مجمع الزوائد ومنبع الفوائد

قتادہ بیان کرتے ہیں : سیدنا انس رضی اللہ عنہ روزہ رکھنے کے قابل نہ رہے یہ ان کی فوت ہونے سے ایک سال پہلے کی بات ہے ، تو انہوں نے روزے ترک کر دیے اور وہ ہر ایک دن کے عوض میں ایک مسکین کو کھانا کھلاتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

ایوب بن ابوتمیمہ بیان کرتے ہیں : سیدنا انس رضی اللہ عنہ روزہ رکھنے کے قابل نہیں رہے ، تو انہوں نے ثرید کا ایک پیالہ بنوایا اور تیس مسکینوں کو بلوا کر انہیں کھانا کھلایا ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

مجاہد بیان کرتے ہیں : قیس بن سائب ، عمر رسیدہ ہو گئے یہاں تک کہ ان کی عمر ساٹھ سال ہو گئی وہ روزہ رکھنے کے قابل نہ رہے ، تو ان کی طرف سے کھانا کھلا دیا جاتا تھا ۔

ایک روایت میں یہ الفاظ ہیں : میں نے سیدنا قیس بن سائب رضی اللہ عنہ کو یہ بیان کرتے ہوئے سنا : رمضان کے مہینے میں آدمی فدیہ ادا کر دے گا اس کے ہر ایک دن کے عوض میں ایک مسکین کو کھانا کھلائے گا ، تو تم میری طرف سے روزانہ ایک مسکین کو ایک صاع کھانے کے لئے دو نبی اکرم صلی اللہ علیہ وسلم زمانہ جاہلیت میں میرے شراکت دار تھے آپ بہترین شراکت دار تھے آپ خرید و فروخت میں لڑائی جھگڑا ( یا تو تکرار ) نہیں کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