مجمع الزوائد ومنبع الفوائد

سیدنا سعد بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پڑوسی ، اپنے قرب ( یعنی پڑوس ) کا زیادہ حق دار ہوتا ہے “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی عبدالکریم ابوامیہ ہے اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” پڑوسی ، اپنے قرب ( یعنی پڑوس ) کا زیادہ حق رکھتا ہے ، خواہ وہ جو بھی ہو “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبید بن کثیر تمار ہے اور وہ متروک ہے ۔

سیدنا ابورافع رضی اللہ عنہ کے بارے میں یہ بات منقول ہے : انہوں نے ایک قطعہ اراضی فروخت کیا ، جو انہیں نبی اکرم صلی اللہ علیہ وسلم نے جاگیر کے طور پر عطا کیا تھا ، وہ سیدنا سعد بن ابی وقاص رضی اللہ عنہ کے گھر کے پاس تھا ، وہ انہوں نے آٹھ ہزار درہم کے عوض میں فروخت کیا انہوں نے یہ بات بیان کی کہ اس سے پہلے ایک شخص انہیں پیش کش کر چکا تھا ، وہ انہیں اس کے دس ہزار درہم دے رہا تھا ، لیکن میں نے اس کو اسے فروخت کرنے سے انکار کر دیا ، سیدنا ابورافع رضی اللہ عنہ نے یہ بتایا کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” گھر کے پچھلے کنارے کی طرف کے لوگ اپنے پچھلے کنارے کے بارے میں زیادہ حق رکھتے ہیں “ ۔ ( راوی بیان کرتے ہیں : ) تو سیدنا سعد رضی اللہ عنہ ( اُن کے سب سے زیادہ ) قریبی ( پڑوسی ) تھے ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں ان الفاظ کے علاوہ منقول ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن علی بن حسن رافعی ہے ، جسے یحیی بن معین نے ثقہ قرار دیا ہے ، امام بخاری رحمہ اللہ اور ایک جماعت نے اسے ضعیف کہا: ہے ۔

سیدنا یزید بن اسود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو امیہ بن ابوصلت کے ایک سو اشعار سنائے ، جب بھی میں آپ کو کوئی شعر سناتا ، تو آپ فرماتے : اور سناؤ ! آپ نے اسی محفل میں یہ بات ارشاد فرمائی : ” پڑوسی ، اپنے قرب ( یعنی پڑوس ) کا زیادہ حق دار ہوتا ہے “ اس کی سند میں ایک راوی خالد بن یزید اموی ہے اور وہ متروک ہے ، اس کی نسبت جھوٹ کی طرف کی گئی ہے ، ابن حبان نے اسے ثقہ قرار دیا ہے اور اس کا ذکر کتاب ” الضعفاء “ میں کیا ہے وہ یہ کہتے ہیں : یہ ثقہ راویوں سے موضوع روایت نقل کرنے میں منفرد ہے ، اگرچہ یہ حدیث دوسرے حوالوں سے مستند طور پر منقول ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے شراکت داروں کے درمیان شفعہ ہونے کا فیصلہ دیا تھا ۔
یہ روایت امام طبرانی نے معجم کبیر میں نقل کی ہے اسحاق نامی راوی نے سیدنا عبادہ رضی اللہ عنہ کا زمانہ نہیں پایا ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” شفعہ ، ہر اس چیز میں واقع ہو گا ، جس میں حدود واقع نہ ہوئی ہوں ، جب حدود واقع ہو جائیں ، تو پھر شفعہ نہیں رہے گا“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالرحمن بن عبداللہ عمری اور وہ کذاب ہے ۔

سیدنا زید بن ثابت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب حدود واقع ہو جائیں ، تو پھر شفعہ نہیں رہے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالرحمن بن ابوزناد ہے اور وہ ضعیف ہے ، ویسے اس کی توثیق کی گئی ہے ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بچے کو شفعہ کا حق حاصل رہے گا ، یہاں تک کہ جب وہ بالغ ہو جائے ، جب وہ بالغ ہو جائے گا ، تو اگر چاہے گا ، تو اسے حاصل کر لے اور اگر چاہے گا ، تو ترک کر دے گا“ ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عیسائی کو شفعہ کا حق نہیں ہو گا “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی نایل بن نجیح ہے ، جسے ابوحاتم نے ثقہ قرار دیا ہے اور دیگر حضرات نے اسے ضعیف کہا: ہے ۔