مجمع الزوائد ومنبع الفوائد

سیدنا عبداللہ بن عباس رضی اللہ عنہما کے بارے میں یہ بات منقول ہے : ایک شخص نے دریافت کیا : میرے لئے وضو کے لئے کتنا پانی کفایت کر جائے گا ؟ انہوں نے فرمایا : ایک مد ، اُس شخص نے دریافت کیا : میرے غسل کے لئے کتنا پانی کفایت کر جائے گا ؟ انہوں نے فرمایا : ایک صاع ، اُس شخص نے کہا: یہ تو میرے لئے کافی نہیں ہو گا ، سیدنا عبداللہ بن عباس رضی اللہ عنہما نے فرمایا : تمہاری ماں نہ رہے ، یہ پانی اُن کے لیے کفایت کر جاتا تھا ، جو تم سے بہتر تھے اور وہ اللہ کے رسول ہیں ۔
یہ روایت امام أحمد نے نقل کی ہے ، اُس پر کلام پہلے گزر چکا ہے ، اور دیگر احادیث بھی پہلے گزر چکی ہیں ، جو اس باب میں ہے ، جس میں یہ مذکور ہے : کہ وضو اور غسل کے لئے کتنا پانی کفایت کرتا ہے ؟

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم اپنے ہاتھ کے ذریعے اپنے سر پر تین مرتبہ پانی ڈالتے تھے ، ایک شخص نے کہا: میرے بال تو بہت زیادہ ہیں ، تو سیدنا ابوہریرہ رضی اللہ عنہ نے فرمایا : اللہ کے رسول کے بال تم سے زیادہ تھے ، اور زیادہ پاکیزہ تھے ۔
یہ روایت امام بزار اور امام أحمد نے نقل کی ہے اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ کے بارے میں یہ بات منقول ہے : ایک شخص نے اُن سے غسل جنابت کے بارے میں دریافت کیا ، تو انہوں نے فرمایا : تین ، اس نے کہا: میرے بال زیادہ ہیں ، تو سیدنا ابوسعید خدری رضی اللہ عنہ نے فرمایا : نبی اکرم صلی اللہ علیہ وسلم کے بال زیادہ تھے اور زیادہ پاکیزہ تھے ۔
یہ روایت امام أحمد نے نقل کی ہے اس کی سند میں ایک راوی عطیہ ہے ، اسے یحیی بن معین نے ” ثقہ “ قرار دیا ہے اور ایک جماعت نے اسے ” ضعیف “ قرار دیا ہے ، جو ایک کمزور تضعیف ہے ۔

ان افراد میں سے ایک صاحب بیان کرتے ہیں : جنہوں نے سیدنا عمر رضی اللہ عنہ سے سوال کیا تھا ، اُن لوگوں نے سیدنا عمر رضی اللہ عنہ سے یہ کہا: ہم آپ کے پاس اس لیے آئے ہیں ، تاکہ آپ سے تین چیزوں کے بارے میں سوال کریں ، یہ کہ آدمی کا اپنے گھر میں نقل نماز ادا کرنا ، غسل جنابت ، اور جب عورت حیض کی حالت میں ہو ، تو مرد اس کے ساتھ کس حد تک تعلق رکھ سکتا ہے ؟ سیدنا عمر رضی اللہ عنہ نے فرمایا : کیا تم لوگ جادوگر ہو ؟ جب سے میں نے ان چیزوں کے بارے میں ، نبی اکرم صلی اللہ علیہ وسلم سے سوال کیا ، اُس کے بعد کبھی کسی نے ، اس کے بارے میں مجھ سے سوال نہیں کیا ، اور اب تم نے مجھ سے ( ان امور کے بارے میں ) سوال کیا ہے ، پھر انہوں نے بتایا : آدمی کا اپنے گھر میں نفل ادا کرنا نور ہے ، اب جو شخص چاہے ، وہ اپنے گھر کو نورانی کر دے ، اس روایت میں انہوں نے یہ فرمایا : غسل جنابت کا طریقہ یہ ہے کہ آدمی اپنی شرمگاہ دھوئے گا ، وضو کرے گا ، اپنے سر پر تین مرتبہ پانی ڈالے گا ، حیض والی عورت کے بارے میں انہوں نے یہ فرمایا : تہ بند سے اوپر ، اُس کے ساتھ تعلق رکھا جا سکتا ہے ۔ ( علامہ ہیثمی فرماتے ہیں : ) : میں یہ کہتا ہوں : امام ابن ماجہ نے اس میں سے ” گھر میں نماز ادا کرنے “ کا واقعہ روایت کیا ہے ،
یہ روایت امام أحمد نے اسی طرح ایک شخص کے حوالے سے ، عمرو سے نقل کی ہے ، اور انہوں نے اُس شخص کا نام بیان نہیں کیا ہے ۔

