مجمع الزوائد ومنبع الفوائد

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کفن ( میت کے ) پورے مال میں سے دیا جائے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن ہارون فروی ہے ، اور وہ ضعیف ہے ۔

سیدنا علی رضی اللہ عنہ فرماتے ہیں : نبی اکرم صلی اللہ علیہ وسلم کو سات کپڑوں میں کفن دیا گیا تھا ۔
یہ روایت امام أحمد نے نقل کی ہے ، اور اس کی سند حسن ہے ، اور اسے امام بزار نے بھی نقل کیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کو دو چادروں میں اور ایک نجرانی چادر میں کفن دیا گیا تھا ۔
یہ روایت امام بزار نے نقل کی ہے ، اور اس کے رجال ” صحیح“ کے رجال ہیں ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم کو تین سفید کپڑوں میں کفن دیا گیا تھا ایک تہبند تھا اور ایک لفافہ تھا سیدنا عمر رضی اللہ عنہ کو دو کپڑوں میں کفن دیا گیا تھا
یہ روایت امام بزار نے نقل کی ہے ۔ اس کی سند میں ایک راوی ناصح محلمی ہے ، اور وہ ضعیف ہے ۔

سیدنا ابوہریرہ رضی اللہ عنہ کے بارے میں یہ بات منقول ہے ۔ انہوں نے فرمایا : جب میں مر جاؤں تو تم مجھے قمیص نہ پہنانا کیونکہ میں نے نبی اکرم صلی اللہ علیہ وسلم کو دیکھا تھا نہ تو آپ کو قمیص پہنائی گئی تھی اور نہ ہی عمامہ باندھا گیا تھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی خالد بن یزید عمری ہے ، اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کو تین کپڑوں میں کفن دیا گیا تھا جن میں سے ایک قمیص تھی ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم کو تین کپڑوں میں کفن دیا گیا تھا ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی محمد بن قاسم اسدی ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم کو تین کپڑوں میں کفن دیا گیا تھا ایک صنعانی چادر تھی اور دو حبرہ چادریں تھیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راؤی قعیب بن محرز ہے میں نے کسی کو اس کا ذکر کرتے ہوئے نہیں پایا ہے ۔

سیدنا عبداللہ بن مغفل رضی اللہ عنہ کے بارے میں یہ بات منقول ہے : انہوں نے فرمایا : جب میں مر جاؤں تو میرے غسل کے پانی میں کافور ملا دینا اور مجھے دو چادروں اور ایک قمیص میں کفن دینا کیونکہ نبی اکرم صلی اللہ علیہ وسلم نے ایسا کیا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی صدقہ بن موسیٰ ہے ، اور اس کے بارے میں کلام کیا گیا ہے ۔

ابواسحاق بیان کرتے ہیں : میں نے آل محمد سے دریافت کیا : جن میں ابن نوفل بھی موجود تھے کہ کس چیز میں نبی اکرم صلی اللہ علیہ وسلم کو کفن دیا گیا تھا ، تو انہوں نے جواب دیا : ایک سرخ حلے میں ، جس میں قمیص شامل نہیں تھی اور آپ کی قبر میں ان لوگوں کی ایک چادر کا ٹکڑا رکھا گیا تھا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

امام طبرانی نے ان کے حوالے سے ایک اور روایت میں یہ الفاظ نقل کیے ہیں : وہ بیان کرتے ہیں : میں بنوعبدالمطلب کے ایک حلقے میں آیا میں نے ان کے بزرگوں سے دریافت کیا : نبی اکرم صلی اللہ علیہ وسلم کو کتنے کپڑوں میں کفن دیا گیا تھا ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔

