مجمع الزوائد ومنبع الفوائد

سیدنا عبداللہ بن بحینہ رضی اللہ عنہ جو نبی اکرم صلی اللہ علیہ وسلم کے اصحاب میں سے ہیں وہ نبی اکرم صلی اللہ علیہ وسلم کے بارے میں یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : کیا تم میں سے کسی نے میرے ساتھ تلاوت کی ہے لوگوں نے عرض کی : جی ہاں ! نبی اکرم صلی اللہ علیہ وسلم نے فرمایا : میں بھی سوچ رہا تھا کہ کیا وجہ ہے کہ قرآن میں میرے ساتھ مقابلہ کیا جا رہا ہے ، ( راوی بیان کرتے ہیں ) پھر لوگ نبی اکرم صلی اللہ علیہ وسلم کی اقتداء میں تلاوت کرنے سے باز آ گئے جب آپ صلی اللہ علیہ وسلم نے یہ بات ارشاد فرمائی :
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے امام أحمد کے رجال ” صحیح “ کے رجال ہیں اس روایت پر کلام اس کے بعد والی حدیث کے بعد آئے گا ۔

سیدنا عبداللہ بن مسعود رضی اللہ عنہ بیان کرتے ہیں : پہلے لوگ نبی اکرم صلی اللہ علیہ وسلم کے پیچھے تلاوت کر لیتے تھے نبی اکرم صلی اللہ علیہ وسلم نے ارشاد فرمایا : تم نے مجھ پر قرآن کی تلاوت کو خلط ملط کر دیا ہے ۔
یہ روایت امام أحمد اور امام ابویعلیٰ اور امام بزار نے نقل کی ہے امام أحمد کے رجال ” صحیح“ کے رجال ہیں ۔

سیدنا ابن بحینہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک نماز ادا کی جس میں بلند آواز میں تلاوت کی جاتی ہے ، جب آپ صلی اللہ علیہ وسلم نماز پڑھ کے فارغ ہوئے تو آپ نے دریافت کیا : کیا تم لوگ میرے پیچھے تلاوت کرتے ہو ؟ تو کچھ لوگوں نے عرض کی : ہم نے ایسا کیا ہے ۔ نبی اکرم صلی اللہ علیہ وسلم نے فرمایا : تم ایسا نہ کرو ! میں بھی یہ سوچ رہا تھا کہ کیا وجہ ہے کہ قرآن میں میرا مقابلہ کیا جا رہا ہے راوی بیان کرتے ہیں : تو لوگ ان نمازوں میں بلند آواز میں قرأت کرنے سے باز آ گئے جن میں نبی اکرم صلی اللہ علیہ وسلم بلند آواز میں تلاوت کیا کرتے تھے ۔
یہ روایت امام بزار نے مکمل روایت کے طور پر نقل کی ہے ، جب کہ امام طبرانی نے معجم کبیر اور معجم اوسط میں اختصار کے ساتھ نقل کی ہے ، اس کے رجال ” صحیح “ کے رجال ہیں البتہ امام بزار نے یہ بات کہی ہے ۔ ابن شہاب کے بھتیجے نے اس روایت میں غلطی کی ہے ، جو یہ کہا: ہے کہ یہ سیدنا ابن بحینہ رضی اللہ عنہ سے منقول ہے حالانکہ معمر اور ابن عیینہ نے اسے زہری کے حوالے سے ابن اکیمہ کے حوالے سے سیدنا ابوہریرہ رضی اللہ عنہ سے روایت کیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب کو نماز پڑھائی جب آپ نے نماز مکمل کی تو آپ نے لوگوں کی طرف رخ کیا اور ارشاد فرمایا : کیا تم لوگ اپنے امام کے پیچھے نماز میں قرأت کرتے ہوا ؟ جب امام قرأت کر رہا ہو ؟ لوگ خاموش رہے ۔ نبی اکرم صلی اللہ علیہ وسلم نے تین مرتبہ یہ بات ارشاد فرمائی تو ایک شخص نے یا کچھ لوگوں نے یہ عرض کی : ہم ایسا کرتے ہیں ۔ نبی اکرم صلی اللہ علیہ وسلم نے ارشاد فرمایا : تم ایسا نہ کرو تم میں سے کوئی ایک دل میں سورت فاتحہ پڑھ لیا کرے ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عمرو رضی اللہ عنہ بیان کرتے ہیں : ہم لوگوں نے نبی اکرم صلی اللہ علیہ وسلم کی اقتداء میں نماز ادا کی جب آپ نے نماز ختم کی تو آپ نے دریافت کیا : تم لوگ جب نماز میں تھے تو کیا میرے ساتھ قرأت کر رہے تھے ؟ ہم نے عرض کی : جی ہاں ! نبی اکرم صلی اللہ علیہ وسلم نے فرمایا : تم ایسا نہ کرو البتہ سورت فاتحہ کا معاملہ مختلف ہے ۔
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی مسلمہ بن علی ہے ، اور وہ ” ضعیف “ ہے ۔