امام طبرانی نے معجم اوسط میں عاصم بن عمرو بجلی کے حوالے سے سیدنا عمر کے غلام عمیر کا یہ بیان نقل کیا ہے : ” عراق سے تعلق رکھنے والے کچھ افراد سیدنا عمر رضی اللہ عنہ کی خدمت میں حاضر ہوئے ، سیدنا عمر رضی اللہ عنہ نے دریافت کیا : تم لوگ کس سلسلے میں آئے ہو ؟ انہوں نے بتایا : ہم آپ کے پاس اس لیے آئے ہیں ، تاکہ ہم آپ سے تین چیزوں کے بارے میں دریافت کریں ، سیدنا عمر رضی اللہ عنہ نے فرمایا : وہ کیا ہے ؟ اُن لوگوں نے کہا: آدمی کا اپنے گھر میں نفل ادا کرنا ، یہ کیا ہے ؟ اور آدمی کے لیے اپنی حیض والی بیوی کے ساتھ کس حد تک تعلق رکھنا جائز ہے ؟ اور غسل جنابت کے بارے میں پوچھنا چاہتے ہیں ، سیدنا عمر رضی اللہ عنہ نے فرمایا : کیا تم لوگ جادوگر ہو ؟ انہوں نے کہا: جی نہیں ! اللہ کی قسم ! اے امیر المؤمنین ! ہم جادوگر نہیں ہیں ، سیدنا عمر رضی اللہ عنہ نے فرمایا : پھر کیا تم لوگ کاہن ہو ؟ انہوں نے جواب دیا : جی نہیں ! سیدنا عمر رضی اللہ عنہ نے فرمایا : تم لوگوں نے مجھ سے تین ایسی چیزوں کے بارے میں سوال کیا ہے کہ جب میں نے نبی اکرم صلی اللہ علیہ وسلم سے اُن کے بارے میں سوال کیا تھا ، اُس کے بعد سے لے کر ، اب تک تم سے پہلے کسی اور نے مجھ سے ان کے بارے میں سوال نہیں کیا ، پھر سیدنا عمر رضی اللہ عنہ نے بتایا : جہاں تک آدمی کے گھر میں نفل ادا کرنے کا تعلق ہے ، تو یہ نور ہے ، تم سے جہاں تک ہو سکے ، اپنے گھر کو نورانی کرو ، جہاں تک حیض والی عورت کے مسئلے کا تعلق ہے ، تو تہبند سے اوپر کا حصہ تمہارے لیے جائز ہے ، اس سے نیچے والا تمہارے لئے جائز نہیں ہے ، جہاں تک غسل جنابت کا تعلق ہے ، تو تم اپنے دائیں ہاتھ کے ذریعے بائیں ہاتھ پر پانی ڈالو ، پھر اپنا ہاتھ برتن میں داخل کرو ، اور اپنی شرمگاہ کو ، اور جو مواد تمہیں لگا ہے ، اُسے دھو لو ، پھر تم نماز کے وضو کی طرح وضو کرو ، پھر تم اپنے سر پر تین مرتبہ پانی ڈالو ، اور ہر مرتبہ اپنے سر کو مل لو !
یہ روایت امام ابویعلیٰ نے اس سند کے ساتھ نقل کی ہے ، اس کے رجال ثقہ ہیں ، امام أحمد کے رجال بھی اسی طرح ہیں ، البتہ اس میں ایک شخص ایسا ہے ، جس کا نام بیان نہیں کیا گیا ، تو وہ مجہول ہے ۔

سیدنا انس رضی اللہ عنہ بیان کرتے ہیں : ثقیف قبیلے کے وفد نے عرض کی : یا رسول اللہ ! ہمارا علاقہ ، ٹھنڈا علاقہ ہے ، تو غسل جنابت میں ہمارے لیے کیا چیز کفایت کرے گی ؟ نبی اکرم صلی اللہ علیہ وسلم نے ارشاد فرمایا : میں تو اپنے سر پر تین مرتبہ پانی بہا دیتا ہوں ۔
یہ روایت امام ابویعلیٰ نے نقل کی ہے اور اس کے رجال ”صحیح“ کے رجال ہیں ۔

