مجمع الزوائد ومنبع الفوائد

سیدنا معاذ بن انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص رمضان کے علاوہ اللہ کی راہ میں ایک دن روزہ رکھتا ہے وہ جہنم سے ایک سو سال کی مسافت جتنا دور ہو جاتا ہے ، جسے کوئی تربیت یافتہ گھوڑا ( ایک سو سال میں طے کرتا ہے ) “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی زبان بن فائد ہے ، جس کے بارے میں بہت زیادہ کلام کیا گیا ہے ویسے اس کی توثیق کی گئی ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ کی راہ میں ایک دن روزہ رکھتا ہے اللہ تعالیٰ اس شخص کے اور جہنم کے درمیان ایک خندق حائل کر دیتا ہے ، جو اتنی ( بڑی ) ہوتی ہے کہ جتنا آسمان اور زمین کے درمیان فاصلہ ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اور اس کی سند حسن ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی راہ میں آدمی کا روزہ رکھنا اسے جہنم سے ستر برس کی مسافت جتنا دور کر دیتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مسلمہ بن علی ہے ، اور وہ ضعیف ہے ۔

سیدنا جابر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ کی راہ میں ایک دن روزہ رکھتا ہے اللہ تعالیٰ اس شخص اور جہنم کے درمیان اتنی خندق حائل کر دیتا ہے جتنا آسمان اور زمین کے درمیان فاصلہ ہے “ ۔ ایک روایت میں یہ الفاظ ہیں : ” ستر برس کی مسافت جتنی ( خندق حائل کر دیتا ہے ) “ ۔
یہ روایت امام طبرانی نے معجم اوسط میں نقل کی ہے ، اور ستر برس کی مسافت والی روایت کی سند میں ایک راوی بقیہ ہے وہ ثقہ ہے ، لیکن وہ تدلیس کرنے والا ہے پہلی روایت کی سند میں ایک راوی عیسیٰ بن سلیمان جرجانی ہے ، اور وہ ضعیف ہے ۔

سیدنا عمرو بن عبسہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ کی راہ میں ایک دن روزہ رکھتا ہے جہنم اس سے ایک سو سال کی مسافت جتنی دور ہو جاتی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ کی راہ میں ایک دن روزہ رکھتا ہے اللہ تعالیٰ اس کو جہنم سے ایک سو سال کی مسافت جتنا دور کر دیتا ہے ، جو مسافت تربیت یافتہ تیز رفتار گھوڑا ( ایک سو سال میں طے کرتا ہے ) “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مطرح ہے ، اور وہ ضعیف ہے ۔

سیدنا عتبہ بن عبد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ کی راہ میں ایک دن فرض روزہ رکھتا ہے اللہ تعالیٰ اس سے جہنم کو اتنا دور کر دیتا ہے جتنا آسمانوں اور سات زمینوں کے درمیان فاصلہ ہے ، اور جو شخص ایک دن نفلی روزہ رکھتا ہے اللہ تعالیٰ جہنم کو اس سے اتنا دور کر دیتا ہے جتنا آسمان اور زمین کے درمیان فاصلہ ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی واقدی ہے اس کے بارے میں بہت زیادہ کلام کیا گیا ہے ویسے اس کی توثیق کی گئی ہے ۔

سیدنا عبداللہ بن سفیان ازدی رضی اللہ عنہ جو نبی اکرم صلی اللہ علیہ وسلم کے صحابی ہیں ، وہ بیان کرتے ہیں : جو شخص اللہ کی راہ میں ایک دن روزہ رکھتا ہے اللہ تعالی اس شخص کو جہنم سے ایک سو سال کی مسافت جتنا دور کر دیتا ہے ۔ حبیب نامی راوی نے ابوبشر سے دریافت کیا : کیا دو سو سال کی مسافت جتنا ؟ تو ابوبشر نے عثامہ بن قیس سے کہا: میرا یہی خیال ہے ، تو عبداللہ بن سفیان نے کہا: میں تمہیں وہ حدیث بیان کروں گا ، جو میں نے سنی ہے میں تم لوگوں کو وہ حدیث بیان نہیں کروں گا ، جو تم نے مجھے بیان کی ہو گی ۔
یہ روایت امام طبرانی نے معجم اوسط میں نقل کی ہے ، اور معجم کبیر میں اس کی مانند نقل کی ہے ، ابوبشر نامی راوی سے واقف نہیں ہوں ، اس کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ کی راہ میں جنگ میں حصہ لینے والوں میں سب سے زیادہ فضیلت والا شخص وہ ہے ، جو ان لوگوں کی خدمت کرتا ہو ، پھر وہ جو ان لوگوں کے پاس اطلاعات لے کے آتا ہوں ( یعنی جاسوسی کرتا ہو ) اور اللہ تعالیٰ کی بارگاہ میں قدر و منزلت کے اعتبار سے ان سب سے زیادہ ( فضیلت والا شخص ) روزہ دار شخص ہے “ ۔ اس کے بعد راوی نے پوری حدیث ذکر کی ہے ، جو مکمل روایت آگے چل کر جہاد سے متعلق باب میں آئے گی ، اگر اللہ نے چاہا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عنبسہ بن مہران حداد ہے ، اور وہ ضعیف ہے ۔