مجمع الزوائد ومنبع الفوائد

سیدنا مجمع بن جاریہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو جوتوں میں نماز ادا کرتے ہوئے دیکھا ہے ۔
یہ روایت امام أحمد نے نقل کی ہے ، اس کی سند میں ایک راوی یزید بن عیاض ہے ، اور وہ منکر الحدیث ہے ۔

مجمع بن یعقوب نے اہل قباء سے تعلق رکھنے والے ایک لڑکے کے حوالے سے یہ بات نقل کی ہے ، جس نے ایک بزرگ کو پایا ہے ، جو یہ بیان کرتے ہیں : نبی اکرم صلی اللہ علیہ وسلم ہمارے پاس قباء تشریف لائے آپ قلعے کے دروازے میں تشریف فرما ہوئے لوگ آپ کے پاس اکھٹے ہو گئے نبی اکرم صلی اللہ علیہ وسلم نے پینے کے لئے کچھ مانگا ، تو آپ کو پانی دیا گیا میں آپ کے دائیں طرف موجود تھا اور میں لوگوں میں سب سے کم سن تھا نبی اکرم صلی اللہ علیہ وسلم نے وہ پانی میری طرف بڑھایا میں نے پی لیا مجھے یہ بات یاد ہے کہ نبی اکرم صلی اللہ علیہ وسلم نے ہمیں نماز پڑھائی تھی تو آپ نے جوتے پہنے ہوئے تھے آپ نے انہیں اتارا نہیں تھا ۔
یہ روایت امام أحمد نے نقل کی ہے انہوں نے اس صحابی کا نام سیدنا عبداللہ بن ابوحبیبہ رضی اللہ عنہ نقل کیا ہے ایک اور روایت میں بھی اسی طرح ہے یہ روایت امام طبرانی نے معجم کبیر میں نقل کی ہے امام أحمد کے رجال کی توثیق کی گئی ہے ، اور امام بزار نے اسے مختصر روایت کے طور پر نقل کیا ہے : ” نبی اکرم صلی اللہ علیہ وسلم نے جوتوں میں نماز ادا کی “ ۔ وہ فرماتے ہیں : ہمارے علم کے مطابق ابن ابوحبیبہ - کے حوالے سے صرف یہ روایت منقول ہے ۔

زیاد حارثی بیان کرتے ہیں : میں نے ایک شخص کو سیدنا ابوہریرہ رضی اللہ عنہ سے یہ سوال کرتے ہوئے سنا : آپ ہی وہ فرد ہیں جو لوگوں کو اس بات سے منع کرتے ہیں کہ وہ جوتوں میں نماز ادا کریں سیدنا ابوہریرہ رضی اللہ عنہ نے فرمایا : جی ہاں ! اس حرمت کے پروردگار کی قسم ! جی ہاں ! اس حرمت کے پروردگار کی قسم جی ہاں ! اس حرمت کے پروردگار کی قسم میں نے سیدنا محمد صلی اللہ علیہ وسلم کو اس مقام کی طرف رُخ کر کے جوتوں میں نماز ادا کرتے ہوئے دیکھا ہے ، جب آپ نے نماز مکمل کی تو آپ نے جوتے پہنے ہوئے تھے ۔
یہ روایت امام أحمد نے نقل کی ہے امام بزار نے اسے اختصار کے ساتھ نقل کیا ہے ، اس کے رجال ” ثقہ “ ہیں صرف زیاد بن اوبر حارثی کا معاملہ مختلف ہے کیونکہ میں نے کسی شخص کو اس کے حالات بیان کرتے ہوئے نہیں پایا کہ کسی نے اسے ” ثقہ “ یا ضعیف قرار دیا ہو ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کھڑے ہو کر ، بیٹھ کر ، جوتا پہنے بغیر ، جوتا پہن کر ( ہر طریقے سے ) نماز ادا کر لیتے تھے ، اور آپ ( نماز سے فارغ ہونے کے بعد ) دائیں طرف یا بائیں طرف ( یعنی کسی بھی طرف سے ) اُٹھ جایا کرتے تھے ۔
یہ روایت امام أحمد نے نقل کی ہے ، اس کی سند میں ایک راوی زیاد حارثی ہے ، جس کے بارے میں کلام پہلے گزر چکا ہے ۔

