مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” سب سے زیادہ بہتر محفل وہ ہے جو زیادہ گنجائش والی ہو ۔ “
یہ روایت امام بزار اور امام طبرانی نے معجم اوسط میں نقل کی ہے ۔ اس کی سند میں ایک راوی مصعب بن ثابت ہے اور وہ ثقہ ہے ، جسے ابن حبان اور دیگر حضرات نے ثقہ قرار دیا ہے ۔ یحیی بن معین اور دیگر حضرات نے اسے ضعیف کہا: ہے ۔ اس روایت کے بقیہ رجال ثقہ ہیں ۔

مصعب بن شیبہ اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی شخص محفل کی آخری حد تک آئے اگر اس کے لئے گنجائش موجود ہو تو وہاں بیٹھ جائے ، اگر نہ ہو تو پھر وہ اس بات کا جائزہ لے کہ کون سی جگہ زیادہ گنجائش والی ہے ، جو وہ دیکھ رہا ہے ، تو وہ وہاں بیٹھ جائے ۔ “
یہ روایت امام طبرانی نے نقل کی ہے ، اور اس کی سند حسن ہے ۔

سیدنا طلحہ بن عبید رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تواضع میں یہ چیز بھی شامل ہے کہ محفل کے نمایاں حیثیت والے حصے کی بجائے کمتر حصے پر راضی ہو جایا جائے ۔ “
یہ روایت امام طبرانی نے نقل کی ہے ۔ اس کی سند میں ایک راوی ایوب بن سلیمان بن عبداللہ بن حدلم ہے اور میں اس سے واقف نہیں ہوں اور نہ اس کے باپ سے واقف ہوں ۔ اس روایت کے بقیہ رجال ثقہ ہیں ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بھی شخص لوگوں کے پاس آئے اور وہ لوگ اس کے لئے گنجائش پیدا کر دیں ، یہاں تک کہ وہ شخص راضی ہو جائے ، تو اللہ تعالیٰ کے ذمہ یہ بات لازم ہے کہ ان لوگوں سے راضی ہو جائے ۔ “
یہ روایت امام طبرانی نے نقل کی ہے ۔ اس کی سند میں ایک راوی سلیمان بن سلمہ خبائری ہے اور وہ متروک ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ان مذابح سے بچنے کی کوشش کرو ۔ راوی کہتے ہیں : اس سے مراد محاریب ہے ۔ ( علامہ ہیثمی فرماتے ہیں : ) میں یہ کہتا ہوں محاریب سے مراد محفل میں نمایاں حیثیت کی جگہ ( یعنی محفل میں صاحب صدر کی جگہ ہے ) ابن اثیر نے حرب کے مادہ میں اسی طرح اس کا ذکر کیا ہے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن مغرا ہے ، جسے ابن حبان اور دیگر حضرات نے ثقہ قرار دیا ہے ، اور ابن مدینی نے اسے اس روایت میں ضعیف قرار دیا ہے ، جو یہ اعمش سے نقل کرتا ہے ، اور
یہ روایت ان روایات میں سے ایک نہیں ہے ۔

سیدنا ابوامامہ بن ثعلبہ رضی اللہ عنہ بیان کرتے ہیں نبی اکرم صلی اللہ علیہ وسلم اکڑوں بیٹھنے کے طور پر تشریف فرما ہوتے تھے ۔ “
یہ روایت امام طبرانی نے نقل کی ہے ۔ اس کی سند میں ایک راوی محمد بن عمر واقدی ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں نبی اکرم صلی اللہ علیہ وسلم خانہ کعبہ کے پاس تشریف فرما تھے آپ نے اپنی دونوں ٹانگیں ملا کے انہیں کھڑا کیا ہوا تھا ، اور دونوں ہاتھوں کے ذریعے احتباء کیا ہوا تھا ۔
یہ روایت امام بزار نے نقل کی ہے ۔ اس کی سند میں ایک راوی مسلم بن کیسان ہے اور وہ اختلاط کا شکار ہونے کی وجہ سے متروک ہے ۔

سیدنا ابوسعید خدری رضی اللہ عنہ بیان کرتے ہیں : جب نبی اکرم صلی اللہ علیہ وسلم جب تشریف فرما ہوتے تھے ، تو آپ اپنے گھٹنے کھڑے کر لیتے تھے اور دونوں ہاتھوں کے ذریعے احتباء کر لیتے تھے ۔ ( علامہ ہیثمی فرماتے ہیں : ) میں یہ کہتا ہوں امام ابوداؤد نے صرف یہ حصہ نقل کیا ہے کہ آپ اپنے دونوں ہاتھوں کے ذریعے احتباء کر لیتے تھے ۔
یہ روایت امام بزار نے نقل کی ہے ۔ اس کی سند میں ایک راوی عبداللہ بن ابراہیم بن ابوعمرہ غفاری ہے ، اور وہ ضعیف ہے ۔