مجمع الزوائد ومنبع الفوائد

سیدنا محمد بن عبداللہ بن جحش رضی اللہ عنہ جو نبی اکرم صلی اللہ علیہ وسلم کے سسرالی عزیز ہیں وہ بیان کرتے ہیں : ایک مرتبہ نبی اکرم صلی اللہ علیہ وسلم کا گزر مسجد کے صحن میں سے ایک بوڑھے شخص کے پاس سے ہوا جو احتباء کے طور پر بیٹھا ہوا تھا اور اس نے اپنے زانوں کو کھلا رکھا ہوا تھا تو نبی اکرم صلی اللہ علیہ وسلم نے اس سے فرمایا : اے معمر ! تم اپنے زانوں کو ڈھانپ لو کیونکہ زانوں ستر کا حصہ ہے ۔ یہ روایت امام أحمد نے نقل کی ہے ان کے حوالے سے منقول ایک روایت جو امام أحمد ہی نے نقل کی ہے وہ بیان کرتے ہیں : نبی اکرم صلی اللہ علیہ وسلم کا گزر معمر کے پاس سے ہوا میں نبی اکرم صلی اللہ علیہ وسلم کے ساتھ تھا عمر نے اپنے دونوں زانوں کھلے رکھے ہوئے تھے تو نبی اکرم صلی اللہ علیہ وسلم نے فرمایا : اے معمر ! اپنے زانوں کو ڈھانپ لو کیونکہ دونوں زانوں ستر کا حصہ ہیں ۔
یہ روایت امام طبرانی نے معجم کبیر میں نقل کی ہے ، تاہم انہوں نے پہلی روایت میں یہ الفاظ نقل کیے ہیں : ” بے شک زانوں ستر کا حصہ ہیں “ ۔ امام أحمد کے رجال ” ثقہ “ ہیں ۔

سیدنا جرہد رضی اللہ عنہ اور ان کے علاوہ اسلم قبیلے سے تعلق رکھنے والے کچھ افراد جو پسندیدہ افراد ہیں وہ بیان کرتے ہیں : ایک مرتبہ نبی اکرم صلی اللہ علیہ وسلم کا گزر سیدنا جرہد رضی اللہ عنہ کے پاس سے ہوا سیدنا جرہد رضی اللہ عنہ نے مسجد میں اپنے زانوں کو کھلا رکھا ہوا تھا تو نبی اکرم صلی اللہ علیہ وسلم نے ان سے فرمایا : اے جرہد ! تم اپنے زانوں کو ڈھانپ لو کیونکہ زانوں ستر کا حصہ ہے ۔ ( علامہ ہیثمی فرماتے ہیں : ) میں یہ کہتا ہوں : سیدنا جرہد رضی اللہ عنہ کے حوالے سے منقول حدیث کو امام ابوداؤد اور امام ترمذی نے بھی نقل کیا ہے
یہ روایت امام أحمد نے نقل کی ہے ، اس کی سند میں ایک راوی عبدالرحمن بن ابوزناد ہے ، اور وہ ” ضعیف“ ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی طرف جو پہلی وحی کی گئی اس میں آپ سے یہ کہا: گیا : تم ستر کا خیال رکھو ! اُس کے بعد نبی اکرم صلی اللہ علیہ وسلم کے سر کو کبھی نہیں دیکھا گیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی نضر ابوعمر ہے ، جس کے ضعیف ہونے پر محدثین کا اتفاق ہے ۔

امام ابوجعفر محمد بن علی ( یعنی امام باقر ) فرماتے ہیں : ہم نے سیدنا عبداللہ بن جعفر رضی اللہ عنہ سے کہا: آپ ہمیں وہ حدیث بیان کیجئے جو آپ نے نبی اکرم صلی اللہ علیہ وسلم کی زبانی سنی ہو یا آپ نے نبی اکرم صلی اللہ علیہ وسلم کے حوالے سے وہ چیز دیکھی ہو ، آپ اپنے علاوہ کسی اور کے حوالے سے ہمیں کوئی حدیث بیان نہ کیجئے گا خواہ وہ دوسرا شخص ” ثقہ “ ہی کیوں نہ ہو ، تو سیدنا عبداللہ بن جعفر رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ناف سے لے کر گھٹنوں تک کا درمیانی حصہ ستر ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اصرم بن حوشب ہے ، اور وہ “” “” ضعیف “” “” ہے -

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم بازار میں ٹھہر گئے سیدنا بلال رضی اللہ عنہ آپ صلی اللہ علیہ وسلم کے ساتھ تھے نبی اکرم صلی اللہ علیہ وسلم نے دونوں ٹانگیں کنویں میں لٹکا دیں اور زانوں سے کپڑا ہٹا دیا سیدنا ابوبکر رضی اللہ عنہ آئے انہوں نے اجازت مانگی نبی اکرم صلی اللہ علیہ وسلم نے فرمایا اے بلال ! انہیں اندر آنے کی اجازت دے دو اور اسے جنت کی خوشخبری دے دو سیدنا ابوبکر رضی اللہ عنہ آئے اور نبی اکرم صلی اللہ علیہ وسلم کے دائیں طرف بیٹھ گئے انہوں نے بھی اپنی ٹانگیں کنویں میں لٹکا دیں اور اپنے زانوں سے کپڑا ہٹا دیا پھر سیدنا عمر رضی اللہ عنہ آئے انہوں نے بھی اجازت مانگی تو نبی اکرم صلی اللہ علیہ وسلم نے ارشاد فرمایا : اے بلال ! اسے اجازت دے دو اور اسے جنت کی خوشخبری دے دو وہ اندر آئے اور نبی اکرم صلی اللہ علیہ وسلم کے بائیں طرف بیٹھ گئے انہوں نے بھی اپنی ٹانگیں کنویں میں لٹکا لیں اور زانوں سے کپڑا ہٹا لیا پھر سیدنا عثمان رضی اللہ عنہ آئے انہوں نے اجازت مانگی تو نبی اکرم صلی اللہ علیہ وسلم نے فرمایا : اے بلال ! اسے بھی اجازت دے دو اور جنت کی خوشخبری دے دو لیکن اسے ایک آزمائش کا سامنا کرنا پڑے گا سیدنا عثمان رضی اللہ عنہ اندر آئے تو نبی اکرم صلی اللہ علیہ وسلم کے مد مقابل بیٹھ گئے انہوں نے کنویں میں ٹانگیں لٹکا لیں اور اپنے زانوں سے کپڑا ہٹا لیا ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اس میں کوئی حرج نہیں ہے کہ جب کوئی آدمی کوئی کنیز خریدنے کا ارادہ کرے تو اسے الٹ پلٹ کے دیکھ لے البتہ وہ اس کے ستر کو نہیں دیکھے گا ، جو اس کے گھٹنے سے لے کے اس کے تہبند باندھنے کی جگہ تک کا درمیانی حصہ ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صالح بن حسان ہے ، اور وہ ” ضعیف“ ہے ۔ ابن حبان نے اس کا تذکرہ کتاب ” الثقات “ میں کیا ہے ۔