مجمع الزوائد ومنبع الفوائد

سیدنا طلق بن علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالی نے پہلی کے چاند کو لوگوں کے لئے ( مہینوں کا حساب ) رکھنے کا ذریعہ بنایا ہے ، تو تم اسے دیکھ کر روزے رکھو اور اسے دیکھ کر عیدالفطر کرو اور اگر تم پر بادل چھا جائیں تو تعداد مکمل کرو “ ۔
یہ روایت امام أحمد نے نقل کی ہے ، اور امام طبرانی نے معجم کبیر میں نقل کی ہے ۔ اس کی سند میں ایک راوی محمد بن جابر یمامی ہے ، اور وہ صدوق ہے ، تاہم اس کی تحریریں ضائع ہو گئی تھیں وہ تلقین قبول کر لیتا تھا ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : جب تم پہلی کا چاند دیکھو تو روزہ رکھو اور جب تم اسے دیکھو تو عیدالفطر کرو اور اگر تم پر بادل چھایا ہو تو تیس کی تعداد پوری کرو “ ۔
یہ روایت امام أحمد نے اور امام ابویعلیٰ نے نقل کی ہے ، اور امام طبرانی نے معجم اوسط میں نقل کی ہے ۔ امام أحمد کے رجال ” صحیح “ کے رجال ہیں ۔

سیدنا ابوبکرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اسے دیکھ کے روزے رکھنا شروع کرو اور اسے دیکھ کے عیدالفطر کرو اور اگر تم پر بادل چھایا ہوا ہو تو تعداد مکمل کرو “ ۔ راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : ” مہینہ اتنا اتنا اور اتنا ہوتا ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ اس کی سند میں ایک راوی عمر بن داؤد قطان ہے ، جسے ابن حبان اور دیگر حضرات نے ” ثقہ “ قرار دیا ہے اس کے بارے میں کلام کیا گیا ہے ۔

مسروق اور سیدنا براء بن عازب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے دیکھ کر روزے رکھنا شروع کرو اور اسے دیکھ کر عیدالفطر کرو اور اگر تم پر بادل چھائے ہوئے ہوں تو تیس کی تعداد پوری کرو “ ۔ پھر نبی اکرم صلی اللہ علیہ وسلم نے اپنے دست مبارک کے ذریعے اشارہ کر کے کہا: مہینہ ( کبھی ) اتنا اور اتنا ہوتا ہے یعنی انتیس دن کا ہوتا ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی علی بن ہاشم بن برید ہے ، جو صدوق ہے ، لیکن اس میں تشیع پایا جاتا ہے ۔

سیدنا عدی بن حاتم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب رمضان آ جائے تو تم رمضان کے تیس روزے رکھو البتہ اگر اس سے پہلے تم پہلی کا چاند دیکھ لو تو معاملہ مختلف ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مجالد بن سعید ہے ، جسے امام نسائی رحمہ اللہ نے ” ثقہ “ قرار دیا ہے ، اور ایک جماعت نے اسے ضعیف کہا: ہے ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس سے پہلے نہ کرو ( راوی کہتے ہیں : ) یعنی رمضان کے مہینے سے پہلے روزے رکھنے شروع نہ کرو اسے ( یعنی پہلی کے چاند کو ) دیکھ کر روزے رکھنا شروع کرو اور اگر تم پر بادل چھایا ہو تو تیس کی تعداد مکمل کرو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن اسحاق ہے ، اور وہ تدلیس کرنے والا ہے ، لیکن وہ ثقہ ہے ۔

عبدالملک بن میسرہ بیان کرتے ہیں : میں مدینہ منورہ میں موجود تھا وہاں سیدنا عبداللہ بن عمر رضی اللہ عنہما اور سیدنا عبداللہ بن عباس رضی اللہ عنہما بھی موجود تھے ایک شخص وہاں کے والی کے پاس آیا اور اس نے والی کے سامنے رمضان کے مہینے کے پہلی کے چاند کو دیکھنے کے بارے میں گواہی دی ، والی نے سیدنا عبداللہ بن عمر رضی اللہ عنہما اور سیدنا عبداللہ بن عباس رضی اللہ عنہما سے اس شخص کی گواہی کے بارے میں دریافت کیا ، تو ان دونوں صاحبان نے اسے یہ ہدایت کی کہ وہ اس گواہی کو قبول کرے ۔ ان دونوں حضرات نے یہ بات بیان کی کہ نبی اکرم صلی اللہ علیہ وسلم نے رمضان کے پہلی کے چاند کو دیکھنے کے بارے میں ایک شخص کی گواہی کو بھی درست قرار دیا ہے ، البتہ عیدالفطر کے بارے میں نبی اکرم صلی اللہ علیہ وسلم کم از کم دو آدمیوں کی گواہی کو درست قرار دیتے تھے ۔ علامہ ہیثمی فرماتے ہیں : ) میں یہ کہتا ہوں :
یہ روایت سنن میں اختصار کے ساتھ موجود ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حفص بن عمرو ابلی ہے ، اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت قریب ہونے کے زمانے میں چاند پھول جائے گا ، اور پہلی کا چاند جب نظر آئے گا تو یہ کہا: جائے گا : یہ تو دو راتوں کا چاند ہے “ ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی عبدالرحمن بن ازرق انطا کی ہے میں نے کسی کو اس کے حالات بیان کرتے ہوئے نہیں پایا ہے ۔