حمید بن ہلال عدوی بیان کرتے ہیں : مجھے اس شخص نے یہ بات بتائی ہے ، جس نے ایک دیہاتی کو یہ بیان کرتے ہوئے سنا : میں نے نبی اکرم صلی اللہ علیہ وسلم کو دیکھا آپ نماز ادا کر رہے تھے آپ نے گائے کی کھال کے جوتے پہنے ہوئے تھے آپ نے اپنے بائیں طرف تھوک دیا اور پھر جس جگہ پر آپ نے تھوکا تھا آپ نے اپنے جوتے سے اسے مل دیا ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ” ثقہ “ ہیں ۔

عطاء نے ، بنوشیبہ سے تعلق رکھنے والے ایک صاحب کے حوالے سے یہ بات نقل کی ہے ، جو بڑے عمر رسیدہ شخص تھے وہ بیان کرتے ہیں : میں نے نبی اکرم صلی اللہ علیہ وسلم کو اس مقام کے پاس نماز ادا کرتے ہوئے دیکھا آپ نے سبتی جوتے پہنے ہوئے تھے ۔
یہ روایت امام طبرانی نے نقل کی ہے ، اس کی سند میں ایک راوی محمد بن قاسم اسدی ہے ، اور یہ دو افراد ہیں ، اور ان دونوں کو ” ثقہ “ قرار دیا گیا ہے ان میں سے ایک میں زیادہ ضعف پایا جاتا ہے ، اس روایت کے بقیہ رجال ” ثقہ “ ہیں ۔

سیدنا علی بن ابوطالب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” نماز کی زینت جوتے ہیں “ ۔
یہ روایت امام ابویعلیٰ نے نقل کی ہے ، اس کی سند میں ایک راوی محمد بن حجاج لخمی ہے ، اور وہ کذاب ہے ۔

سیدنا ابوبکرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو جوتوں میں نماز ادا کرتے ہوئے دیکھا ہے ۔
یہ روایت امام ابویعلیٰ اور امام بزار نے نقل کی ہے ، اس کی سند میں ایک راوی بحر بن مرار ہے ، جو ان افراد میں سے ایک ہے ، جو اختلاط کا شکار ہو گئے تھے یحییٰ بن معین نے اسے ” ثقہ “ قرار دیا ہے امام ابویعلیٰ کی سند میں ایک راوی عبدالرحمن بن عثمان ابوبحر ہے ، جسے امام أحمد اور ایک جماعت نے ضعیف قرار دیا ہے یحیی بن سعید القطان اس کے بارے میں اچھی رائے رکھتے تھے ، اور اس کے حوالے سے حدیث روایت کرتے تھے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یہودیوں کے برخلاف کرو اور موزوں اور جوتوں میں نماز ادا کر لو کیونکہ وہ لوگ جوتوں اور موزوں میں نماز ادا نہیں کرتے ہیں “ ۔
یہ روایت امام بزار نے نقل کی ہے ۔

«»ان صحابی کے حوالے سے امام طبرانی نے معجم اوسط میں یہ بات نقل کی ہے : نبی اکرم صلی اللہ علیہ وسلم نے جوتوں اور موزوں میں : نماز ادا کی ہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا صرف یہ حصہ منقول ہے کہ آپ نے جوتوں میں نماز ادا کی ہے ان دونوں احادیث کا مدار عمر بن نبهان نامی راوی پر ہے ، اور وہ ” ضعیف “ ہے امام ابویعلیٰ نے اس روایت میں سے صرف موزوں میں نماز ادا کرنے والا حصہ نقل کیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے جوتوں میں نماز ادا کی تھی ۔
یہ روایت امام بزار نے نقل کی ہے امام طبرانی نے معجم کبیر میں نقل کی ہے ، اس کی سند میں ایک راوی نضر ابوعمر ہے ، اور وہ انتہائی ” ضعیف“ ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : نماز کی تکمیل میں یہ بات شامل ہے کہ جوتے پہن کر نماز ادا کی جائے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی علی بن عاصم ہے لوگوں نے اس کے بارے میں کلام کیا ہے جیسا کہ مزی نے خطیب کے حوالے سے یہ بات نقل کی ہے ۔