سیدنا انس بن مالک رضی اللہ عنہ بیان کرتے ہیں : جب نبی اکرم صلی اللہ علیہ وسلم مدینہ منورہ تشریف لائے تھے ، اُس وقت میں آٹھ سال کا تھا ، میری والدہ نے میرا ہاتھ پکڑا اور مجھے ساتھ لے کر نبی اکرم صلی اللہ علیہ وسلم کی خدمت میں حاضر ہوئیں ، انہوں نے عرض کی : یا رسول اللہ ! انصار سے تعلق رکھنے والے ہر مرد اور ہر عورت نے آپ کی خدمت میں کوئی تحفہ پیش کیا ہے ، میں آپ کی خدمت میں کوئی تحفہ پیش کرنے کی قدرت نہیں رکھتی ، البتہ میرا یہ بیٹا ہے ، آپ اسے ( خادم کے طور پر ) رکھ لیں ، جب تک آپ کو مناسب لگے گا ، یہ آپ کی خدمت کرتا رہے گا ۔ سیدنا انس رضی اللہ عنہ بیان کرتے ہیں : تو میں نے دس سال ، نبی اکرم صلی اللہ علیہ وسلم کی خدمت کی ، آپ نے کبھی مجھے مارا نہیں ، کبھی برا نہیں کہا: ، کبھی مجھے جھڑکا نہیں ، کبھی میرے سامنے ماتھے پر بل نہیں ڈالے ، آپ صلی اللہ علیہ وسلم نے مجھے سب سے پہلے جو تلقین کی وہ یہ تھی کہ آپ نے فرمایا : اے میرے بیٹے ! میرے ” ستر “ کو چھپا کے رکھنا ، تم مومن ہو جاؤ گے ، پھر میری والدہ اور نبی اکرم صلی اللہ علیہ وسلم کی ازواج ، مجھ سے نبی اکرم صلی اللہ علیہ وسلم کے ” ستر “ کے بارے میں دریافت کرتی تھیں ، تو میں انہیں اس بارے میں نہیں بتاتا تھا ، اور نبی اکرم صلی اللہ علیہ وسلم کے ” ستر “ کے بارے میں ، میں کبھی کسی کو نہیں بتاؤں گا ۔ نبی اکرم صلی اللہ علیہ وسلم نے ارشاد فرمایا : اے میرے بیٹے ! تم پر لازم ہے کہ اچھی طرح وضو کرو ، تمہارے دونوں محافظ فرشتے تم سے محبت رکھیں گے ، تمہاری عمر لمبی ہو گی ، اور اے انس ! غسل جنابت میں مبالغہ کرنا ، کیونکہ جب تم غسل خانے سے نکلو گے ، تو تم پر کوئی گناہ اور کوئی خطاء نہیں ہو گی ، سیدنا انس رضی اللہ عنہ کہتے ہیں : میں نے عرض کی : یا رسول اللہ ! یہ مبالغہ کیسے ہو گا ؟ نبی اکرم صلی اللہ علیہ وسلم نے ارشاد فرمایا : تم بالوں کی جڑوں کو تر کرنا ، اور جلد کو صاف کرنا ۔ اے میرے بیٹے ! اگر تم سے ہو سکے ، تو تم ہمیشہ با وضو رہنا ، کیونکہ جس شخص کو ایسی حالت میں موت آئے کہ وہ باوضو ہو ، تو اُسے شہادت کا مرتبہ دیا جائے گا ۔ اے میرے بیٹے ! اگر تم سے ہو سکے ، تو تم نفل نماز ادا کرتے رہنا ، کیونکہ جب تک تم نماز ادا کرتے رہو گے ، فرشتے تمہارے لئے دعائے رحمت کرتے رہیں گے ۔ اے انس ! جب تم رکوع کرو ، تو اپنی ہتھیلیاں اپنے گھٹنوں پر جما کے رکھنا ، اپنی کہنیاں کشادہ رکھنا ، اپنے بازؤں کو پہلو سے دور رکھنا ۔ اے میرے بیٹے ! جب تم رکوع سے سر اٹھاؤ ، تو اپنے ہر ایک عضو کو اس کی مخصوص جگہ پر ٹھہرا دینا ، کیونکہ قیامت کے دن ، اللہ تعالیٰ اس شخص کی طرف نظر رحمت نہیں کرے گا ، جو رکوع اور سجدے کے درمیان اپنی پشت کو سیدھا نہیں کرتا ہے ۔ اے میرے بیٹے ! جب تم سجدہ کرو ، تو اپنی پیشانی اور اپنی ہتھیلیاں زمین پر جما کے رکھنا ، تم مرغ کے ٹھونگا مارنے کی طرح ٹھونگے نہ مارنا ، اور تم کتے ۔ ( راوی کو شک ہے ، یا شاید یہ الفاظ ہیں : ) - لومڑی کی طرح ” اقعاء “ کے طور پر نہ بیٹھنا ، اور نماز کے دوران ادھر ادھر نہ دیکھنا ، کیونکہ نماز کے دوران ادھر ادھر دیکھنا ہلاکت کا باعث ہے ، اگر اُس کے بغیر چارہ نہ ہو ، تو نفل نماز میں ایسا کر لینا ، فرض میں ایسا نہ کرنا ۔ اے میرے بیٹے ! جب تم اپنے گھر سے نکلو ، تو تمہاری نظر اہل قبلہ میں سے ، جس شخص پر بھی پڑے ، تم اُسے سلام کرنا ، جب تم واپس آؤ گے ، تو تمہاری مغفرت ہو چکی ہو گی ۔ اے میرے بیٹے ! جب تم اپنے گھر میں داخل ہو ، تو اپنے اوپر ، اور اپنے اہل خانہ پر ، سلام بھیجنا ۔ اے میرے بیٹے ! اگر تم سے ہو سکے ، تو تم ایسی حالت میں صبح و شام کرنا ، کہ تمہارے دل میں کسی کے لئے کھوٹ ، یا کینہ نہ ہو ، اس طرح تمہارے لیے حساب دینا آسان ہو گا ۔ اے میرے بیٹے ! اگر تم نے میری ہدایت کی پیروی کی ، تو تمہارے نزدیک کوئی بھی چیز موت سے زیادہ محبوب نہیں ہو گی ۔
یہ روایت امام ابویعلیٰ نے اور امام طبرانی نے معجم صغیر میں نقل کی ہے ، اور اس میں یہ الفاظ زائد ہیں : اے میرے بیٹے ! جب تم اپنے گھر سے نکلو ، تو تمہاری نگاہ اہل قبلہ میں سے ، جس شخص پر بھی پڑے ، تو تم بھی گمان کرنا کہ وہ تم پر فضیلت رکھتا ہے ۔ اے میرے بیٹے ! یہ چیز میری سنت ہے ، اور جو شخص میری سنت کا احیاء کرے گا ، وہ مجھ سے محبت رکھے گا ، اور جو شخص مجھ سے محبت رکھے گا ، وہ جنت میں میرے ساتھ ہو گا ۔ اس روایت کی سند میں ایک راوی محمد بن حسن بن ابویزید ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” غسل جنابت کے لیے چھ مد کفایت کر جاتے ہیں “ ۔
یہ روایت امام بزار نے نقل کی ہے ، اس کی سند میں ایک راوی یزید بن عبدالملک نوفلی ہے ، جسے تمام محدثین نے ”ضعیف“ قرار دیا ہے ، امام بخاری رحمہ اللہ نے ، اور دو میں سے ایک روایت کے مطابق ، یحییٰ بن معین نے ، اور امام نسائی رحمہ اللہ نے اسے ضعیف کہا: ہے ، جبکہ ایک روایت کے مطابق یحیی بن معین نے اسے ” ثقہ “ قرار دیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم ایک مد ( پانی ) کے ذریعے وضو کر لیتے تھے ، اور ایک صاع کے ذریعے غسل کر لیتے تھے ۔
یہ روایت امام بزار نے ابراہیم بن سلیمان فناد سے نقل کی ہے وہ فرماتے ہیں : اس میں کوئی حرج نہیں ہے ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : غسل جنابت کا سنت طریقہ یہ ہے کہ تم اپنا ہاتھ دھوؤ ، یہاں تک کہ اسے اچھی طرح صاف کرو ، پھر اپنا دایاں ہاتھ برتن میں داخل کرو ، اور دائیں ہاتھ کے ذریعے بائیں ہاتھ پر پانی ڈالو ، اور اپنی شرمگاہ کو دھو لو ، یہاں تک کے اُسے اچھی طرح صاف کر لو ، پھر اپنا بایاں ہاتھ دیوار پر ، یا زمین پر رکھ کر اسے مل لو ، پھر اپنے دائیں ہاتھ کے ذریعے اس پر پانی ڈال کر اُسے دھو لو ، پھر نماز کے وضو کی طرح وضو کرو ۔
یہ روایت امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ، صرف عبداللہ بن محمد بن عباس اصفہانی کا معاملہ مختلف ہے ، میں اُس سے واقف نہیں ہوں ۔