سیدنا عبداللہ بن عباس رضی اللہ عنہما بیان کرتے ہیں : جب سیدنا حمزہ بن عبدالمطلب رضی اللہ عنہ کو قتل کیا گیا تو ان کے جسم پر دھاری دار چادر تھی ۔ سیدنا علی رضی اللہ عنہ نے انہیں قبر میں داخل کیا تھا جب وہ اُن کے سر کو ڈھانپتے تھے تو پاؤں ظاہر ہو جاتے تھے ، اور جب وہ ان کے پاؤں کو ڈھانپتے تھے تو سر ظاہر ہو جاتا تھا انہوں نے اس بارے میں نبی اکرم صلی اللہ علیہ وسلم سے دریافت کیا ، تو نبی اکرم صلی اللہ علیہ وسلم نے انہیں یہ ہدایت کی کہ وہ ان کے سر کو ڈھانپ دیں اور علجان درخت کے کچھ پتے لے کر ان کے پاؤں پر ڈال دیں ۔
یہ روایت امام طبرانی نے معجم کبیر میں ایوب کی حکم بن عتیبہ سے نقل کردہ روایت کے طور پر نقل کی ہے ۔ ایوب نامی شخص سے میں واقف نہیں ہوں کہ یہ کون ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : غزوہ اُحد کے موقع پر سیدنا حمزہ رضی اللہ شہید ہو گئے ان کے ساتھ انصار سے تعلق رکھنے والے ایک صاحب بھی شہید ہوئے سیدہ صفیہ بنت عبدالمطلب رضی اللہ عنہما دو کپڑے لے کے آئی تھیں تاکہ ان میں سیدنا حمزہ رضی اللہ عنہ کو کفن دیا جائے انصاری کے لئے کوئی کفن نہیں تھا ، تو نبی اکرم صلی اللہ علیہ وسلم نے ان دو کپڑوں کے دو حصے کیے اور ان دونوں صاحبان میں سے ہر ایک کو ایک ایک کپڑے میں کفن دیا گیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عثمان جزری شاہد ہے میں نے کسی کو اس کے حالات بیان کرتے ہوئے نہیں پایا ہے ۔ اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : غزوہ اُحد کے موقع پر نبی اکرم صلی اللہ علیہ وسلم کا گزر سیدنا حمزہ رضی اللہ عنہ ( کی میت ) کے پاس سے ہوا ان کی لاش کاٹ دی گئی تھی اور مثلہ کر دیا گیا تھا ۔ نبی اکرم صلی اللہ علیہ وسلم نے ارشاد فرمایا : اگر اس بات کا اندیشہ نہ ہوتا کہ سیدہ صفیہ رضی اللہ عنہما پریشان ہو جائیں گی میں ان کو یوں ہی رہنے دیتا یہاں تک کہ اللہ تعالیٰ حشر کے دن انہیں درندوں اور پرندوں کے پیٹوں میں سے اٹھا لیتا انہیں ایک چادر میں کفن دیا گیا جب ان کا سر ڈھانپا جاتا تھا ، تو پاؤں ظاہر ہو جاتے تھے ، اور جب پاؤں ڈھانپے جاتے تھے تو سر ظاہر ہو جاتا تھا ، تو لوگوں نے ان کے سر کو ڈھانپ دیا ۔
یہ روایت امام ابویعلیٰ نے نقل کی ہے ۔ امام ابوداؤد نے اس کا کچھ حصہ ذکر کیا ہے ، جس میں کفن کا ذکر نہیں ہے ۔ اس روایت کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اپنے مردوں کے چہرے ڈھانپ دیا کرو اور یہودیوں کے ساتھ مشابہت اختیار نہ کرو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

قیس قبیلے سے تعلق رکھنے والے ایک صاحب اپنے والد کا یہ بیان نقل کرتے ہیں : نبی اکرم صلی اللہ علیہ وسلم ہمارے ہاں تشریف لائے ہمارے پاس ایک جوان اونٹنی تھی جس پر ق ابوپانا مشکل تھا نبی اکرم صلی اللہ علیہ وسلم اس کے قریب ہوئے آپ نے اس کے تھن پر ہاتھ پھیرا تو وہ دودھ دینے کے لئے تیار ہو گئی آپ نے دودھ دوہ لیا راوی بیان کرتے ہیں : جب میرے والد کا انتقال ہوا تو میں نے ان کے کفن کو باندھ دیا اور میں نے سلاۃ ( وہ جھلی نما چیز کہ جانور کا بچہ ماں کے پیٹ میں اس کے اندر ہوتا ہے ) لے لیا ، اور میں نے اس کے ذریعے کفن کو باندھ دیا ، تو نبی اکرم صلی اللہ علیہ وسلم نے ارشاد فرمایا : تم ” سلی“ کے ذریعے اپنے باپ کو عذاب نہ دو ! پھر نبی اکرم صلی اللہ علیہ وسلم نے ان کے سینے پر لعاب دہن ڈالا ، یہاں تک کہ میں نے ان کے سینے پر آپ کے لعاب دہن کا رضاب ( باریک اور پتلا مواد ) دیکھا ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے ، جس کا نام بیان نہیں کیا گیا ہے اس کے بقیہ رجال ثقہ ہیں ۔

بنت اہبان بیان کرتی ہیں : ان کے والد نے ان کے اہل خانہ کو یہ حکم دیا تھا کہ انہیں کفن دیتے ہوئے انہیں قمیص نہ پہنائیں وہ خاتون بیان کرتی ہیں : ہم نے انہیں ( کفن میں ) قمیص پہنا دی اگلے دن وہ قمیص کھونٹی پر لٹکی ہوئی تھی ۔
یہ روایت امام أحمد نے اسی طرح نقل کی ہے ۔

