مجمع الزوائد ومنبع الفوائد

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے دو ایسے دنبے ذبح کیے جن کی سفیدی سیاہی پر غالب تھی، اور وہ دونوں خصی تھے، آپ نے ارشاد فرمایا : ان دونوں میں سے ایک ہر اس شخص کی طرف سے ہے ، جو توحید کی اور میری طرف سے تبلیغ کر دینے کی گواہی دے اور دوسرا نبی اکرم صلی اللہ علیہ وسلم اور آپ کے اہل بیت کی طرف سے تھا ۔ راوی بیان کرتے ہیں : تو نبی اکرم صلی اللہ علیہ وسلم نے ہماری طرف سے کفایت کر دی تھی ۔
یہ روایت امام أحمد نے نقل کی ہے اور اس کی نقل کردہ سند حسن ہے اور روایت کے یہ الفاظ ان کے نقل کردہ ہیں ۔

سیدنا ابورافع رضی اللہ عنہ جو نبی اکرم صلی اللہ علیہ وسلم کے غلام ہیں وہ بیان کرتے ہیں : جب نبی اکرم صلی اللہ علیہ وسلم قربانی کرتے تھے تو آپ دو موٹے تازے دنبے خریدتے تھے جو سینگ والے ہوتے تھے ، اور ان کی سفیدی سیاہی پر غالب تھی ( یا وہ بالکل سفید تھے ) جب آپ نے نماز ختم کی ، تو آپ نے خطبہ ارشاد فرمایا : پھر آپ ان دونوں میں سے ایک کے پاس تشریف لائے آپ اس وقت عید گاہ میں موجود تھے آپ نے اسے ذبح کیا اور پھر فرمایا : اے اللہ ! یہ میری پوری امت میں سے ہر اس شخص کی طرف سے ہے ، جو تیرے بارے میں توحید کی اور میرے بارے میں تبلیغ کی گواہی دے پھر دوسرے جانور کو لایا گیا اور آپ نے اسے ذبح کیا اور پھر یہ فرمایا : اے اللہ ! یہ محمد اور آل محمد کی طرف سے ہے آپ نے ان دونوں کا گوشت مساکین کو کھلایا آپ نے اور آپ کے اہل خانہ نے بھی ان کا گوشت کھایا ۔ راوی بیان کرتے ہیں : پھر کئی سال ایسے گزر گئے کہ بنو ہاشم میں سے کوئی بھی قربانی نہیں کرتا تھا کیونکہ اللہ کے رسول نے ہماری جگہ یہ فریضہ سر انجام دے دیا تھا ۔
یہ روایت امام بزار نے نقل کی ہے اور امام أحمد نے اس کی مانند نقل کی ہے اور امام طبرانی نے معجم کبیر میں اس کی مانند اسے نقل کیا ہے ۔

معجم اوسط میں ، سیدنا ابورافع رضی اللہ عنہ کے حوالے سے یہ بات منقول ہے وہ بیان کرتے ہیں : نبی اکرم صلی اللہ علیہ وسلم نے دنبہ قربان کیا اور پھر ارشاد فرمایا : یہ میری طرف سے اور میری امت کی طرف سے ہے ۔ امام طبرانی نے معجم کبیر میں اس کی مانند روایت نقل کی ہے امام أحمد اور امام بزار کی سند حسن ہے ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم دو سینگوں والے، چتکبرے (جن کی سفیدی سیاہی پر غالب تھی)، موٹے تازے خصی مینڈھے (دنبے) لے کر آئے۔ آپ نے ان میں سے ایک کو لٹایا اور پھر یہ پڑھا : اللہ تعالیٰ کے نام سے برکت حاصل کرتے ہوئے اللہ تعالیٰ سب سے بڑا ہے : اے اللہ ! یہ محمد اور آل محمد کی طرف سے ہے پھر آپ نے دوسرے کو لٹایا اور پھر یہ پڑھا اللہ تعالیٰ کے نام سے برکت حاصل کرتے ہوئے اللہ تعالیٰ سب سے بڑا ہے یہ محمد اور اس کی امت کی طرف سے ہے اور اس شخص کی طرف سے جو تیرے بارے میں توحید کی اور میرے بارے میں تبلیغ کر دینے کی گواہی دے “ ۔
یہ روایت امام ابویعلیٰ نے نقل کی ہے اور اس کی سند حسن ہے سیدنا جابر رضی اللہ عنہ کے حوالے سے ایک حدیث منقول ہے ، جسے امام ابوداؤد نے اختصار کے ساتھ نقل کیا ہے ۔