سیده میمونہ بنت سعد رضی اللہ عنہا بیان کرتی ہیں : اُنہوں نے عرض کی : یا رسول اللہ ! آپ ہمیں غسل جنابت کے بارے میں حکم بیان کیجیے ! نبی اکرم صلی اللہ علیہ وسلم نے ارشاد فرمایا : تم بالوں کی جڑوں کو تر کرو ، اور جلد کو صاف کر لو ، جو لوگ اچھی طرح سے غسل نہیں کرتے ہیں ، اُن کی مثال اس درخت کی مانند ہے ، جس تک پانی پہنچ جاتا ہے ، لیکن نہ اس کا پتہ پھوٹتا ہے ، نہ اس کی جڑ سیراب ہوتی ہے ، تم لوگ اللہ تعالیٰ سے ڈرو ! اور اچھی طرح غسل کرو ، یہ ایک امانت ہے ، جو تمہارے ذمہ ڈالی گئی ہے ، اور ایک پوشیدہ چیز ہے ، جو تمہارے سپرد کی گئی ہے ، میں نے عرض کی : یا رسول اللہ ! سر کے لیے کتنا پانی کفایت کرے گا ؟ آپ نے فرمایا : تین مرتبہ دونوں ہاتھ ملا کر ڈالنا ۔
یہ روایت امام طبرانی نے معجم کبیر میں عثمان بن عبدالرحمان کے حوالے سے ، عبدالحمید سے نقل کی ہے ، میں نے کسی کو ان دونوں کے حالات بیان کرتے ہوئے نہیں دیکھا ہے ۔

