مجمع الزوائد ومنبع الفوائد

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سر کے درمیان میں پچھنے لگوانا ، جنون ، جذام ، پھلبہری ، حواس کے فتور اور داڑھ ( کے درد ) کے لئے دواء ہے “ ۔ ( راوی بیان کرتے ہیں : ) نبی اکرم صلی اللہ علیہ وسلم اسے اُم منقذ ( نجات دلانے والے کی ماں ) کا نام دیتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یزید بن عبدالملک نوفلی ہے ، اور وہ متروک ہے اس کے بارے میں یحیی بن معین کا کلام مختلف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سر میں پچھنے لگوانا ، جنون ، جذام ، پھلبہری ، داڑھ ( کے درد ) کی دواء ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مسلمہ بن سالم جہنی ہے ایک قول کے مطابق اس کا نام مسلم بن سالم ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سر کے آگے والے حصے میں پچھنے لگواتے تھے اور آپ اسے اُم مغیث ( مدد کرنے والے کی ماں ) کا نام دیتے تھے ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سر میں پچھنے لگوانا ، سات بیماریوں کے لئے شفاء ہے ، جنون ، سر درد ، جذام ، پھلبہری ، اونگھ اور داڑھ کا درد ، اور وہ تاریکی جو آدمی کو آنکھوں میں محسوس ہوتی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عمر بن ریاح عبدی ہے ، اور وہ متروک ہے ۔

سیدنا صہیب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم پر ، سر کے پچھلے حصے کے درمیان میں پچھنے لگوانا لازم ہے ، کیونکہ یہ بہتر بیاریوں کی دواء ہے ، اور پانچ چیزوں کی دواء ہے ، جنون ، جزام ، پھلبہری اور داڑھ کا درد “ ۔
( علامہ ہیثمی فرماتے ہیں : ) میں یہ کہتا ہوں میں نے سماع والی اصل میں اس کو اسی طرح پایا ہے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عبدالرحمن بن خالد بن ولید رضی اللہ عنہ کے بارے میں یہ بات منقول ہے کہ انہوں نے اپنے سر میں اور دونوں کندھوں کے درمیان پچھنے لگوائے لوگوں نے کہا: اے امیر ! کیا آپ پچھنے لگوا رہے ہیں انہوں نے کہا: نبی اکرم صلی اللہ علیہ وسلم سر میں پچھنے لگواتے تھے اور یہ بات ارشاد فرماتے تھے : ” جو شخص اس خون کو بہا دیتا ہے ، تو اسے یہ چیز نقصان نہیں دے گی کہ اگر وہ کوئی چیز دواء کے طور پر ( یا علاج کے طور پر ) استعمال نہ کرے “ ۔
یہ روایت امام طبرانی نے نقل کی ہے ، میرے علم کے مطابق سیدنا عبدالرحمن بن خالد رضی اللہ عنہ کو صحابی ہونے کا شرف حاصل نہیں ہے ۔ ابوہزان نامی راوی سے میں واقف نہیں ہوں ۔ اس روایت کے بقیہ رجال ثقہ ہیں ۔