مجمع الزوائد ومنبع الفوائد

انصار سے تعلق رکھنے والے ایک صاحب نبی اکرم صلی اللہ علیہ وسلم کا یہ فرمان نقل کرتے ہیں : ” گھوڑے تین قسم کے ہوتے ہیں ایک گھوڑا وہ ہے جسے آدمی اللہ کی راہ میں باندھتا ہے ، تو اس کی قیمت اجر ہو گی اس پر سواری کرنا اجر ہو گا اسے عاریت کے طور پر دینا اجر ہو گا اس کا چارہ اجر ہو گا ایک وہ گھوڑا ہے جسے آدمی مقابلے کے لیے اور دوڑ کے لئے ( یعنی جوئے کے لئے رکھتا ہے ) اس کی قیمت بوجھ ( یعنی گناہ ) ہو گی اس پر سواری گناہ ہو گی اسے عاریت کے طور پر دینا گناہ ہو گا اس کا چارہ گناہ ہو گا ایک وہ گھوڑا ہے جسے آدمی ( ذاتی ) استعمال کے لئے رکھتا ہے ، تو وہ آدمی کو غربت سے بچا لیتا ہے اگر اللہ چاہے “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔ اس سے پہلے سیدنا خباب رضی اللہ عنہ کے حوالے سے منقول حدیث گزر چکی ہے جسے امام طبرانی نے نقل کیا ہے وہ اس سے پہلے گزر چکی ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گھوڑے تین قسم کے ہوتے ہیں : ایک گھوڑا رحمن کے لئے ہوتا ہے ایک گھوڑا انسان کے لئے ہوتا ہے اور ایک گھوڑا شیطان کے لئے ہوتا ہے ، تو جہاں تک رحمن والے گھوڑے کا تعلق ہے ، تو یہ وہ ہے جسے آدمی اللہ کی راہ میں باندھتا ہے اس کا چارہ اس کا پیشاب اور اس کی لید اس کے بعد جو اللہ کو منظور تھا وہ آپ نے ذکر کیں جہاں تک شیطان والے گھوڑے کا تعلق ہے ، تو یہ وہ ہے جس پر آدمی جوا کھیلتا ہے اور اسے گھڑ دوڑ میں لے جاتا ہے جہاں تک انسان سے متعلق گھوڑے کا تعلق ہے ، تو وہ یہ گھوڑا ہے جسے انسان باندھتا ہے اور وہ اس کی افزائش نسل چاہتا ہے ، تو یہ غربت سے بچاؤ کا ذریعہ ہے “ ۔
یہ روایت امام أحمد نے نقل کی ہے اور اس کے رجال ثقہ ہیں اگر قاسم بن حسان نے سیدنا عبداللہ بن مسعود رضی اللہ عنہ سے سماع کیا ہو ، تو پھر یہ حدیث ” صحیح “ ہے ۔

سیدہ اسماء بنت یزید رضی اللہ عنہما بیان کرتی ہیں : نبی اکرم صلی اللہ علیہ وسلم نے ارشاد فرمایا : ” گھوڑوں کی پیشانیوں میں قیامت کے دن تک کے لئے ہمیشہ کے لئے بھلائی رکھ دی گئی ہے ، جو شخص اسے اللہ کی راہ میں ( جہاد میں حصہ لینے کی ) تیاری کے لئے باندھتا ہے اور اللہ کی راہ میں ثواب کی امید رکھنے کے لئے اس پر خرچ کرتا ہے ، تو اس گھوڑے کا سیر ہونا ، سیراب ہونا ، پیاسا ہونا ، اس کی لید اور اس کا پیشاب ، قیامت کے دن اس شخص کے میزان میں کامیابی کا باعث ہو گا ، اور جو شخص ریاء کاری دکھاوے ، خوشی کے اظہار ، خوشحالی کے لئے اسے باندھتا ہے ، تو اس گھوڑے کا کھانا ، بھوکا ہونا ، اس کا سیراب ہونا ، اس کی لید اور اس کا پیشاب ، قیامت کے دن اس شخص کے میزان میں خسارے کا باعث ہو گا “ ۔
یہ روایت امام أحمد نے نقل کی ہے ۔ اس کی سند میں ایک راوی شہر ہے اور وہ ضعیف ہے ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” گھوڑوں کی پیشانیوں میں قیامت کے دن تک کے لئے بھلائی اور فضیلت ( یا نجابت ) باندھ دی گئی ہیں ، اور ان کے مالکان کی ان کے حوالے سے مدد کی جاتی ہے تم لوگ ان کی پیشانیوں پر ہاتھ پھیرو اور ان کے لئے برکت کی دعا کرو ، اور انہیں ہار پہناؤ لیکن انہیں تار نہ پہنانا “ ۔ علی نامی راوی نے یہ الفاظ نقل کیے ہیں : ” تم ان کے گلے میں بت نہ ڈالنا “ ۔
یہ روایت امام أحمد نے نقل کی ہے ۔ امام طبرانی نے معجم اوسط میں اختصار کے ساتھ نقل کی ہے ۔ امام أحمد کے رجال ثقہ ہیں ۔