مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ حکم دیا تھا کہ میں ( ہر سال ) آپ کی طرف سے دو دنبے قربان کروں تو میں ایسا کرنے کو پسند کرتا ہوں ۔ محاربی نے اپنی روایت میں یہ الفاظ نقل کیے ہیں : ( یہ حکم دیا تھا ) کہ میں آپ کی طرف سے دو دنبے قربان کروں ایک نبی اکرم صلی اللہ علیہ وسلم کی طرف سے ہو اور دوسرا ان کی طرف سے ہو سیدنا علی رضی اللہ عنہ سے اس بارے میں بات چیت کی گئی تو انہوں نے فرمایا : نبی اکرم صلی اللہ علیہ وسلم نے مجھے حکم دیا تھا اس لئے میں انہیں کبھی ترک نہیں کروں گا ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے سیدنا علی رضی اللہ عنہ کے حوالے سے یہ روایت نقل کی ہے ، جس میں یہ الفاظ ہیں : ” آپ نے مجھے یہ ہدایت کی تھی کہ میں آپ کی طرف سے قربانی کروں “ ۔ انہوں نے اس میں ایک یا دو دنبوں کا ذکر نہیں کیا ہے ۔
یہ روایت عبداللہ بن أحمد نے نقل کی ہے اس کی سند میں ایک راوی ابوحسناء ہے اور یہ معروف نہیں ہے شریک کے علاوہ اور کسی نے اس سے روایت نقل نہیں کی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ رات کے وقت قربانی کی جائے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی سلیمان بن سلمہ خبائری ہے اور وہ متروک ہے ۔