایک ہیں ۔ سیدہ حفصہ رضی اللہ عنہا نبی اکرم صلی اللہ علیہ وسلم سے پہلے سیدنا خنیس بن حذافہ سہمی رضی اللہ عنہ کے نکاح میں تھیں ، سیدہ حفصہ رضی اللہ عنہا کے والد ( سیدنا عمر رضی اللہ عنہ ) ان کے چچا سیدنا زید بن خطاب رضی اللہ عنہ ، ان کے ماموں سیدنا عثمان رضی اللہ عنہ ، سیدنا قدامہ رضی اللہ عنہ اور سیدنا عبداللہ رضی اللہ عنہ اور ان کے ماموں زاد بھائی سیدنا سائب بن عثمان رضی اللہ عنہ کو غزوہ بدر میں شرکت کا شرف حاصل ہے ۔
یہ روایت امام طبرانی نے نقل کی ہے ۔

سیدنا عبداللہ بن عمر رضی اللہ عنہما بیان کرتے ہیں : ایک مرتبہ سیدنا عمر رضی اللہ عنہ سیدہ حفصہ رضی اللہ عنہا کے ہاں آئے تو وہ رو رہی تھیں ، سیدنا عمر رضی اللہ عنہ نے دریافت کیا : تم کیوں روتی ہو ؟ شاید اللہ کے رسول نے نہیں طلاق دے دی ہے ، اللہ کے رسول نے پہلے بھی تمہیں طلاق دی تھی اور میری وجہ سے تم سے رجوع کر لیا تھا ، اللہ کی قسم ! اگر اب انہوں نے تمہیں طلاق دے دی تو میں تمہارے ساتھ کبھی کوئی بات نہیں کروں گا ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

سیدنا عقبہ بن عامر جہنی رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دے دی ، سیدنا عمر بن خطاب رضی اللہ عنہ کو اس بات کی اطلاع ملی تو انہوں نے اپنے سر میں مٹی ڈالی اور بولے : اے ابن خطاب اس کے بعد اللہ تعالیٰ کو تمہاری کیا پرواہ ہو گی ، تو سیدنا جبرائیل علیہ السلام نبی اکرم صلی اللہ علیہ وسلم پر نازل ہوئے اور بولے : اللہ تعالیٰ آپ کو یہ حکم دیتا ہے کہ آپ سیدہ حفصہ رضی اللہ عنہا سے رجوع کر لیں ، یہ سیدنا عمر رضی اللہ عنہ کے لئے رحمت کی وجہ سے ہے ۔
یہ روایت امام طبرانی نے نقل کی ہے اس کی سند میں ایک راوی عمرو بن صالح حضرمی ہے اور میں اس سے واقف نہیں ہوں اور اس کے رجال ثقہ ہیں ۔

سیدنا عمار بن یاسر رضی اللہ عنہ بیان کرتے ہیں : جب نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دے دی تو سیدنا جبرائیل علیہ السلام نبی اکرم صلی اللہ علیہ وسلم کے پاس آئے اور بولے : آپ سیدہ حفصہ رضی اللہ عنہا سے رجوع کر لیں کیونکہ وہ روزہ رکھنے والی نوافل پڑھنے والی خاتون ہیں اور وہ جنت میں آپ کی اہلیہ ہوں گی ۔
یہ روایت امام بزار اور امام طبرانی نے نقل کی ہے تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم نے یہ ارادہ کیا کہ آپ سیدہ حفصہ رضی اللہ عنہا کو طلاق دے دیں تو سیدنا جبرائیل علیہ السلام آپ کے پاس آئے اور بولے : آپ انہیں طلاق نہ دیں کیونکہ وہ نفلی روزے رکھنے والی نوافل پڑھنے والی خاتون ہیں اور وہ جنت میں آپ کی اہلیہ ہوں گی ۔ ان دونوں کی سند میں ایک راوی حسن بن ابوجعفر ہے اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دے دی ، لوگ اس حوالے سے پریشان ہو گئے ، سیدہ حفصہ رضی اللہ عنہا کے ماموں سیدنا عثمان بن مظعون رضی اللہ عنہ اور ان کے بھائی سیدنا قدامہ رضی اللہ عنہ سیدہ حفصہ رضی اللہ عنہا کے پاس آئے ، یہ حضرات ابھی سیدہ حفصہ رضی اللہ عنہا کے ہاں موجود تھے اور غمگین تھے اسی دوران نبی اکرم صلی اللہ علیہ وسلم سیدہ حفصہ رضی اللہ عنہا کے پاس تشریف لائے ، آپ صلی اللہ علیہ وسلم نے ارشاد فرمایا : ” اے حفصہ ! ابھی جبرائیل میرے پاس آئے تھے اور انہوں نے بتایا کہ اللہ تعالیٰ نے آپ کو سلام کہا: ہے اور آپ سے یہ فرمایا ہے کہ آپ حفصہ سے رجوع کر لیں کیونکہ وہ نفلی روزے رکھنے والی نوافل پڑھنے والی خاتون ہیں اور وہ جنت میں آپ کی اہلیہ ہوں گی ۔ “
یہ روایت امام طبرانی نے معجم اوسط میں نقل کی ہے اور اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا قیس بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ حفصہ رضی اللہ عنہا کو ایک طلاق دے دی ، سیدہ حفصہ رضی اللہ عنہا کے دو ماموں سیدنا عثمان رضی اللہ عنہ اور سیدنا قدامہ رضی اللہ عنہ ، جو دونوں مظعون کے صاحبزادے ہیں ، وہ سیدہ حفصہ رضی اللہ عنہا کے ہاں آئے تو سیدہ حفصہ رضی اللہ عنہا نے بتایا : اللہ کی قسم ! نبی اکرم صلی اللہ علیہ وسلم نے مجھے اکتاہٹ کی وجہ سے طلاق نہیں دی ہے ، پھر نبی اکرم صلی اللہ علیہ وسلم تشریف لائے ، آپ گھر میں داخل ہوئے تو سیدہ حفصہ رضی اللہ عنہا نے چادر اوڑھ لی ، نبی اکرم صلی اللہ علیہ وسلم نے فرمایا : ” جبرائیل میرے پاس آئے اور انہوں نے یہ کہا: کہ آپ حفصہ سے رجوع کر لیں کیونکہ وہ نوافل پڑھنے والی اور نفلی روزے رکھنے والی خاتون ہیں اور وہ جنت میں آپ کی اہلیہ ہوں گی ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

امام مالک بن انس بیان کرتے ہیں : سیدہ حفصہ رضی اللہ عنہا کا انتقال اس سال ہوا تھا جس سال افریقہ فتح ہوا تھا جب ان کا انتقال ہوا تھا اس وقت مروان مدینہ منورہ کا گورنر تھا ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔

یزید بن ابوحبیب بیان کرتے ہیں : سیدنا معاویہ بن حدیج رضی اللہ عنہ نے تین مرتبہ افریقہ کے لئے جنگ کی پہلی مرتبہ چونتیس ہجری میں اور دوسری مرتبہ چالیس ہجری میں اور تیسری مرتبہ پچاس ہجری میں ۔
یہ روایت امام طبرانی نے نقل کی ہے اور اس کی سند حسن ہے ۔