سیدنا ابوسعید خدری رضی اللہ عنہ بیان کرتے ہیں : قربانی کے دن نبی اکرم صلی اللہ علیہ وسلم کے پاس دو چتکبرے (جن کی سفیدی زیادہ ہو) ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے یہ بات ذکر کی ہے کہ نبی اکرم صلی اللہ علیہ وسلم نے ان دو میں سے ایک کے بارے میں یہ فرمایا : یہ محمد اور اس کے اہل بیت کی طرف سے ہے اور دوسرے کے بارے میں یہ فرمایا : یہ ہر اس شخص کی طرف سے ہے کہ میری امت کا جو فرد قربانی نہیں کر سکے گا ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” سنن “ میں یہ روایت منقول ہے : ” نبی اکرم صلی اللہ علیہ وسلم نے سینگ والے ، موٹے تازے دُنبے کی قربانی کی تھی “ ۔
یہ روایت امام بزار نے نقل کی ہے روایت کے یہ الفاظ ان کے نقل کردہ ہیں اسے امام أحمد نے اختصار کے ساتھ نقل کیا ہے اور ان کے رجال ثقہ ہیں ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے دو جوان اور خصی دنبوں کی قربانی کی تھی ۔
یہ روایت امام أحمد نے اور امام طبرانی نے معجم کبیر میں نقل کی ہے راوی بیان کرتے ہیں : سیدنا ابودرداء رضی اللہ عنہ نے وہ دونوں نبی اکرم صلی اللہ علیہ وسلم کی خدمت میں تحفے کے طور پر پیش کیے تھے اس روایت کی سند میں ایک راوی حجاج بن ارطاۃ ہے وہ ثقہ ہے لیکن وہ تدلیس کرنے والا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے دو سینگوں والے ، سفید دنبوں کی قربانی کی تھی آپ نے ان دونوں میں سے ایک کو قربان کرتے ہوئے یہ فرمایا : اللہ تعالیٰ کے نام سے برکت حاصل کرتے ہوئے اے اللہ ! یہ تیری طرف سے ( ملا ) ہے اور تیرے لئے ہے یہ محمد اور اس کے اہل بیت کی طرف سے ہے پھر آپ نے دوسرے کو قربان کیا ، تو یہ فرمایا : اللہ تعالی کے نام سے برکت حاصل کرتے ہوئے اے اللہ ! یہ تیری طرف سے ( ملا ) ہے اور تیرے لئے ہے اور یہ ہر اس شخص کی طرف سے ہے کہ میری امت کا جو بھی فرد ، تیری وحدانیت کا اعتراف کرتا ہو “ ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے اس کی سند میں ایک راوی حجاج ابن ارطاۃ ہے اور وہ ثقہ ہے لیکن وہ تدلیس کرنے والا ہے ۔

سیدنا ابوطلہ رضی اللہ عنہ بیان کرتے ہیں : نبی اکرم صلی اللہ علیہ وسلم نے دو سفید دنبے قربان کیے ، پہلے کو ذبح کرتے ہوئے آپ نے یہ فرمایا : یہ محمد اور آل محمد کی طرف سے ہے اور دوسرے کو ذبح کرتے وقت یہ فرمایا : یہ اس شخص کی طرف سے ہے کہ میری امت کا جو فرد مجھ پر ایمان لائے اور میری تصدیق کرے ۔
یہ روایت امام ابویعلیٰ نے اور امام طبرانی نے معجم کبیر اور معجم اوسط میں اسحاق بن عبداللہ بن ابوطلحہ کی اپنے دادا سے نقل کردہ روایت کے طور پر نقل کی ہے حالانکہ انہوں نے ان کا زمانہ نہیں پایا ہے اس روایت کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے دو سینگوں والے ، سفید دنبے قربان کیے ، جن میں سے ایک آپ کی طرف سے اور آپ کے اہل بیت کی طرف سے تھا اور دوسرا آپ کی طرف سے اور آپ کی امت کے ہر اس فرد کی طرف سے تھا جو قربانی نہیں کرے گا ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے شک کے ہمراہ نقل کی ہے کہ شاید یہ سیدنا ابوہریرہ رضی اللہ عنہ سے منقول ہے یا شاید سیدہ عائشہ رضی اللہ عنہا سے منقول ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عیسیٰ بن عبدالرحمن بن ابوفروہ ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سینگ والا ، بڑی آنکھ والا ، سفید دُنبہ ذبح کیا تھا ۔
یہ روایت امام طبرانی نے معجم اوسط اور معجم کبیر میں نقل کی ہے روایت کے یہ الفاظ ان کے نقل کردہ ہیں اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے دو سفید دنبوں کی قربانی کی تھی ، آپ نے اپنا پاؤں اُن کو ذبح کرنے کے وقت ان کے پہلو پر رکھا اور پھر یہ کہا: ” اے اللہ ! یہ تیری طرف سے ( ملا ) ہے اور تیرے لئے ہے : اے اللہ ! محمد کی طرف سے یہ قبول فرما لے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبداللہ بن خراش ہے ، جسے ابن حبان نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا حذیفہ بن اسید رضی اللہ عنہ بیان کرتے ہیں : نبی اکرم صلی اللہ علیہ وسلم نے دو سفید دنبے قربان کیے ان میں سے ایک کو ذبح کرتے ہوئے آپ نے فرمایا : اے اللہ ! یہ محمد اور آل محمد کی طرف سے ہے اور دوسرے کو قربان کرتے ہوئے آپ نے یہ فرمایا : اے اللہ ! یہ میری امت کے ہر اس فرد کی طرف سے ہے ، جو تیری توحید کی گواہی دے اور میری تبلیغ کی گواہی دے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی یحیی بن نصر بن حاجب ہے ابن عدی نے اسے ثقہ کہا: ہے اور ایک جماعت نے اسے ضعیف کہا: ہے ۔

سیدنا نعمان بن ابوفاطمہ رضی اللہ عنہا بیان کرتے ہیں : انہوں نے ایک سینگ والا اور بڑی آنکھوں والا دُنبہ خریدا ، نبی اکرم صلی اللہ علیہ وسلم نے اسے ملاحظہ فرمایا تو ارشاد فرمایا : یہ تو اس دنبے کی مانند لگتا ہے جسے سیدنا ابراہیم علیہ السلام نے ذبح کیا تھا انصار سے تعلق رکھنے والا ایک شخص گیا اس نے نبی اکرم صلی اللہ علیہ وسلم کے لئے اسی طرح کا ایک جانور خریدا تو نبی اکرم صلی اللہ علیہ وسلم نے وہ لے کر اس کی قربانی کی ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