مجمع الزوائد ومنبع الفوائد

سیدنا عبداللہ بن عباس رضی اللہ عنہما کے بارے میں یہ بات منقول ہے : ان سے ( نماز کے دوران تلاوت کرتے ہوئے ) بلند آواز میں بسم الله الرحمنِ الرَّحِیمِ کے بارے میں دریافت کیا گیا تو انہوں نے ارشاد فرمایا : ہم یہ سمجھے تھے کہ یہ دیہاتیوں کا تلاوت کا طریقہ ہے ۔
یہ روایت امام بزار نے نقل کی ہے ، اس کی سند میں ایک راوی ابوسعد بقال ہے وہ ” ثقہ “ ہے ، لیکن تدلیس کرنے والا ہے ، اس نے یہ روایت عنعنہ کے ساتھ نقل کی ہے ، اس روایت کے بقیہ رجال ” صحیح“ کے رجال ہیں ۔

سعید بن یزید بیان کرتے ہیں : میں نے سیدنا انس رضی اللہ عنہ سے دریافت کیا : نبی اکرم صلی اللہ علیہ وسلم ( بلند آواز سے تلاوت کا آغاز ) بِسْمِ اللهِ الرَّحْمَنِ الرَّحِیمِ پڑھ کر کرتے تھے ؟ یا الحمدللہ پڑھ کر کرتے تھے ؟ تو سیدنا انس رضی اللہ عنہ نے فرمایا : تم نے مجھ سے ایک ایسی چیز کے بارے میں سوال کیا ہے کہ تم سے پہلے کسی نے مجھ سے اس بارے میں دریافت نہیں کیا ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

نبی اکرم صلی اللہ علیہ وسلم کی ایک زوجہ محترمہ ، نافع نامی راوی بیان کرتے ہیں : میرا خیال ہے ، اس سے مراد سیدہ حفصہ رضی اللہ عنہا ہیں ، ان زوجہ محترمہ سے نبی اکرم صلی اللہ علیہ وسلم کی تلاوت کے بارے میں دریافت کیا گیا تو انہوں نے فرمایا : تم لوگ اس کی استطاعت نہیں رکھتے ہو ان سے کہا: گیا آپ ہمیں اس کے بارے میں بتا تو دیں راوی بیان کرتے ہیں : تو انہوں نے قرأت کی انہوں نے آرام آرام سے تلاوت کی ۔ راوی بیان کرتے ہیں : پھر ابن ابوملیکہ نے ہمارے سامنے وہ تلاوت سے پہلے الْحَمْدُ لِلَّهِ رَبِّ الْعَالَمِین پڑھا پھر رک گئے الرَّحْمَنِ الرَّحِیمِ پڑھا پھر رک گئے پھر مَالِكِ يَوْمِ الدِّینِ پڑھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

ابراہیم صائغ بیان کرتے ہیں : میں نے مطر الوراق سے سوال کیا میں نے کہا: کیا بسم الله الرحمن الرحيم اور أَعْوذُ بِاللَّهِ مِنَ الشَّيْطَنِ الرَّجِيْمِ ہر رکعت میں پڑھتے اور ہر سورت کے آغاز میں پڑھتے تو انہوں نے بتایا : قتادہ نے محمد بن سرین کے حوالے سے سیدنا عمران بن حصین رضی اللہ عنہ اور سمرہ بن جندب رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” یہ دو خاموشیاں ہیں جو آدمی اپنے من میں کرے گا جب وہ نماز کا آغاز کرے گا ، اور جب وہ دو رکعات کے بعد قعدہ سے اٹھے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ریحان ابوغسان ہے میں اس سے واقف نہیں ہوں ، اس روایت کے بقیہ رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب بسْمِ اللهِ الرَّحْمَنِ الرَّحِيمِ پڑھے تھے تو مشرکین آپ کا مذاق اڑاتے تھے وہ یہ کہتے تھے : کہ سیدنا محمد ( صلی اللہ علیہ وسلم ) یمامہ کے معبود کا ذکر کرتے ہیں کیونکہ مسیلمہ نے اپنا نام الرحمن الرحيم رکھا ہوا تھا جب یہ آیت نازل ہو گئی ، تو نبی اکرم صلی اللہ علیہ وسلم نے یہ حکم دیا کہ اس آیت کو بلند آواز میں نہ پڑھا جائے ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا انس رضی اللہ عنہ بیان کرتے ہیں ۔ نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا عمر رضی اللہ عنہ پست آواز میں بسم الله الرحمن الرحیم پڑھتے تھے ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