سیدنا عبداللہ بن مسعود رضی اللہ عنہ فرماتے ہیں : پہلی کا چاند دیکھ کر روزے شروع کیے جائیں گے اور اسے دیکھنے تک رکھے جائیں گے ، اگر وہ تم سے پوشیدہ رہتا ہے ، تو تیس دن ( روزے رکھے جائیں گے ) ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

عبدالرحمن بن ابولیلی بیان کرتے ہیں : سیدنا عمر ابن خطاب رضی اللہ عنہ پہلی کا چاند دیکھنے کے لئے نکلے ایک سوار سامنے آیا سیدنا عمر رضی اللہ عنہ نے دریافت کیا : تم کہاں سے آ رہے ہو ؟ اس نے جواب دیا : شام سے ، سیدنا عمر رضی اللہ عنہ نے دریافت کیا : کیا تم نے پہلی کا چاند دیکھا ہے ؟ اس نے جواب دیا : جی ہاں ۔ تو سیدنا عمر رضی اللہ عنہ نے کہا: اللہ اکبر پھر اہل ایمان ملے ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی جریر بن ایوب بجلی ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت قریب ہونے کے وقت پہلی کا چاند بڑا ہو جائے گا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالرحمن بن یوسف ہے ” میزان الاعتدال “ میں مصنف نے اس کے حوالے سے یہ حدیث نقل کی ہے ، اور یہ بات بیان کی ہے ۔ یہ مجہول ہے ۔ ( علامہ ہیثمی فرماتے ہیں : ) میں یہ کہتا ہوں : قیامت کی نشانیوں سے متعلق باب میں سیدنا انس رضی اللہ عنہ کے حوالے سے منقول حدیث آگے آئے گی ۔

عبدالرحمن بن ابولیلیٰ نے سیدنا براء رضی اللہ عنہ کا یہ بیان نقل کیا ہے میں سیدنا عمر بن خطاب رضی اللہ عنہ کے پاس تھا ایک شخص ان کے پاس آیا اور اس نے بتایا : میں نے پہلی کا یعنی شوال کا چاند دیکھ لیا ہے ، تو سیدنا عمر رضی اللہ عنہ نے فرمایا : اے لوگو ! عیدالفطر کرو ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی عبدالاعلیٰ ثعلبی ہے ۔ امام نسائی رحمہ اللہ فرماتے ہیں یہ قوی نہیں ہے ، البتہ اس کی حدیث کو نوٹ کیا جائے گا ائمہ نے اسے ” ضعیف“ قرار دیا ہے ۔

سیدنا انس رضی اللہ عنہ بیان کرتے ہیں : کچھ لوگوں نے نبی اکرم صلی اللہ علیہ وسلم کے سامنے پہلی کا چاند یعنی شوال کا چاند دیکھنے کے بارے میں گواہی دی تو نبی اکرم صلی اللہ علیہ وسلم نے لوگوں کو یہ حکم دیا کہ وہ عیدالفطر کریں اور اگلے دن عید کی نماز کے لئے جائیں ۔
یہ روایت امام بزار نے نقل کی ہے ۔ اس کے رجال ” صحیح “ کے رجال ہیں البتہ امام بزار فرماتے ہیں درست یہ ہے کہ
یہ روایت ” مرسل “ ہے ۔

سیدنا ابومسعود رضی اللہ عنہ فرماتے ہیں : تیس دن مکمل ہونے پر لوگوں نے روزہ رکھا ہوا تھا دو آدمی آئے اور ان دونوں نے یہ گواہی دی کہ گزشتہ دن ان دونوں نے پہلی کا چاند دیکھ لیا تھا ، تو نبی اکرم صلی اللہ علیہ وسلم نے لوگوں کو حکم دیا کہ وہ عیدالفطر کریں ۔
یہ روایت امام طبرانی نے معجم کبیر میں نقل کی ہے ۔ وہ فرماتے ہیں اس حدیث کے بارے میں یہ کہنا کہ یہ سیدنا ابومسعود رضی اللہ عنہ سے منقول ہے یہ بات صرف اسحاق بن اسماعیل بن طالقانی نے بیان کی ہے ۔ ( علامہ ہیثمی فرماتے ہیں : ) میں یہ کہتا ہوں : یہ راوی ثقہ ہے ۔