مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے جانور کو جانور کے بدلے میں ادھار فروخت کرنے سے منع کیا ہے ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے جانور کے عوض میں جانور کو ادھار فروخت کرنے سے منع کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن دینار ہے ، جسے ابن حبان اور دیگر حضرات نے ثقہ قرار دیا ہے اور یحییٰ بن معین نے اسے ضعیف کہا: ہے ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے جانور کے عوض میں جانور ادھار فروخت کرنے سے منع فرمایا ہے ۔
یہ روایت عبداللہ بن أحمد نے نقل کی ہے اس کی سند میں ایک راوی ابوعمرو مقری ہے اگر تو یہ دوری ہے ، تو پھر اس کی توثیق کی گنی ہے اور حدیث صحیح ہے اور اگر یہ اس کے علاوہ کوئی اور ہے اور تو پھر میں اس سے واقف نہیں ہوں امام طبرانی کی سند ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : دو دیناروں کے عوض میں ایک دینار حاصل نہ کرو دو درہموں کے عوض میں ایک درہم حاصل نہ کرو دو صاع کے عوض میں ایک صاع حاصل نہ کرو مجھے تم لوگوں کے بارے میں سود کا اندیشہ ہو گا یہ سود ہے سود ہے ایک صاحب نے عرض کی : یا رسول اللہ ! اس بارے میں آپ کی کیا رائے ہے کہ ایک شخص کئی گھوڑوں کے عوض میں ایک گھوڑا فروخت کرتا ہے یا ایک عمدہ اونٹنی کو ایک اونٹ کے عوض میں فروخت کر دیتا ہے ، تو نبی اکرم صلی اللہ علیہ وسلم نے ارشاد فرمایا : اس میں کوئی حرج نہیں ہے جبکہ دست بدست لین دین ہو ۔
یہ روایت امام أحمد نے نقل کی ہے اور امام طبرانی نے معجم کبیر میں نقل کی ہے اس کی سند میں ایک راوی ابوجناب کلبی ہے اور وہ تدلیس کرنے والا ہے اور ثقہ ہے ۔

سیدنا صنابحی رضی اللہ عنہ بیان کرتے ہیں : نبی اکرم صلی اللہ علیہ وسلم نے صدقہ کے اونٹوں میں ایک مسنہ اونٹنی ملاحظہ فرمائی تو آپ غصے میں آ گئے آپ نے ارشاد فرمایا : یہ کہاں سے آئی ہے ؟ ان صاحب نے عرض کی : یا رسول اللہ ! یہ میں نے صدقہ کے حواشی میں سے دو اونٹوں کے عوض میں لی ہے ، تو نبی اکرم صلی اللہ علیہ وسلم خاموش ہو گئے ہے ۔
یہ روایت امام أحمد اور امام ابویعلیٰ نے نقل کی ہے تاہم انہوں نے یہ بات نقل کی ہے سیدنا صنابحی رضی اللہ عنہ سے یہ بات منقول ہے ۔ انہوں نے عرض کی : یا رسول اللہ ! یہ میں نے اونٹوں کے حواشی میں سے دو اونٹوں کے عوض میں لی ہے ، تو نبی اکرم صلی اللہ علیہ وسلم نے ارشاد فرمایا : پھر یہ ٹھیک ہے ۔ اس روایت کی سند میں ایک راوی مجالد بن سعد ہے اور وہ ضعیف ہے ایک روایت کے مطابق امام نسائی رحمہ اللہ نے اسے ثقہ قرار دیا ہے ۔

سیدنا اسود بن اصرم رضی اللہ عنہ بیان کرتے ہیں : وہ قحط سالی اور خشک سالی کے زمانے میں مدینہ منورہ موٹا تازہ اونٹ لے کر آئے جب اہل مدینہ نے انہیں دیکھا تو انہیں اونٹ کی صحت پسند آئی راوی بیان کرتے ہیں : نبی اکرم صلی اللہ علیہ وسلم کے سامنے ان کے اونٹ کا ذکر ہوا ، تو نبی اکرم صلی اللہ علیہ وسلم نے ان کو پیغام بھیجا وہ آپ کے پاس لائے گئے نبی اکرم صلی اللہ علیہ وسلم نکلے آپ نے ان کا جائزہ لیا اور فرمایا : تم اپنا یہ اونٹ کس لئے لے کے آئے ہو ان صاحب نے عرض کی : میں اس کے عوض میں ایک خادم لینا چاہتا ہوں ۔ نبی اکرم صلی اللہ علیہ وسلم نے دریافت کیا : کس شخص کے پاس خادم موجود ہے ؟ سیدنا عثمان رضی اللہ عنہ نے عرض کی : یا رسول اللہ ! میرے پاس ہے ۔ نبی اکرم صلی اللہ علیہ وسلم نے فرمایا : لے کے آؤ سیدنا عثمان رضی اللہ عنہ اسے لے کے آئے جب اسود نے اس کنیز کو دیکھا تو بولے : میں ایسی ہی چاہتا تھا تو سیدنا عثمان رضی اللہ عنہ نے کہا: یہ میرے پاس ہے تم اسے لے لو تو سیدنا اسود رضی اللہ عنہ نے اسے لے لیا اور نبی اکرم صلی اللہ علیہ وسلم نے ان کا اونٹ لے لیا ۔ سیدنا اسود رضی اللہ عنہ نے عرض کی یا رسول اللہ آپ مجھے کوئی وصیت کیجئے نبی اکرم صلی اللہ علیہ وسلم نے ارشاد فرمایا : تم اپنی زبان ق ابومیں رکھنا انہوں نے عرض کی : اگر میں اس پر ق ابونہ رکھ پاؤں تو کس چیز پر ثابت رہوں ۔ نبی اکرم صلی اللہ علیہ وسلم نے ارشاد فرمایا : تم اپنے ہاتھ پر ق ابورکھنا ۔ انہوں نے عرض کی : اگر میں اپنے ہاتھ پر بھی ق ابونہ رکھ پاؤں تو کس چیز پر ق ابورکھوں نبی اکرم صلی اللہ علیہ وسلم نے ارشاد فرمایا : تم اپنی زبان کے ذریعے صرف بھلائی کی بات کہنا اور اپنا ہاتھ صرف بھلائی کے کام کی طرف بڑھانا ۔ علامہ ہیثمی فرماتے ہیں : ) میں یہ کہتا ہوں : یہ روایت ایک اور سند کے ساتھ خاموشی سے متعلق باب میں آئے گی ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبدالرحمن بن بخت ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال صحیح کے رجال ہیں ۔