سیدنا ابودرداء رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے دریافت کیا : اس نے عرض کی : یا رسول اللہ ! کیا ہر نماز میں قرأت کی جائے گی نبی اکرم صلی اللہ علیہ وسلم نے ارشاد فرمایا : جی ہاں ! حاضرین میں سے ایک صاحب بولے : کیا یہ واجب ہے ۔ نبی اکرم صلی اللہ علیہ وسلم نے فرمایا : میں یہ سمجھتا ہوں کہ جب امام تلاوت کر رہا ہو تو وہ کافی ہو گی ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ، جو یہاں تک ہے ” یہ واجب ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا جہر بیان کرتے ہیں : میں نے نبی اکرم صلی اللہ علیہ وسلم کے پیچھے تلاوت کی جب آپ نے نماز ختم کی تو آپ نے فرمایا : اے جہر تم اپنے پروردگار کو سناؤ تم مجھے نہ سناؤ ۔
یہ روایت امام طبرانی نے معجم کبیر میں نقل کی ہے عبداللہ بن جہر کا ذکر کرتے ہوئے میں نے کسی کو نہیں پایا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : انہوں نے فرمایا : اے فلاں تم امام کے پیچھے تلاوت نہ کرو البتہ اگر امام کوئی ایسا ہو جو تلاوت نہ کر رہا ہو تو معاملہ مختلف ہے
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ابووائل بیان کرتے ہیں : ایک شخص سیدنا عبداللہ بن مسعود رضی اللہ عنہ کے پاس آیا اور بولا: اے ابوعبدالرحن کیا میں امام کے پیچھے قرأت کروں گا ، تو انہوں نے فرمایا : تم قرآن ( کی تلاوت ) کے لئے خاموش رہو کیونکہ نماز میں مشغولیت ہوتی ہے امام تمہارے لئے کفایت کر جائے گا “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

ابراہیم نخعی بیان کرتے ہیں : سیدنا عبداللہ بن مسعود رضی اللہ عنہ امام کے پیچھے تلاوت نہیں کیا کرتے تھے ابراہیم نخعی اس کے مطابق فتوی دیا کرتے تھے سیدنا عبداللہ بن مسعود رضی اللہ عنہ جب امام ہوتے تھے تو پہلی دو رکعات میں تلاوت کرتے تھے ، اور آخری دو رکعات میں کوئی تلاوت نہیں کرتے تھے
یہ روایت امام طبرانی نے معجم کبیر میں نقل کی ہے ابراہیم نخعی نے سیدنا عبداللہ بن مسعود رضی اللہ عنہ کا زمانہ نہیں پایا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جس شخص کا امام ہو ، تو امام کی قرأت اس کی قرأت شمار ہو گی “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوہارون عبدی ہے ، اور وہ متروک ہے ۔

حمید بن ہلال بیان کرتے ہیں : ہشام بن عامر نماز کے لئے آئے وہ تیزی سے چلتے ہوئے آئے اور نماز میں شامل ہو گئے ان کا سانس پھولا ہوا تھا انہوں نے امام کے پیچھے بلند آواز میں تلاوت شروع کر دی جب انہوں نے نماز مکمل کی تو ان سے کہا: گیا کیا آپ امام کے پیچھے تلاوت کر رہے تھے انہوں نے فرمایا : ہم ایسا کیا کرتے ہیں۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس نے امام کے پیچھے تلاوت کرنی ہو وہ سورت فاتحہ پڑھ لے “ ۔ ( علامہ ہیثمی فرماتے ہیں : ) میں یہ کہتا ہوں : ان کے حوالے سے ” صحیح “ میں ایک حدیث منقول ہے ، جو اس سیاق کے بغیر ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” ہر وہ نماز جس میں سورت فاتحہ کی تلاوت نہ کی جائے وہ نامکمل ہوتی ہے وہ نامکمل ہوتی ہے وہ نامکمل ہوتی ہے “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا عبداللہ بن عمرو نبی اکرم صلی اللہ علیہ وسلم کا یہ فرمان نقل کرتے ہیں : ” ہر وہ نماز جس میں سورت فاتحہ کی تلاوت نہ کی جائے وہ نامکمل ہوتی ہے نامکمل ہوتی ہے نامکمل ہوتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سعید بن سلیمان نشیطی ہے امام ابوزرعہ کہتے ہیں : ہم اللہ تعالیٰ سے سلامتی کا سوال کرتے ہیں یہ قوی نہیں ہے ۔