سیدہ ام عطیہ رضی اللہ عنہا بیان کرتی ہیں : میں ان خواتین میں شامل تھی ، جنہوں نے نبی اکرم صلی اللہ علیہ وسلم کی صاحبزادی کو تیار کیا تھا ، آپ نے ارشاد فرمایا : جب تم اُس کے سر پر پانی ڈالو ، تو غسل جنابت میں تین مرتبہ پانی ڈالنا ۔
یہ روایت امام طبرانی نے معجم کبیر میں نقل کی ہے ، سیدہ ام عطیہ رضی اللہ عنہا کی کنیز ام حکیم کا ذکر کرتے ہوئے ، میں نے کسی کو نہیں پایا ہے ۔

سیدنا عبداللہ بن عمر رضی اللہ عنہما کے بارے میں یہ بات منقول ہیں وہ غسل کرتے ہوئے آنکھیں کھولتے تھے اور ناف میں انگلی داخل کرتے تھے ۔
یہ روایت امام طبرانی نے معجم کبیر میں نقل کی ہے اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : میں نے اپنے سر کے بالوں کو مضبوطی سے باندھا ہوا تھا ، نبی اکرم صلی اللہ علیہ وسلم نے ارشاد فرمایا : اے عائشہ ! کیا تمہیں علم نہیں ہے ؟ کہ ہر بال کے نیچے جنابت ہوتی ہے ؟
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ، البتہ اس میں ایک راوی ایسا ہے ، جس کا نام بیان نہیں کیا گیا ہے ۔

سیدنا سالم رضی اللہ عنہ ، جو نبی اکرم صلی اللہ علیہ وسلم کے خادم ہیں ، وہ بیان کرتے ہیں : نبی اکرم صلی اللہ علیہ وسلم کی ازواج سر کے بالوں کی چار چوٹیاں بناتی تھیں ، اور جب وہ غسل کرنے لگتی تھیں ، تو سر کے درمیان میں انہیں اکٹھا کر لیتی تھیں ، انہیں کھولتی نہیں تھیں ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی عمر بن ہارون ہے ، جسے زیادہ تر لوگوں نے ” ضعیف“ قرار دیا ہے ، جبکہ قتیبہ اور دیگر حضرات نے اسے ” ثقہ “ قرار دیا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب عورت حیض کے بعد غسل کرے گی ، تو اپنے بال کھولے گی اور انھیں خطمی اور اشنان کے ذریعے دھوئے گی ، لیکن جب وہ جنابت کے بعد غسل کرے گی ، تو اپنے سر پر پانی ڈال لے گی ، اور بالوں کو نچوڑ لے گی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلمہ بن صبیح یحمدی ہے ، میں نے کسی کو اس کا ذکر کرتے ہوئے نہیں پایا ہے ۔