سیدنا فیروز دیلمی رضی اللہ عنہ بیان کرتے ہیں : ثقیف قبیلے کا وفد نبی اکرم صلی اللہ علیہ وسلم کی خدمت میں حاضر ہوا وہ لوگ بیان کرتے ہیں : ہم نے نبی اکرم صلی اللہ علیہ وسلم کو برابر کے جوتے پہن کر نماز ادا کرتے ہوئے دیکھا ،
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے نماز ادا کی آپ کے جوتوں پر مٹی کا نشان موجود تھا آپ نے چادر اوڑھی ہوئی تھی اور آپ اس بات سے بچنے کی کوشش کر رہے تھے کہ مٹی چادر پر لگے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن عثمان ہے ، اور وہ ” ضعیف“ ہے ۔

سیدنا ہرماس بن زیاد باہلی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو جوتے پہن کر نماز ادا کرتے ہوئے دیکھا ہے ۔
یہ روایت امام طبرانی نے معجم اوسط اور معجم کبیر میں نقل کی ہے ، اور یہ روایت ” ضعیف “ ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ہمیں نماز پڑھائی تو آپ نے جوتے اتار دیے تو ہم نے بھی جوتے اتار دیے جب آپ نے نماز مکمل کی تو آپ نے دریافت کیا : تم لوگوں نے اپنے جوتے کیوں اتار دیے تھے ؟ لوگوں نے عرض کی : ہم نے آپ کو دیکھا کہ آپ نے جوتے اتارے ہیں تو ہم نے بھی اتار دیے نبی اکرم صلی اللہ علیہ وسلم نے ارشاد فرمایا : میں ان سے اُکتا گیا تھا ( یعنی تھک گیا تھا ) ۔
یہ روایت امام طبرانی نے نقل کی ہے ، اس کی سند میں ایک راوی محمد بن عبیداللہ عرزمی ہے ، اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم جوتے پہن کر نماز ادا کر لیتے تھے ۔
یہ روایت امام طبرانی نے معجم اوسط میں نقل کی ہے امام طبرانی کے استاد محمد بن عبدالرحمن ازرق کے علاوہ اس کے تمام رجال ” ثقہ “ ہیں ، میں اس شخص سے واقف نہیں ہوں ۔

سیدنا ابوبکرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص نماز ادا کرتے ہوئے جوتے اتارے تو وہ اتار کر دائیں طرف نہ رکھے ورنہ وہ گناہ گار ہو گا ، اور اپنے پیچھے بھی نہ رکھے ورنہ اس کے ذریعے اپنے ساتھی کو گناہگار کرے گا وہ انہیں اتار کر دونوں گھٹنوں کے درمیان رکھ لے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی زیاد جصاص ہے ، اسے یحیی بن معین اور ابن مدینی اور دیگر حضرات نے ضعیف قرار دیا ہے ۔ ابن حبان نے اس کا تذکرہ کتاب ” الثقات“ میں کیا ہے ۔

