مجمع الزوائد ومنبع الفوائد

عمرو بن حریث بیان کرتے ہیں : میں مدینہ منورہ آیا میں نے اپنے ایک بھائی کے ساتھ معاملہ طے کیا ، تو سیدنا سعید بن زید رضی اللہ عنہ نے فرمایا نبی اکرم صلی اللہ علیہ وسلم نے ارشاد فرمایا ہے : ” زمین کی قیمت یا گھر کی قیمت میں برکت نہیں رکھی جاتی جبکہ وہ قیمت کسی اور زمین یا گھر میں نہ خرچ کی جائے “ ۔
یہ روایت امام أحمد نے نقل کی ہے اس کی سند میں ایک راوی قیس بن ربیع ہے ، جسے شعبہ ، ثوری اور دیگر حضرات نے ثقہ قرار دیا ہے جبکہ یحیی بن معین امام أحمد اور دیگر حضرات نے اسے ضعیف کہا: ہے ۔

قبیلے کے ایک فرد بیان کرتے ہیں : یعلی بن سہیل کا گزر سیدنا عمران بن حصین رضی اللہ عنہ کے پاس سے ہوا تو سیدنا عمران رضی اللہ عنہ نے ان سے فرمایا مجھے یہ پتہ چلا ہے کہ تم نے ایک لاکھ کے عوض میں گھر فروخت کر دیا ہے ۔ انہوں نے جواب دیا : جی ہاں ! میں نے اسے ایک لاکھ کے عوض میں فروخت کیا ، تو سیدنا عمران رضی اللہ عنہ نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جو شخص زمین کو فروخت کر دیتا ہے اللہ تعالی اس پر ضائع کرنے والا مسلط کر دیتا ہے ، جو اس رقم کو ضائع کر دیتا ہے “ ۔
یہ روایت امام أحمد نے نقل کی ہے اس کی سند میں ایک راوی ایسا ہے ، جس کا نام بیان نہیں کیا گیا ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بھی بندہ ( باپ دادا سے ) وراثت میں ملنے والی چیز فروخت کرتا ہے ، تو اللہ تعالی اس پر تلف ( یعنی ضائع ) کرنے والا مسلط کر دیتا ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی بشیر بن شریح ہے اور وہ ضعیف ہے ۔

سیدنا حذیفہ رضی اللہ عنہ اور سیدنا عمرو بن حریث رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص گھر فروخت کرتا ہے اور پھر اس کی قیمت اس کی مانند ( کسی اور گھر ) میں خرچ نہیں کرتا تو اس رقم میں اس کے لئے برکت نہیں رکھی جاتی “ ۔ ( علامہ ہیثمی فرماتے ہیں : ) میں یہ کہتا ہوں : سیدنا حذیفہ رضی اللہ عنہ سے منقول حدیث کو امام بن ماجہ نے بھی روایت کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی صباح بن یحیی ہے اور وہ متروک ہے ۔

عبداللہ بن یعلی لیثی ، جو بصرہ کے قاضی ہیں ، وہ بیان کرتے ہیں : سیدنا معقل بن یسار رضی اللہ عنہ نے ایک گھر ایک لاکھ کے عوض میں فروخت کیا ، پھر انہوں نے یہ بات بتائی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص کسی ضرورت کے بغیر زمین ( یا گھر ) فروخت کرتا ہے ، تو اللہ تعالٰی ایک ضائع کرنے والا بھیجتا ہے ، جو اس کے مال کو ضائع کر دیتا ہے “ ۔
یہ روایت امام طبرانی نے معجم اوسط میں نقل کی ہے اس کی سند میں راویوں کی ایک جماعت ایسی ہے جن سے میں واقف نہیں ہوں جن میں عبداللہ بن یعلی لیثی بھی ہے ۔

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کوئی گھر فروخت کرتا ہے اور پھر اس کی جگہ دوسرا گھر نہیں لیتا ، تو اس شخص کے لئے اس گھر کی قیمت میں برکت نہیں رکھی جاتی “ ۔
یہ روایت امام طبرانی نے معجم اوسط میں نقل کی ہے اور اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