سیدنا ابیض بن حمال رضی اللہ عنہ بیان کرتے ہیں : انہوں نے کندہ سے تعلق رکھنے والے تین بھائیوں کی ملکیت ہونے کے عالم میں اسلام قبول کیا وہ تینوں بھائی زمانہ جاہلیت میں ان کے غلام تھے وہ ایک وفد کی شکل میں سیدنا ابوبکر رضی اللہ عنہ کی خدمت میں ان کے عہد خلافت میں حاضر ہوئے تو سیدنا ابوبکر رضی اللہ عنہ نے سیدنا ابیض بن حمال رضی اللہ عنہ سے یہ مطالبہ کیا کہ وہ اپنے اس غلام کو آزاد کر دیں جو ان کی خدمت کرتا ہے اور وہ اس غلام کے بھائی کو ان سے قادسیہ کے قیدیوں میں سے چھ غلاموں کے عوض میں خرید لیتے ہیں تو سیدنا ابیض بن حمال رضی اللہ عنہ نے ایسا ہی کیا انہوں نے اپنے ساتھ موجود بھائیوں کو آزاد کر دیا اور ان بھائیوں کی جگہ قادسیہ کے قیدیوں میں سے چھ غلام حاصل کر لیے پھر سیدنا ابیض بن حمال رضی اللہ عنہ نے سیدنا ابوبکر رضی اللہ عنہ کو یہ بتایا کہ وہ ان اہلکاروں کے سلسلے میں حاضر ہوئے ہیں کہ جنہوں نے نبی اکرم صلی اللہ علیہ وسلم کے وصال کے بعد زیادتی کی ہے اس چیز کے بارے میں جس کے بارے میں سیدنا ابیض بن حمال رضی اللہ عنہ نے نبی اکرم صلی اللہ علیہ وسلم کے ساتھ ستر حلوں کی ادائیگی طے کی تھی تو سیدنا ابوبکر رضی اللہ عنہ نے اس صورت حال کو برقرار رکھا جس پر نبی اکرم صلی اللہ علیہ وسلم نے انہیں برقرار رکھا تھا یہاں تک کہ جب سیدنا ابوبکر رضی اللہ عنہ کا انتقال ہو گیا تو اس کے بعد وہ چیز پھر کالعدم ہو گئی اور وہ صدقہ شمار ہوئی ۔ ( علامہ ہیثمی فرماتے ہیں : ) میں یہ کہتا ہوں : حلوں کے عوض میں معاہدہ کرنے والا حصہ امام ابوداؤد نے روایت کیا ہے ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

یزید بن ابونعیم بیان کرتے ہیں : اسلم قبیلے سے تعلق رکھنے والے ایک صاحب جن کا نام عبید بن عمیر تھا انہوں نے ایک کنیز کے ساتھ صحبت کی وہ حاملہ ہو گئی اس نے ان صاحب کے بچے کو جنم دیا جس کا نام حمام رکھا گیا یہ زمانہ جاہلیت کی بات ہے ( راوی بیان کرتے ہیں : ) میرے چچا نبی اکرم صلی اللہ علیہ وسلم کی خدمت میں حاضر ہوئے اور اپنے بیٹے کے بارے میں آپ کے ساتھ بات چیت کی نبی اکرم صلی اللہ علیہ وسلم نے ان سے فرمایا : جہاں تک تم سے ہو سکے تم اپنے بیٹے کو حاصل کرنے کی کوشش کرو وہ صاحب گئے ۔ انہوں نے اپنے بیٹے کو لیا اور اسے لے کر نبی اکرم صلی اللہ علیہ وسلم کے پاس آئے اس غلام کا آقا بھی نبی اکرم صلی اللہ علیہ وسلم کے پاس آ گیا نبی اکرم صلی اللہ علیہ وسلم نے اس کے آقا کو دو غلاموں کی پیش کش کی اور فرمایا : تم ان دو میں سے کسی ایک کو لے لو اور اس شخص کے بیٹے کو چھوڑ دو تو اس شخص نے ایک غلام لے لیا اور دوسرے کو چھوڑ دیا ۔
یہ روایت امام طبرانی نے معجم کبیر میں نقل کی ہے اور
یہ روایت ” مرسل “ ہے اس کی سند میں ایک راوی سفیان بن وکیع ہے اور وہ ضعیف ہے ۔