مجمع الزوائد ومنبع الفوائد

سیدنا امام حسین بن علی رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جمعہ کے دن میں ایک گھڑی ایسی ہے ، جو شخص اس میں پچھنے لگوا لے گا ، وہ مر جائے گا “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی یحیی بن العلاء ہے ، اور وہ کذاب ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص بدھ کے دن ، یا ہفتے کے دن پچھنے لگوائے ، اور پھر اسے برص لاحق ہو جائے ، تو وہ صرف اپنے آپ کو ملامت کرے “ ۔
یہ روایت امام بزار نے نقل کی ہے ۔ اس کی سند میں ایک راوی سلیمان بن ارقم ہے ، اور وہ متروک ہے ۔

انہوں نے اس روایت کو ایک اور سند کے ساتھ دہرایا ہے ، اور اس میں یہ الفاظ نقل کیے ہیں : ” جو شخص بدھ کے دن اور ہفتے کے دن پچھنے لگوائے “ ۔

سیدنا عبداللہ بن عباس رضی اللہ عنہما فرماتے ہیں : سترہ ، انیس اور اکیس تاریخ کو پچھنے لگواؤ ایسی صورت میں خون جوش مار کر تمہیں قتل نہیں کرے گا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی اور دیگر حضرات نے مرفوع حدیث کے طور پر نقل کی ہے ۔ تا ہم اس میں یہ الفاظ نہیں ہیں : ” ایسی صورت میں خون جوش مار کر تمہیں قتل نہیں کرے گا “ ۔
یہ روایت امام بزار نے نقل کی ہے ، اس کی سند میں ایک راوی لیث بن ابوسلیم ہے ، اور وہ ثقہ ہے ، لیکن وہ تدلیس کرنے والا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” منگل کے دن ، سورہ حدید نازل ہوئی ، منگل کے دن اللہ تعالیٰ نے لوہے کو پیدا کیا ، منگل کے دن سیدنا آدم علیہ السلام کے بیٹے نے اپنے بھائی کو قتل کیا “ راوی بیان کرتے ہیں : ) تو نبی اکرم صلی اللہ علیہ وسلم نے منگل کے دن پچھنے لگوانے سے منع کیا ہے ۔
یہ روایت امام طبرانی نے نقل کی ہے ، اس کی سند میں ایک راوی مسلمہ بن علی خشنی ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ پچھنے لگوا رہے تھے یہ منگل کے دن ، مہینے کی سترہ تاریخ کی بات ہے ، میں نے عرض کی : کیا آپ آج پچھنے لگوا رہے ہیں ؟ نبی اکرم صلی اللہ علیہ وسلم نے ارشاد فرمایا : جی ہاں ! تم میں سے جس شخص کو مہینے کی سترہ تاریخ منگل کے دن آئے ، اور وہ پچھنے لگوانے سے پہلے اس سے آگے نہ جائے تم لوگ ( اس تاریخ کو ) پچھنے لگوا لو “ ۔
یہ روایت امام طبرانی نے نقل کی ہے ۔ اس کی سند میں ایک راوی نافع بن ہرمز ہے ، اور وہ ضعیف ہے ۔

سیدنا معقل بن یسار رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مہینے کی سترہ تاریخ کو جب منگل ہو ، تو اس وقت پچھنے لگوانا سال بھر کی بیماریوں کے لئے دواء ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن ابوحواری عمی ہے ، اور وہ ضعیف ہے ، امام دارقطنی رحمہ اللہ اور دیگر حضرات نے اسے ثقہ قرار دیا ہے ، اس روایت کے بقیہ رجال صحیح کے رجال ہیں ۔

محمد بن سیرین بیان کرتے ہیں : سب سے زیادہ فائدہ مند پچھنے لگوانا وہ ہے ، جو مہینے کے کمی کے دنوں میں ہو “ ۔
یہ روایت امام طبرانی نے معجم صغیر میں ، اس شخص کے حالات میں نقل کی ہے ، جس کا نام ابراہیم ہے اس کے رجال ثقہ ہیں صرف سری بن یحیی کا معاملہ مختلف ہے ۔ انہوں نے محمد بن سیرین سے سماع نہیں کیا ہے ۔