مجمع الزوائد ومنبع الفوائد

سیدنا عبداللہ بن عمرو رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” اولاد پیدا کرنے کی صلاحیت رکھنے والی عورتوں کے ساتھ نکاح کرو ! کیونکہ قیامت کے دن ، میں دیگر امتوں کے سامنے اُن لوگوں پر فخر کروں گا“ ۔
یہ روایت امام أحمد نے نقل کی ہے ، اس کی سند میں ایک راوی حیی بن عبداللہ معافری ہے ، اس کی توثیق کی گئی ہے اور اس میں ضعف پایا جاتا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم شادی کرنے کا حکم دیتے تھے اور کنوارے رہنے سے منع کرتے تھے ، اور یہ حکم دیتے تھے : محبت کرنے والی اور اولاد پیدا کرنے کی صلاحیت رکھنے والی عورتوں کے ساتھ شادی کرو ، کیونکہ قیامت کے دن میں دیگر انبیاء کے سامنے تمہاری کثرت پر فخر کروں گا ۔
یہ روایت امام أحمد نے اور امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عیاض بن غنم رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : ” اے عیاض ! تم کسی بوڑھی ، یا بانجھ عورت کے ساتھ شادی نہ کرنا ، میں دیگر امتوں کے سامنے تم لوگوں کی کثرت پر فخر کروں گا “ ۔
یہ روایت امام طبرانی نے نقل کی ہے اس کی سند میں ایک راوی معاویہ بن یحیی صدفی ہے اور وہ ضعیف ہے ۔

سیدنا معاویہ بن حیدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اولاد پیدا کرنے کی صلاحیت رکھنے والی سیاہ فام عورت ، ایسی خوبصورت عورت سے زیادہ بہتر ہے ، جو اولاد پیدا نہیں کر سکتی قیامت کے دن میں دیگر امتوں کے مقابلے میں تمہاری کثرت پر فخر کروں گا ، یہاں تک کہ ( قیامت کے دن ) دنیا میں مردہ پیدا ہونے والے بچے کو لایا جائے گا ، اُسے جنت کے دروازے پر لایا جائے گا اور یہ کہا: جائے گا : تم جنت میں داخل ہو جاؤ ! تو وہ کہے گا : اے میرے پروردگار ! اور میرے ماں باپ بھی ؟ تو اس سے کہا: جائے گا : تم اور تمہارے ماں باپ جنت میں داخل ہو جاؤ “ ۔
یہ روایت امام طبرانی نے نقل کی ہے اس کی سند میں ایک راوی علی بن ربیع ہے اور وہ ضعیف ہے ۔

سیدہ حفصہ رضی اللہ عنہما ، نبی اکرم صلی اللہ علیہ وسلم کا یہ فرمان نقل کرتی ہیں : ” تم میں سے کوئی ایک شخص اولاد کی طلب کو ترک نہ کرے ، کیونکہ جب آدمی مر جاتا ہے اور اس کی اولاد نہ ہو ، تو اس کا نام منقطع ہو جاتا ہے “ ۔
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما ، نبی اکرم صلی اللہ علیہ وسلم کا یہ فرمان نقل کرتے ہیں : ” چون سال کا ہو جانے کے بعد ، اگر کوئی شخص کتے کے پلے کو پال پوس لے یہ اس سے زیادہ بہتر ہے کہ وہ اپنے سگے بیٹے کو پالے پوسے “ ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن سمط اور ایک راوی صالح بن علی بن عبداللہ بن عباس ہے ، میں نے کسی کو ان دونوں کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