مجمع الزوائد ومنبع الفوائد

سیدنا اشعث بن قیس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کا سب سے زیادہ شکر ادا کرنے والا شخص وہ ہے جو لوگوں کا سب سے زیادہ شکرگزار ہوتا ہو ۔ “

ایک روایت میں یہ الفاظ ہیں : ” اس شخص نے اللہ تعالیٰ کا شکر ادا نہیں کیا ، جو لوگوں کا شکرگزار نہ ہوا ۔ “ یہ تمام روایات امام أحمد اور امام طبرانی نے نقل کی ہیں ، امام أحمد کے رجال ثقہ ہیں ۔

سیدہ عائشہ صدیقہ رضی اللہ عنہ بیان کرتی ہیں : نبی اکرم صلی اللہ علیہ وسلم اکثر مجھ سے یہ دریافت کیا کرتے تھے : تمہارے آس پاس کے گھر والوں کا کیا حال ہے ؟ میں عرض کرتی تھی : یا رسول اللہ ! آپ آس پاس کے کون سے گھر مراد لے رہے ہیں ؟ کیونکہ ایسے گھر تو بہت سے ہیں ، نبی اکرم صلی اللہ علیہ وسلم نے فرمایا : شکرگزار ہونے کے حوالے سے ، میں نے عرض کی : جی ہاں ! میرے ماں باپ آپ پر قربان ہوں ، شاعر نے کہا: ہے : ” اپنے کمزور کو اس طرح بلند کرو کہ اس کی کمزوری کسی دن تمہارا نقصان نہ کرے ، اور عواقب اس تک یوں پہنچیں کہ وہ نمو پا چکے ہوں ، وہ تمہیں بدلہ دے گا یا تمہاری تعریف کرے گا ، اور تمہارے کسی کام پر جس نے تمہاری تعریف کر دی تو گویا اس نے تمہیں بدلہ دیدیا ، جب تم کسی معزز شخص سے تعلق قائم کرنے کا ارادہ کرتے ہو ، تو تم ایسے ردی سامان کو ضائع نہیں کرتے ، جس کی رسی کمزور دھاگوں والی ہو ۔ “ نبی اکرم صلی اللہ علیہ وسلم نے فرمایا : اے عائشہ ! قیامت کے دن جب اللہ تعالیٰ مخلوق کو زندہ کرے گا ، تو وہ اپنے ایک بندے سے دریافت کرے گا ، جس کے ساتھ اللہ کے بندوں میں سے کسی بندے نے کوئی بھلائی کی ہو گی ، کہ کیا تم اس کے شکرگزار ہوئے تھے ؟ تو وہ شخص جواب دے گا : اے میرے پروردگار ! میں یہ بات جانتا تھا کہ یہ بھلائی تیری طرف سے ہے ، تو میں نے اس کے حوالے سے تیرا شکر ادا کیا تھا ، اللہ تعالیٰ فرمائے گا : تم نے میرا شکر ادا نہیں کیا ، جبکہ تم اس شخص کے شکرگزار نہیں ہوئے ، جس کے ذریعے میں نے وہ بھلائی عطا کی تھی ۔
یہ روایت امام طبرانی نے معجم صغیر اور معجم اوسط میں اپنے استاد ذاکر بن شیبہ عسقلانی کے حوالے سے نقل کی ہے ، جسے ازدی نے ضعیف قرار دیا ہے ۔

ابوملیح نے سیدنا اسامہ رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” وہ شخص اللہ تعالیٰ کا شکر ادا نہیں کرتا ، جو لوگوں کا شکرگزار نہیں ہوتا ۔ “
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا اسامہ بن زید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کا سب سے زیادہ شکر وہ شخص ادا کرتا ہے ، جو لوگوں کا زیادہ شکرگزار ہو ۔ “