سیدنا اوس بن اوس رضی اللہ عنہ بیان کرتے ہیں : میں پندرہ دن نبی اکرم صلی اللہ علیہ وسلم کے پاس ٹھہرا رہا میں نے آپ کو نماز ادا کرتے ہوئے دیکھا آپ نے جوتے پہنے ہوئے ہوتے تھے ، اور میں نے آپ کو دیکھا کہ آپ دائیں طرف بھی تھوک دیتے تھے ، اور بائیں طرف بھی تھوک دیتے تھے ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت میں سے صرف جوتے پہن کر نماز ادا کرنے والا حصہ نقل کیا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو کھڑے ہو کر اور بیٹھ کر دونوں طرح سے ) پیتے ہوئے دیکھا ہے ، جوتا پہن کر اور جوتا پہنے بغیر نماز ادا کرتے ہوئے اور دائیں طرف اور بائیں طرف ( یعنی دونوں طرف ) تھوکتے ہوئے دیکھا ہے ۔
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے لوگوں کو نماز پڑھاتے ہوئے اپنے جوتے اتار دیے جب لوگوں کو یہ بات محسوس ہوئی ، تو انہوں نے بھی اپنے جوتے اتار دیے جب آپ نماز سے فارغ ہوئے تو آپ لوگوں کی طرف متوجہ ہوئے اور ارشاد فرمایا : فرشتہ میرے پاس آیا اور اس نے مجھے یہ بتایا : میرے جوتوں پر گندگی لگی ہوئی ہے ، جب کوئی شخص مسجد میں آئے تو وہ اپنا جوتا پلٹ کر دیکھ لے اگر اسے ان میں سے کوئی چیز نظر آئے تو انہیں پونچھ لے اور پھر اس میں نماز ادا کر لے ۔
یہ روایت امام بزار نے اور امام طبرانی نے معجم اوسط میں نقل کی ہے انہوں نے یہ الفاظ نقل کیے ہیں : ” پھر وہ ان دونوں میں نماز ادا کر لے یا اگر اسے مناسب لگے ، تو انہیں اتار دے “ ۔ ان دونوں کی سند میں ایک راوی عباد بن کثیر بصری ہے ، جس نے مکہ میں رہائش اختیار کی تھی اور وہ ” ضعیف“ ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے جوتے اتار دیے تو آپ کے پیچھے موجود لوگوں نے بھی جوتے اتار دیے نبی اکرم صلی اللہ علیہ وسلم نے دریافت کیا : تم لوگوں نے اپنے جوتے کیوں اتارے ہیں ؟ لوگوں نے عرض کی : ہم نے آپ کو دیکھا کہ آپ نے اتارے ہیں تو ہم نے بھی اتار دیے ہیں ۔ نبی اکرم صلی اللہ علیہ وسلم نے ارشاد فرمایا : جبرائیل نے مجھے یہ بتایا ہے کہ ان میں گندگی لگی ہوئی تھی میں نے اس وجہ سے انہیں اتار دیا تھا تم لوگ اپنے جوتے نہ اتارو ! راوی بیان کرتے ہیں : ابراہیم نخعی فرماتے ہیں : لوگ اپنے جوتے نہیں اتارا کرتے تھے راوی بیان کرتے ہیں : میں نے ابراہیم نخعی کو جوتے پہن کر نماز ادا کرتے ہوئے دیکھا ہے ۔
یہ روایت امام بزار نے اور امام طبرانی نے معجم اوسط اور معجم کبیر میں نقل کی ہے امام بزار بیان کرتے ہیں : ہمارے علم کے مطابق اس روایت کو اس طرح صرف ابوحمزہ نے نقل کیا ہے ان کی بات یہاں ختم ہو گئی ۔ ( علامہ ہیثمی فرماتے ہیں : ) ابوحمزہ نامی راوی میمون اعور ہے ، اور ” ضعیف“ ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز کے دوران اپنے جوتے صرف ایک مرتبہ اتارے تھے ( آپ کو دیکھ کر ) لوگوں نے بھی اپنے جوتے اتار دیے ( نماز کے بعد ) تو نبی اکرم صلی اللہ علیہ وسلم نے دریافت کیا : تم لوگوں نے اپنے جوتے کیوں اتارے ہیں ؟ لوگوں نے عرض کی : ہم نے آپ کو دیکھا کہ آپ نے اتار دیے ہیں تو ہم نے بھی اتار دیے نبی اکرم صلی اللہ علیہ وسلم نے ارشاد فرمایا : جبرائیل نے مجھے بتایا تھا کہ ان پر گندگی لگی ہوئی تھی ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں اسے امام بزار نے اختصار کے ساتھ نقل کیا ہے ۔

سیدنا عبداللہ بن شخیر رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں نماز پڑھاتے ہوئے اپنے جوتے اتار دیے آپ اس وقت نماز کی حالت میں تھے آپ کے پیچھے والی صف کے لوگوں نے بھی اپنے جوتے اتار دیے اس کے پیچھے والی صف کے لوگوں نے بھی جوتے اتار دیے جب نبی اکرم صلی اللہ علیہ وسلم نے نماز مکمل کی تو آپ نے دریافت کیا : تم لوگوں نے اپنے جوتے کیوں اتار دیے تھے ؟ لوگوں نے عرض کی : یا رسول اللہ ! آپ نے اتارے تھے ، تو آپ کے بعد والی صف والوں نے اتار دیے تو ہم نے بھی اتار دیے نبی اکرم صلی اللہ علیہ وسلم نے ارشاد فرمایا : جبرئیل میرے پاس آئے اور انہوں نے یہ بات ذکر کی کہ میرے جوتوں پر گندگی لگی ہوئی تھی ، تو میں نے انہیں اتار دیا تم لوگ اپنے جوتوں میں نماز ادا کر لو !
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ربیع بن بدر ہے ، اور وہ ” ضعیف“ ہے ۔