سیدنا مہران نے نبی اکرم صلی اللہ علیہ وسلم کا یہ فرمان نقل کیا ہے : ” جو شخص اپنی نماز میں سورت فاتحہ نہیں پڑھتا تو وہ نماز نامکمل ہوتی ہے “ ۔
یہ روایت امام طبرانی نے معجم اوسط میں نقل کی ہے وہ بیان کرتے ہیں : سیدنا مہران کے حوالے سے یہ روایت صرف اسی سند کے ساتھ منقول ہے ۔ ( علامہ ہیثمی فرماتے ہیں : ) میں یہ کہتا ہوں : اس کی سند میں ایک جماعت ایسی ہے جن لوگوں میں واقف نہیں ہوں ۔

سیدنا ابوقتادہ رضی اللہ عنہ بیان کرتے ہیں : نبی اکرم صلی اللہ علیہ وسلم نے فرمایا : ” کیا تم لوگ میرے پیچھے تلاوت کرتے ہو لوگوں نے عرض کی : جی ہاں ! نبی اکرم صلی اللہ علیہ وسلم نے فرمایا : تم ایسا نہ کرو البتہ سورت فاتحہ کا معاملہ مختلف ہے “ ۔
یہ روایت امام أحمد نے نقل کی ہے ، اس میں ایک شخص ایسا ہے ، جس کا نام بیان نہیں کیا گیا ۔

نبی اکرم صلی اللہ علیہ وسلم کے اصحاب میں سے ایک صاحب بیان کرتے ہیں : نبی اکرم صلی اللہ علیہ وسلم نے ارشاد فرمایا : شاید تم لوگ اس وقت تلاوت کرتے ہو جب امام تلاوت کر رہا ہو نبی اکرم صلی اللہ علیہ وسلم نے یہ بات تین مرتبہ دریافت کی تو لوگوں نے عرض کی : ہم ایسا کرتے ہیں ۔ نبی اکرم صلی اللہ علیہ وسلم نے ارشاد فرمایا : تم ایسا نہ کرو البتہ کوئی شخص اپنے دل میں سورت فاتحہ پڑھ لیا کرے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

دیہات سے تعلق رکھنے والے ایک صاحب اپنے والد سے روایت نقل کرتے ہیں : ان کے والد نبی اکرم صلی اللہ علیہ وسلم کے پاس اسیر کے طور پر رہے تھے وہ بیان کرتے ہیں : میں نے سیدنا محمد صلی اللہ علیہ وسلم کو یہ ارشاد فرماتے ہوئے سنا ہے : ” وہ نماز قبول نہیں ہوتی جس میں سورت فاتحہ کی تلاوت نہ کی گئی ہو “ ۔ اس کی سند میں ایک راوی ایسا ہے ، جس کا نام بیان نہیں کیا گیا ہے ۔
یہ روایت امام أحمد نے نقل کی ہے ۔

سیدنا ابی بن کعب رضی اللہ عنہ بیان کرتے ہیں : نبی اکرم صلی اللہ علیہ وسلم نے سورت فاتحہ کی تلاوت کی پھر ارشاد فرمایا : تمہارا پروردگار فرماتا ہے اے ابن آدم میں نے تم پر سات آیات نازل کی ہیں جن میں سے تین میرے لئے ہیں ، اور تین تمہارے لئے ہیں ، اور ایک میرے اور تمہارے درمیان ہے جہاں تک ان آیات کا تعلق ہے ، جو میرے لئے ہیں تو وہ یہ ہیں ” ہر طرح کی حمد اللہ تعالی کے لئے مخصوص ہے ، جو تمام جہانوں کا پروردگار ہے بڑا مہربان نہایت رحم کرنے والا ہے قیامت کے دن کا مالک ہے بے شک ہم تیری ہی عبادت کرتے ہیں ، اور تجھ ہی سے مدد مانگتے ہیں “ ۔ ( اللہ تعالی فرماتا ہے : ) تو عبادت تمہاری طرف سے ہو گئی اور مدد میرے ذمہ ہو گی جہاں تک ان آیات کا تعلق ہے ، جو تمہارے لئے ہیں ( تو وہ یہ ہیں ) ” تو ہمیں سیدھے راستے پر چلا ان لوگوں کا راستہ جن پر تو نے انعام کیا نہ کہ ان لوگوں کا جن پر غضب کیا گیا اور نہ ہی گمراہوں کا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن ارقم ہے ، اور وہ متروک ہے ۔