سیدنا جریر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص لوگوں کا شکرگزار نہ ہوا ، اُس نے اللہ تعالیٰ کا بھی شکر ادا نہیں کیا ۔ “
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص لوگوں کا شکرگزار نہ ہوا ، اُس نے اللہ تعالیٰ کا بھی شکر ادا نہیں کیا ۔ “
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص تمہارے ساتھ کوئی بھلائی کرے ، تو اس کو بدلہ دو ! اگر تم اس کو بدلہ دینے سے عاجز ہو ، تو اس کے لیے اتنی دعا کرو کہ وہ یہ جان جائے کہ تم نے شکریہ ادا کر دیا ہے ، کیونکہ اللہ تعالیٰ شکر کو قبول کرنے والا ہے ، اور وہ شکریہ ادا کرنے والوں کو پسند کرتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالوہاب بن ضحاک ہے ، اور وہ متروک ہے ، امام ابوداؤد اور امام نسائی رحمہ اللہ نے اس روایت کے یہ الفاظ نقل کیے ہیں : ” یہاں تک کہ تم یہ سمجھو کہ تم نے اُسے بدلہ دے دیا ہے “ یہ ان الفاظ کی جگہ ہیں : ” یہاں تک کہ وہ یہ جان لے کہ تم نے شکریہ ادا کر دیا ہے “ اور اس روایت میں اس کے بعد والے الفاظ نہیں ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جس شخص کے ساتھ کوئی بھلائی کی جائے ، اُسے اس کا بدلہ دینا چاہیے ، اور اگر وہ اس کی استطاعت نہ رکھتا ہو ، تو اس کا ذکر کرنا چاہیے ، کیونکہ جو شخص اس کا ذکر کر دے گا ، وہ اُس کا شکریہ ادا کر دے گا ، اور جو شخص کسی ایسی چیز کے حوالے سے خود کو سیر ظاہر کرے ، جو اسے نہ دی گئی ہو ، تو وہ جھوٹ کے دو کپڑے پہننے والے کی مانند ہے ۔ “
یہ روایت امام أحمد نے اور امام طبرانی نے معجم اوسط میں نقل کی ہے ، اس کی سند میں ایک راوی صالح بن ابواخضر ہے جس کے ضعیف ہونے کے باوجود اس کی توثیق کی گی ہے ، امام أحمد کے بقیہ رجال ثقہ ہیں ۔

سیدنا طلحہ بن عبیداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کے ساتھ کوئی بھلائی کی جائے ، اُسے اس کا ذکر کرنا چاہیے ، جو شخص اس کا ذکر کر دے گا ، وہ اس کا شکریہ ادا کر دے گا ، اور جو شخص اسے چھپائے گا ، وہ اُس کی ناشکری کرے گا ۔ “
یہ روایت امام طبرانی نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا حکم بن عمیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص تمہارے ساتھ کوئی بھلائی کرے ، تم لوگ اسے بدلہ دو ! اگر تم اس کی گنجائش نہیں پاتے ہو ، تو اس کے لئے دعا کر دو ۔ “
یہ روایت امام طبرانی نے نقل کی ہے ، اس کی سند میں ایک راوی یحیی بن یعلیٰ اسلمی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی شخص یہ کہہ دے : اللہ تعالیٰ تمہیں جزائے خیر عطا کرے ، تو اُس نے بھرپور تعریف کر دی ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا ابوامامہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم شدید گرمی کے دوران پیدل چلتے ہوئے جا رہے تھے ، اسی دوران آپ صلی اللہ علیہ وسلم کے جوتے کا تسمہ ٹوٹ گیا ، ایک شخص تسمہ لے کر آیا اور وہ تسمہ اس نے آپ کے جوتے میں لگا دیا ، تو نبی اکرم صلی اللہ علیہ وسلم نے ارشاد فرمایا : ” تم نے اللہ کے رسول کو جو چیز فراہم کی ہے ، اگر تمہیں ( اس کے اجر و ثواب کا ) پتہ چل جائے ، تو تم اُس کو کم شمار نہ کرو ، جو تم نے اللہ کے رسول کو فراہم کیا ہے ۔ “
یہ روایت امام أحمد اور امام طبرانی نے نقل کی ہے ، اس کی سند میں ایک راوی علی بن یزید الہانی ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : اگر فرعون مجھ سے یہ کہے : اللہ تعالیٰ آپ کو برکت نصیب کرے ، تو میں یہ کہوں گا : تمہیں بھی کرے ، اگرچہ فرعون مر چکا ہے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