مجمع الزوائد ومنبع الفوائد

سیدنا سوید بن ہبیرہ رضی اللہ عنہ نبی اکرم صلی اللہ علیہ وسلم کے حوالے سے نقل کرتے ہیں : ایک روایت میں یہ الفاظ ہیں : وہ کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آدمی کے مال میں سب سے بہتر چیز ، حکم ماننے والا گھوڑا اور پیوند کاری والا کھجور کا درخت ہے “ ۔
یہ روایت امام أحمد نے اور امام طبرانی نے نقل کی ہے ۔ امام أحمد کے رجال ثقہ ہیں ۔

سیدنا معقل بن یسار رضی اللہ عنہ بیان کرتے ہیں : کوئی بھی چیز نبی اکرم صلی اللہ علیہ وسلم کے نزدیک گھوڑوں سے زیادہ محبوب نہیں تھی پھر سیدنا معقل رضی اللہ عنہ نے فرمایا : اے اللہ ! معافی کا سوال ہے اونٹ اور خواتین بھی ( نبی اکرم صلی اللہ علیہ وسلم کو محبوب تھے ) ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے “ ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی عطیہ ہے اور وہ ضعیف ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابوذر ! میں جو تم سے کہنے لگا ہوں ، اس کو یاد رکھنا ، بکری کا بچہ ، جو کسی مسلمان فرد کے پاس آئے یہ اس کے لئے اُحد پہاڑ کے سونا ہو کے ملنے سے زیادہ بہتر ہے جسے وہ اپنے پیچھے چھوڑ جائے اے ابوذر ! میں جو تمہیں کہہ رہا ہوں اسے یاد رکھنا کثرت والے لوگ قیامت کے دن قلت والے ہوں گے البتہ اس شخص کا معاملہ مختلف ہے ، جو یہ کرے اور یہ کرے ( یعنی اللہ کی راہ میں خرچ کرے ) اے ابوذر میں جو تم سے کہہ رہا ہوں اسے یاد رکھنا گھوڑوں کی پیشانیوں میں قیامت کے دن تک کے لئے بھلائی رکھ دی گئی ہے ( راوی کو شک ہے شاید یہ الفاظ ہیں : ) بے شک گھوڑے کی پیشانی میں بھلائی ہے “ ۔
یہ روایت امام أحمد نے نقل کی ہے ۔ اس کی سند میں ایک راوی ابواسود غفاری ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن تک کے لئے گھوڑے کی پیشانی میں بھلائی باندھ دی گئی ہے اور گھوڑے پر خرچ کرنے والے کی مثال صدقہ کرنے کے لئے ہاتھ میں ( کوئی چیز رکھنے والے کی ) مانند ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ مذکور ہے : ” خرچ کا صدقہ “ ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بکریاں برکت ہوتی ہیں اونٹ اپنے مالکان کے لئے عزت کا باعث ہوتے ہیں اور گھوڑوں کی پیشانیوں میں قیامت کے دن تک کے لئے بھلائی ہے اور تمہارا غلام تمہارا بھائی ہے تم اس کے ساتھ اچھا سلوک کرو اگر تم اسے پاؤ کہ وہ کوئی کام نہیں کر پا رہا تو اس کی مدد کرو “ ۔
یہ روایت امام بزار نے نقل کی ہے ۔ اس کی سند میں ایک راوی حسن بن عمارہ ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں ان کے حوالے سے یہ روایت منقول ہے : ” گھوڑے کی پیشانی میں برکت ہے “ ۔
یہ روایت امام بزار نے نقل کی ہے ۔ اس کی سند میں ایک راوی عتاب بن حرب ہے اور وہ ضعیف ہے ۔

سیدنا سوادہ بن ربیع رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ نے مجھے اونٹ دینے کا حکم دیا پھر آپ نے ارشاد فرمایا : ” جب تم اپنے اہل خانہ کی طرف واپس جاؤ تو انہیں یہ کہنا کہ وہ اپنے ناخن تراشیں اور اپنے جانوروں کے تھنوں کو ( بڑے ناخنوں کے ذریعے ) زخمی نہ کریں “ ۔ نبی اکرم صلی اللہ علیہ وسلم نے یہ بھی ارشاد فرمایا : ” گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے “ ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا ابوکبشہ رضی اللہ عنہ جو نبی اکرم صلی اللہ علیہ وسلم کے صحابی ہیں وہ نبی اکرم صلی اللہ علیہ وسلم کا یہ فرمان نقل کرتے ہیں : ” گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے اور ان کے مالکان کی ان کے حوالے سے مدد کی جاتی ہے اور ان پر خرچ کرنے والے کی مثال صدقہ کرنے کے لئے اپنا ہاتھ بڑھانے والے کی مانند ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گھوڑوں کی پیشانیوں میں قیامت کے دن تک کے لئے بھلائی اور برکت باندھ دی گئی ہے اور ان کے مالکان کی ان کے حوالے سے مدد کی جاتی ہے تم انہیں ہار پہناؤ لیکن انہیں تار نہ پہنانا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے ۔ اس میں ضعف پایا جاتا ہے اس کی نقل کردہ حدیث حسن ہے ۔
یہ روایت امام أحمد نے اس سے زیادہ مکمل روایت کے طور پر نقل کی ہے اور اس کے رجال ثقہ ہیں وہ ایک باب کے بعد آگے آئے گی ۔

