مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے نہیں معلوم کہ کیا حدود کفارہ بنتی ہیں یا نہیں بنتی ہیں “ ۔
یہ روایت امام بزار نے دو اسناد کے ساتھ نقل کی ہے ان دو میں سے ایک کے رجال صحیح کے رجال ہیں صرف حمد بن منصور رمادی معاملہ مختلف ہے اور وہ ثقہ ہے ۔

سیدنا خزیمہ بن ثابت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں ” جو بندہ کسی ایسی چیز کا ارتکاب کرے جسے اللہ تعالیٰ نے منع کیا ہو اور پھر اس پر حد جاری ہو جائے تو وہ حد اس سے اس گناہ کو ختم کر دیتی ہے “ ۔

ایک روایت میں یہ الفاظ ہیں ” جو شخص کسی گناہ کا ارتکاب کرے اور اس گناہ کی حد اس پر جاری ہو جائے تو وہ حد اس کا کفارہ بن جائے گا “ ۔
یہ روایت امام طبرانی نے نقل کی ہے امام أحمد نے اس کی مانند روایت نقل کی ہے اس کی سند میں ایک راوی ایسا ہے جس کا نام بیان نہیں کیا گیا ہے اور وہ ابن خزیمہ ہے اس روایت کے بقیہ رجال ثقہ ہیں ۔

انہوں نے اسے موقوف روایت کے طور پر بھی نقل کیا ہے ۔

سیدنا خزیمہ بن معمر انصاری رضی اللہ عنہ بیان کرتے ہیں نبی اکرم صلی اللہ علیہ وسلم کے زمانہ اقدس میں ایک عورت کو سنگسار کر دیا گیا لوگوں نے کہا: اس عورت کا عمل ضائع ہو گیا ہے نبی اکرم صلی اللہ علیہ وسلم کو جب اس بات کی اطلاع ملی تو آپ نے ارشاد فرمایا : ” یہ اس کے گناہوں کا کفارہ بن گیا ہے اور اس عورت کا حشر اس کے علاوہ ہو گا ( یعنی حشر کے دن اس کے ساتھ یہ گناہ نہیں ہو گا ) “ ۔
یہ روایت امام طبرانی نے نقل کی ہے اس کی سند میں ایک راوی یحییٰ بن عبدالحمید حمانی ہے اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جب بھی کسی بندے کو کسی گناہ پر سزا دے دی جائے تو اللہ تعالٰی اس چیز کو اس کے اس گناہ کے ارتکاب کا کفارہ بنا دیتا ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی یسین زیاد ہے اور وہ متروک ہے ۔

سیدنا ابوتمیمہ ہجیمی رضی اللہ عنہ بیان کرتے ہیں ایک مرتبہ میں مدینہ منورہ کے ایک باغ میں موجود تھا میں نے ایک عورت کو دیکھا میری تمام تر توجہ اس کی طرف مبذول ہو گئی یہاں تک کہ وہ میرے قریب آ گئی پھر میں پیچھے سے اسے دیکھتا رہا یہاں تک کہ میں دیوار کے قریب ہوا میں مڑا تو میرے چہرے پر دیوار لگ گئی اور اس سے میرا خون نکل آیا میں نبی اکرم صلی اللہ علیہ وسلم کی خدمت میں حاضر ہوا میں نے نبی اکرم صلی اللہ علیہ وسلم کو اس بارے میں بتایا تو نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ جب کسی بندے کے بارے میں بھلائی کا ارادہ کر لے تو اسے دنیا میں ہی اس کے گناہ کی سزا دے دیتا ہے اور ہمارا پروردگار اس سے زیادہ معزز ہے کہ وہ کسی گناہ کی دو مرتبہ سزا دے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی ہشام بن لاحق ہے امام أحمد نے اس کی حدیث کو ترک کر دیا تھا ابن حبان نے اسے ضعیف قرار دیا ہے امام ذہبی کہتے ہیں امام نسائی رحمہ اللہ نے اسے قومی کہا: ہے ۔ اس روایت کے مختلف طرق ہے جو مختلف مقامات پر موجود ہیں ۔