مجمع الزوائد ومنبع الفوائد

سیدنا ضرار بن ازور رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کو دودھ والی ایک اونٹنی تحفہ دی ، راوی کہتے ہیں : میں اس کا دودھ دوہنے لگا ، جب میں اسے مشقت کا شکار کرنے لگا ، تو نبی اکرم صلی اللہ علیہ وسلم نے فرمایا : ایسا نہ کرو ! دودھ کے داعی کو رہنے دو ۔
یہ روایت امام أحمد اور امام طبرانی نے نقل کی ہے ، وہ یہ کہتے ہیں : ” دودھ کے دواعی کو چھوڑ دو ، اور میرے لئے چھوڑ دو ۔ “
یہ روایت انہوں نے مختلف روایات کے ساتھ نقل کی ہے ، امام أحمد کے ایک سند کے رجال ثقہ ہیں ۔

سیدنا نقادہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : اے نقادہ ! میرے لئے ایسی اونٹنی تلاش کرو ، جو دودھ دینے والی ہو ، اور اس پر سواری بھی کی جا سکے اور اس کے ہاں بچہ نہ ہوا ہو ، راوی کہتے ہیں : میں آیا ، میں نے اسے جانوروں میں تلاش کیا ، تو مجھے ایسی کوئی اونٹنی نہیں ملی جو دودھ والی بھی ہو اور فرمانبردار بھی ہو ( یا جس پر سواری بھی کی جا سکے ) پھر مجھے اپنے چچا زاد کے اونٹوں میں ایسی اونٹنی مل گئی ، میں اُسے لے کر نبی اکرم صلی اللہ علیہ وسلم کے پاس آیا ، نبی اکرم صلی اللہ علیہ وسلم نے فرمایا : اے نقادہ ! تھن کے دواعی کو باقی رہنے دو ! ( راوی کو شک ہے شاید یہ الفاظ ہیں : ) دودھ کے دواعی کو باقی رہنے دو ۔ “
یہ روایت امام طبرانی نے نقل کی ہے ۔

ایک روایت میں یہ الفاظ ہیں : ” میرے چچا نے کچھ اونٹنیاں نبی اکرم صلی اللہ علیہ وسلم کی طرف بھیجیں ، نبی اکرم صلی اللہ علیہ وسلم نے مجھ سے فرمایا : تم ان کا دودھ دوہ لو ! میں نے ان کا دودھ دوہ لیا ، تو آپ صلی اللہ علیہ وسلم نے فرمایا : اسے نقادہ ! دودھ کے دواعی کو چھوڑ دینا ، راوی کہتے ہیں : تو میں نے اس کے تھن یوں چھوڑے کہ ان میں سے سارا ہی دودھ نکال نہیں لیا گیا تھا ۔ “ یہ تمام روایات امام طبرانی نے مجم کبیر اور معجم اوسط میں نقل کی ہے ، پہلی روایت کی سند میں ایک راوی اسحاق فروی ہے ، اور وہ متروک ہے ، دوسری کی سند میں ایک راوی یعقوب بن محمد زہری ہے ، اور وہ متروک ہے ، اور راویوں کی ایک جماعت ایسی ہے جو معروف نہیں ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک شخص کے پاس سے ہوا ، جو بکری کا دودھ دوہ رہا تھا ، تو آپ صلی اللہ علیہ وسلم نے فرمایا : ” اے فلاں جب تم دودھ دوہ رہے ہو ، تو اس کے بچے کے لئے باقی رہنے دینا ، کیونکہ یہ سب جانوروں میں سب سے زیادہ فرمانبردار ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، معجم کبیر کے رجال ” صحیح “ کے رجال ہیں ، صرف عبداللہ بن جبارہ کا معاملہ مختلف ہے اور وہ ثقہ ہے ۔

سیدنا سوادہ بن ربیع ہی نہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے آپ صلی اللہ علیہ وسلم سے مانگا ، تو آپ صلی اللہ علیہ وسلم نے مجھے اونٹنیاں دینے کا حکم دیا ، پھر آپ نے مجھ سے ارشاد فرمایا : ” جب تم اپنے گھر واپس جاؤ ، تو ان لوگوں کو یہ ہدایت کرنا کہ وہ ان کے کھانے پینے کا اچھی طرح خیال رکھیں ، اور انہیں یہ بھی کہنا کہ وہ اپنے ناخن تراش کے رکھیں ، وہ اُن ناخنوں کے ذریعے دودھ دوہتے ہوئے اپنے جانوروں کے تھنوں کو زخمی نہ کریں ۔ “
یہ روایت امام أحمد نے نقل کی ہے ، اور اس کی سند عمدہ ہے ۔

زبیر نامی راوی کہتے ہیں : میں نے سیدنا جابر رضی اللہ عنہ سے دریافت کیا : کیا آپ نے نبی اکرم صلی اللہ علیہ وسلم کو سوار ہونے کے عالم میں نماز پڑھتے ہوئے دیکھا ہے ؟ انہوں نے جواب دیا : جی ہاں ! راوی کہتے ہیں : ایک مرتبہ ایک شخص آپ کے پاس آیا ، اس نے ایک اونٹنی خریدی تھی ، اس کا مقصد یہ تھا کہ نبی اکرم صلی اللہ علیہ وسلم اس اونٹنی کے لئے دعا کر دیں ، اس نے نبی اکرم صلی اللہ علیہ وسلم کے ساتھ بات کی ، نبی اکرم صلی اللہ علیہ وسلم اس وقت نماز ادا کر رہے تھے ، نبی اکرم صلی اللہ علیہ وسلم خاموش رہے ، جب آپ نے سلام پھیر لیا ، تو آپ صلی اللہ علیہ وسلم نے اس کے لئے دعا کی ۔ ( علامہ ہیثمی فرماتے ہیں : ) میں یہ کہتا ہوں : یہ روایت صحیح میں مذکور ہے ، تاہم اس میں اونٹنی اور اس کے لئے دعا کرنے والا واقعہ نہیں ہے ۔
یہ روایت امام أحمد نے نقل کی ہے ، اور اس کی سند حسن ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم ظہر کی نماز ادا کرنے کے لیے تشریف لائے ، آپ نے ایک اونٹنی بندھی ہوئی پائی ، تو دریافت کیا : اس سواری کا مالک کہاں ہے ؟ کسی نے آپ کو جواب نہیں دیا ، نبی اکرم صلی اللہ علیہ وسلم مسجد کے اندر تشریف لے گئے آپ نے نماز ادا کی ، جب آپ نماز پڑھ کے فارغ ہو گئے تو آپ نے اس اونٹنی کو اسی طرح بندھا ہوا پایا ، آپ نے دریافت کیا : اس سواری کا مالک کہاں ہے ؟ تو اس شخص نے آپ کو جواب دیا ، اس شخص نے عرض کی : اے اللہ کے نبی ! میں ہوں ، تو نبی اکرم صلی اللہ علیہ وسلم نے فرمایا : کیا تم اس کے بارے میں اللہ تعالیٰ سے ڈرتے نہیں ہو ، یا تو تم اسے چارہ ڈالو ، یا اسے چھوڑ دو ، تاکہ یہ خود ہی کھا پی لے ۔ “
یہ روایت امام طبرانی نے نقل کی ہے اور اس کی سند عمدہ ہے ۔