سیدنا عریب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گھوڑوں کی پیشانیوں میں قیامت کے دن تک کے لئے بھلائی اور برکت باندھ دی گئی ہے اور ان کے مالکان کی ان کے حوالے سے مدد کی جاتی ہے اور ان پر خرچ کرنے والے کی مثال صدقہ کرنے کے لئے ہاتھ بڑھانے والے کی مانند ہے ان کا پیشاب اور ان کی لید ان کے مالکان کے لئے قیامت کے دن اللہ تعالیٰ کی بارگاہ میں جنت کی مشک سے بنے ہوئے ہوں گے “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا نعمان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی ابوزیاد تیمی ہے ۔ امام ذہبی کہتے ہیں : یہ مجہول ہے ۔

حسن بن ابوالحسن کے حوالے سے یہ بات منقول ہے انہوں نے سیدنا ابن حنظلیہ رضی اللہ عنہ سے یہ کہا: آپ ہمیں کوئی ایسی حدیث بیان کیجئے جو آپ نے نبی اکرم صلی اللہ علیہ وسلم کی زبانی سنی ہو ، تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے اور ان کے مالکان کی ان کے حوالے سے مدد کی جاتی ہے ، جو شخص اللہ کی راہ میں گھوڑا باندھتا ہے ، تو اس پر خرچ کرنا اپنے ہاتھ کو صدقہ کرنے کے لئے بڑھانے والے کی مانند ہے جسے وہ بند نہیں کرتا “ ۔
یہ روایت امام طبرانی نے نقل کی ہے ۔

سیدنا سوادہ بن ربیع جرمی رضی اللہ عنہ بیان کرتے ہیں میں نبی اکرم صلی اللہ علیہ وسلم کی خدمت میں حاضر ہوا آپ نے مجھے اونٹ دینے کا حکم دیا اور پھر ارشاد فرمایا : تم پر گھوڑے رکھنا لازم ہے ، کیونکہ گھوڑوں کی پیشانیوں میں قیامت کے دن تک کے لئے بھلائی باندھ دی گئی ہے “ ۔
یہ روایت امام طبرانی نے سلیمان جرمی کے حوالے سے سیدنا سوادہ رضی اللہ عنہ سے نقل کی ہے سلیمان نامی راوی سے میں واقف نہیں ہوں اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم کا ایک گھوڑا تھا آپ نے وہ انصار سے تعلق رکھنے والے ایک فرد کو ہبہ کر دیا آپ اس کے ہنہنانے کی آواز سنا کرتے تھے ، پھر آپ نے اس ( آواز ) کو غیر موجود ، پایا تو نبی اکرم صلی اللہ علیہ وسلم نے اس شخص سے دریافت کیا : تمہارے گھوڑے کا کیا حال ہے ؟ اس نے عرض کی : یا رسول اللہ ! میں نے اسے خصی کر دیا ہے ، نبی اکرم صلی اللہ علیہ وسلم نے ارشاد فرمایا : گھوڑوں کی پیشانیوں میں قیامت کے دن تک کے لئے بھلائی اور غنیمت ہے ، ان کی پیشانیاں ان کی گرمائش کا ذریعہ ہیں ، اور ان کی دمیں ، اُن کا مکھیاں اُڑانے کا ذریعہ ہیں “ ۔
یہ روایت امام طبرانی نے نقل کی ہے ۔ اس کی سند میں ایک راوی راشد بن یحیی مرینی ہے جسے یحیی بن معین نے ضعیف قرار دیا ہے اور ابن حبان نے اسے ثقہ کہا: ہے وہ کہتے ہیں : یہ غلطی کر جاتا ہے اور ( دوسرے راویوں کے ) برخلاف نقل کرتا ہے ۔

سیدنا خباب بن ارت رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” گھوڑے تین قسم کے ہوتے ہیں ایک گھوڑا رحمان کے لئے ہوتا ہے ایک گھوڑا انسان کے لیے ہوتا ہے ۔ ایک گھوڑا شیطان کے لئے ہوتا ہے جہاں تک رحمان والے گھوڑے کا تعلق ہے ، تو یہ وہ ہے جسے اللہ کی راہ میں رکھا گیا ہو اور اس پر سوار ہو کر اللہ کے دشمنوں کے ساتھ جنگ کی جائے جہاں تک انسان والے گھوڑے کا تعلق ہے ، تو یہ وہ ہے ، جس کو سواری کے لئے استعمال کیا جاتا ہے اور جس پر وزن لادا جاتا ہے جہاں تک شیطان والے گھوڑے کا تعلق ہے ، تو وہ یہ ہے جس پر مقابلہ بازی اور جوا کیا جاتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی مسلمہ بن علی ہے اور وہ ضعیف ہے ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ کی راہ میں گھوڑا باندھتا ہے ، تو اس کا چارہ اور اس کا نشان ( یعنی قدم کا نشان ) قیامت کے دن اس شخص کے میزان میں ہوں گے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حارث ہے اور وہ ضعیف ہے ۔