ابووائل بیان کرتے ہیں : سیدنا علی رضی اللہ عنہ اور سیدنا عبداللہ بن مسعود رضی اللہ عنہ بسم اللهِ الرَّحْمنِ الرَّحِيمِ بلند آواز میں نہیں پڑھتے تھے اعوذ باللہ اور آمین بھی بلند آواز میں نہیں پڑھتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوسعد بقال ہے وہ ” ثقہ “ اور تدلیس کرنے والا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نماز میں بلند آواز میں بسم الله الرحمن الرحيم پڑھا کرتے تھے ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد اور دیگر حضرات نے نقل کی ہے ، تاہم اس میں بلند آواز میں پڑھنے کا ذکر نہیں ہے -
یہ روایت امام بزار نے نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کو سورت کے اختتام کا پتہ نہیں چلتا تھا یہاں تک کہ بسم الله الرحمن الرحيم نازل ہو گئی جب بسم الله الرحمن الرحیم نازل ہو گئی ، تب یہ بات پتہ چل گئی کہ یہ سورت ختم ہو گئی ہے اور اگلی سورت شروع ہو گئی ہے یا دوسری سورت کا آغاز ہو گیا ہے ( یعنی یہاں لفظ کے بارے میں راوی کو شک ہو گیا ہے ) ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت میں سے صرف ان الفاظ کو نقل کیا ہے : “ آپ کو سورت کے خاتمے کا پتہ نہیں چلتا تھا یہاں تک کہ بسم اللہ الرحمن الرحیم نازل ہو گئی “ ۔
یہ روایت امام بزار نے دو اسناد کے ساتھ نقل کی ہے ان دونوں میں سے ایک کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” الحمد لله رب العالمين سات آیات ہیں جن میں سے ایک بسم الله الرحْمنِ الرَّحِيمِ ہے یہی سبع مثانی ہے ، اور قرآن عظیم ہے یہی اُم القرآن اور فاتحہ الکتاب ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا علی رضی اللہ عنہ اور سیدنا عمار رضی اللہ عنہ بیان کرتے ہیں : نبی اکرم صلی اللہ علیہ وسلم بلند آواز میں بسم الله الرحمن الرحيم پڑھا کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جابر جعفی ہے ، جسے شعبہ ثوری اور زہیر بن معاویہ نے ” ثقہ “ قرار دیا ہے یہ تدلیس کرنے والا ہے لوگوں نے اسے ضعیف کہا: ہے ۔

نافع بیان کرتے ہیں : سیدنا عبداللہ بن عمر رضی اللہ عنہما جب نماز کا آغاز کرتے تھے تو سورت فاتحہ سے پہلے بسم اللہ الرَّحْمنِ الرحیم پڑھتے تھے ، اور اس کے بعد والی سورت سے پہلے بھی بسم اللهِ الرَّحْمَنِ الرَّحِیمِ پڑھتے تھے ، اور یہ بات ذکر کرتے تھے کہ انہوں نے یہ چیز نبی اکرم صلی اللہ علیہ وسلم سے سنی ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن عبداللہ بن عمر العمری ہے ، اور وہ انتہائی ” ضعیف “ ہے ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم مسجد سے باہر نہ جانا جب تک میں تمہیں ایک سورت کی ایک آیت کی تعلیم نہیں دے دیتا جو مجھ سے پہلے سیدنا سلیمان بن داؤد علیہما السلام کے علاوہ اور کسی پر نازل نہیں ہوئی پھر نبی اکرم صلی اللہ علیہ وسلم باہر نکلنے لگے ، یہاں تک کہ آپ دروازے کی چوکھٹ پر پہنچے تو نبی اکرم صلی اللہ علیہ وسلم نے ارشاد فرمایا : تم اپنی تلاوت کا آغاز کس چیز کے ذریعے کرتے ہو میں نے عرض کی : بِسْمِ اللهِ الرَّحْمَنِ الرَّحِیمِ کے ذریعے نبی اکرم صلی اللہ علیہ وسلم نے ارشاد فرمایا : یہی ہے یہی ہے پھر نبی اکرم صلی اللہ علیہ وسلم نے دوسرا پاؤں بھی باہر نکال لیا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالکریم بن ابوالمخارق ہے ، اور وہ اپنے حافظے کی خرابی کی وجہ سے ضعیف ہے ، اس کی سند میں ایسے راوی بھی ہیں جن سے میں واقف نہیں ہوں ۔