مجمع الزوائد ومنبع الفوائد

امام طبرانی بیان کرتے ہیں : سیدہ ام سلمہ رضی اللہ عنہا کا نام ہند بنت ابوامیہ حذیفہ بن مغیرہ بن عبدالله بن عمر بن مخزوم بن یقظہ بن مرہ بن کعب بن لؤی بن غالب ہے ۔ وہ کہتے ہیں : علی بن عبدالعزیز نے زبیر بن بکار کے حوالے سے ہمیں یہ نسب بیان کیا ہے وہ بیان کرتے ہیں : نبی اکرم صلی اللہ علیہ وسلم سے پہلے سیدہ ام سلمہ رضی اللہ عنہا سیدنا ابوسلمہ عبداللہ بن عبدالاسد رضی اللہ عنہ کی اہلیہ تھیں ، سیدہ ام سلمہ رضی اللہ عنہا نے ان کے بچوں سیدنا سلمہ رضی اللہ عنہ سیدنا عمر رضی اللہ عنہ اور سیدنا زینب رضی اللہ عنہا کو جنم دیا تھا پھر ان صاحب کا انتقال ہو گیا تو ان کے بعد نبی اکرم صلی اللہ علیہ وسلم نے سیدہ ام سلمہ رضی اللہ عنہا کے ساتھ شادی کر لی ۔

سیدہ ام سلمہ رضی اللہ عنہا نبی اکرم صلی اللہ علیہ وسلم کے بارے میں یہ بات نقل کرتی ہیں : نبی اکرم صلی اللہ علیہ وسلم ان کے ہاں تشریف لائے ، آپ نے اپنی چادر موڑ کر دروازے کی چوکھٹ پر رکھی اور اس کے ساتھ ٹیک لگا لی اور فرمایا : ام سلمہ ! کیا تمہیں اس میں دلچسپی ہے ، انہوں نے عرض کی : میں ایک ایسی خاتون ہوں جس کے مزاج میں تیزی ہے ، مجھے اندیشہ ہے کہ شاید میں اللہ کے رسول کے سامنے کوئی ایسی حرکت کر دوں گی جو انہیں ناگوار گزرے گی ، تو نبی اکرم صلی اللہ علیہ وسلم واپس چلے گئے ، پھر آپ تشریف لائے ، آپ نے فرمایا : اے اُم سلمہ ! کیا تمہیں اس بات میں دلچسپی ہے ( کہ تم میرے ساتھ شادی کر لو ) اگر تم مہر میں اضافہ چاہو تو ہم مزید دے دیں گے ، سیدہ ام سلمہ رضی اللہ عنہا نے اپنی بات دہرا دی ، سیدہ ام عبد رضی اللہ عنہا نے کہا: اے ام سلمہ ! کیا تم جانتی ہو قریش کی خواتین کیا بات چیت کر رہی ہیں وہ یہ کہہ رہی ہیں کہ سیدہ ام سلمہ رضی اللہ عنہا نے نبی اکرم صلی اللہ علیہ وسلم کے پیغام کو اس لئے قبول نہیں کیا کیونکہ وہ قریش کے کسی نوجوان سے شادی کرنا چاہتی ہیں جو زیادہ کمسن ہو اور جس کے پاس زیادہ مال ہو ۔ راوی کہتے ہیں پھر سیدہ ام سلمہ رضی اللہ عنہا نبی اکرم صلی اللہ علیہ وسلم کے پاس گئیں اور نبی اکرم صلی اللہ علیہ وسلم نے ان کے ساتھ شادی کر لی ۔
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے نبی اکرم صلی اللہ علیہ وسلم کے اہل بیت کے فضائل سے متعلق باب میں یہ بات گزر چکی ہے کہ نبی اکرم صلی اللہ علیہ وسلم نے ان سے فرمایا تھا : ” تم اس بھلائی پر ہو ۔ “

ہیثم بن عدی بیان کرتے ہیں : نبی اکرم صلی اللہ علیہ وسلم کی ازواج میں سب سے پہلے سیدہ زینب بنت جحش رضی اللہ عنہا کا انتقال ہوا تھا ، ان کا انتقال سیدنا عمر رضی اللہ عنہ کے عہد خلافت میں ہوا تھا اور تمام ازواج میں سب سے آخر میں سیدہ ام سلمہ رضی اللہ عنہا کا انتقال ہوا ، جن کا انتقال یزید بن معاویہ کے عہد حکومت میں باسٹھ ہجری میں ہوا ۔
یہ روایت امام طبرانی نے نقل کی ہے اور اس کے رجال ثقہ ہیں ۔