امام طبرانی نے معجم کبیر میں یہ روایت نقل کی ہے ۔ راوی بیان کرتے ہیں : عدیسہ بنت اہبان بیان کرتی ہیں : جب میرے والد کی وفات کا وقت قریب آیا تو انہوں نے فرمایا : مجھے کسی سلے ہوئے کپڑے میں کفن نہ دینا وہ خاتون بیان کرتی ہیں : جب انہیں غسل دے دیا گیا تو لوگوں نے مجھے پیغام بھیجا کہ تم کفن بھجوا دو میں نے ان کی طرف کفن بھجوایا لوگوں نے کہا: قمیص کہاں ہے ؟ میں نے کہا: میرے والد نے مجھے اس بات سے منع کیا ہے کہ میں انہیں سلی ہوئی قمیص میں کفن دوں وہ خاتون بیان کرتی ہیں : میں نے درزی کی طرف پیغام بھیجا میرے والد کی ایک قمیص درزی کے پاس تھی وہ لائی گئی اور انہیں پہنا دی گئی اور پھر ان کی میت کو لے گئے میں نے دروازہ بند کیا ، اور ان کے پیچھے گئی جب میں واپس آئی تو قمیص گھر میں موجود تھی جن لوگوں نے میرے والد کو غسل دیا تھا ۔ میں نے پیغام بھیجا اور میں نے دریافت کیا : تم نے انہیں قمیص میں کفن دیا تھا ؟ انہوں نے جواب دیا : جی ہاں ۔ میں نے دریافت کیا : کیا وہ یہی ہے ۔ انہوں نے جواب دیا : جی ہاں ۔
اس روایت کی سند میں ایک راوی ابوعمرو قسملی ہے حسینی فرماتے ہیں یہ معروف نہیں ہے ۔

زہری بیان کرتے ہیں : جب سیدنا سعد بن ابی وقاص رضی اللہ عنہ کی موت کا وقت قریب آیا تو انہوں نے ایک پرانا اونی جبہ منگوایا اور ارشاد فرمایا : تم لوگ مجھے اس میں کفن دے دینا کیونکہ غزوہ بدر کے موقع پر یہ پہن کر میں نے مشرکین کا سامنا کیا تھا اور میں نے اسے اس وقت کے لئے سنبھال کے رکھا ہوا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں تاہم زہری نے سیدنا سعد بن ابی وقاص رضی اللہ عنہ کا زمانہ نہیں پایا ہے ۔

صلہ بن زفر بیان کرتے ہیں : سیدنا حذیفہ بن یمان رضی اللہ عنہ کو دو کپڑوں میں کفن دیا گیا انہوں نے مجھے اور سیدنا ابومسعود رضی اللہ عنہ کو بھجوایا ہم نے ان کے لئے کفن خریدا ہم نے تین سو درہم کے عوض میں پٹی کا حلہ خریدا انہوں نے دریافت کیا : تم دونوں مجھے دکھاؤ کہ تم دونوں نے میرے لئے کیا خریدا ہے ؟ ہم نے وہ انہیں دکھایا تو انہوں نے فرمایا : یہ میرے کفن کے لئے مناسب نہیں ہے میرے لئے تو سفید رنگ کی دو چادریں کافی ہیں جن میں کوئی قمیص نہ ہو تھوڑی ہی دیر گزرنے کے بعد مجھے یا تو ان دونوں ( یعنی سادی چادروں ) سے زیادہ بہتر چیز مل جائے گی یا ان دونوں سے زیادہ بری چیز ملے گی راوی کہتے ہیں : تو ہم نے ان کے لئے دو سفید چادریں خرید لیں ۔
یہ روایت امام طبرانی نے معجم کبیر میں نقل کی ہے ۔ ایک اور روایت میں یہ الفاظ زائد ہیں : ہم نے سیدنا ابومسعود رضی اللہ عنہ سے دریافت کیا : سیدنا حذیفہ رضی اللہ عنہ نے مرتے وقت کیا کہا: تھا انہوں نے جواب دیا : انہوں نے یہ کہا: تھا : میں اس چیخ و پکار سے اللہ کی پناہ مانگتا ہوں جو جہنم کی طرف لے جائے تم میرے لئے دو کپڑے خرید لو ۔ اس کے بعد راوی نے حسب سابق حدیث ذکر کی ہے ، اور اس کے رجال ثقہ ہیں ۔

علی بن ابوطلحہ بیان کرتے ہیں : سیدہ میمونہ رضی اللہ عنہا کو معصفر ( زرد رنگ سے رنگی ہوئی ) قمیص میں کفن دیا گیا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی اسماعیل بن عیاش ہے ، اور اس کے بارے میں کلام کیا گیا ہے ۔