السنن الكبرى للبيهقي

حصین بن عبد الرحمن کہتے ہیں: میں نے ابو مالک غفاری رضی اللہ عنہ سے سنا، وہ کہتے ہیں کہ احد کے مقتولین میں سے نو لائے گئے اور دسویں ان میں حمزہ رضی اللہ عنہ تھے، پھر رسول اللہ ﷺ نے ان کا جنازہ پڑھا، پھر وہ اٹھائے گئے اور مزید نو کو لایا گیا، ان پر جنازہ پڑھا گیا اور حمزہ رضی اللہ عنہ اپنی جگہ پر ہی تھے جب نماز جنازہ پڑھی گئی۔

حضرت حصین، ابو مالک غفاری رضی اللہ عنہ سے بیان کرتے ہیں کہ انہوں نے کہا: رسول اللہ ﷺ نے مقتولینِ احد میں دس دس کی نمازِ جنازہ پڑھی اور ہر دس میں دسویں حمزہ رضی اللہ عنہ تھے، یہاں تک کہ آپ ﷺ نے ستر مرتبہ آپ کا جنازہ پڑھا۔
اس باب میں یہ سب سے صحیح روایت ہے اور یہ مرسل ہے۔
عطاء، شعبی سے بیان کرتے ہیں کہ نبی ﷺ نے احد کے دن حمزہ رضی اللہ عنہ پر ستر جنازے پڑھے، آغاز بھی حمزہ رضی اللہ عنہ کے جنازے سے کیا، پھر آپ ﷺ دیگر شہداء کو منگواتے اور جنازے پڑھتے اور حمزہ رضی اللہ عنہ اسی جگہ پر رہے۔
یہ بھی منقطع ہے، جبکہ سیدنا جابر رضی اللہ عنہ کی حدیث موصول ہے اور ان کے والد شہدائے احد میں سے تھے۔

سیدنا عبداللہ بن عباس رضی اللہ عنہما کہتے ہیں کہ غزوہِ احد میں جب سیدنا حمزہ رضی اللہ عنہ شہید ہوئے تو سیدہ صفیہ رضی اللہ عنہا انہیں تلاش کرتی ہوئی آئیں اور وہ نہیں جانتی تھیں کہ سیدنا حمزہ رضی اللہ عنہ کے ساتھ کیا ہوا ہے، تو وہ سیدنا علی رضی اللہ عنہ اور سیدنا زبیر رضی اللہ عنہ سے ملیں، تو سیدنا علی رضی اللہ عنہ نے سیدنا زبیر رضی اللہ عنہ سے کہا: اپنی ماں کو بتا دو، تو سیدنا زبیر رضی اللہ عنہ نے کہا: ”نہیں، بلکہ تم اپنی پھوپھی کو بتاؤ۔“ راوی کہتے ہیں: سیدہ صفیہ رضی اللہ عنہا نے پوچھا کہ حمزہ (رضی اللہ عنہ) کے بارے میں کیا ہوا؟ تو ان دونوں نے ایسا ظاہر کیا گویا وہ کچھ جانتے نہیں، تو نبی کریم ﷺ تشریف لائے۔ آپ ﷺ نے فرمایا: ”میں اس کی عقل کے بارے میں ڈرتا ہوں (کہ کہیں حواس نہ کھو بیٹھے)۔“ پھر آپ ﷺ نے اپنا ہاتھ ان کے سینے پر رکھا اور دعا کی۔ راوی کہتے ہیں: پھر سیدہ صفیہ رضی اللہ عنہا نے «إِنَّا لِلَّهِ وَإِنَّا إِلَيْهِ رَاجِعُونَ» ”بے شک ہم اللہ ہی کے لیے ہیں اور اسی کی طرف لوٹنے والے ہیں“ پڑھی اور رو دیں۔ راوی کہتے ہیں: پھر آپ ﷺ ان کے پاس آئے اور رک گئے اور سیدنا حمزہ رضی اللہ عنہ کا مثلہ کیا گیا تھا، تو آپ ﷺ نے فرمایا: ”اگر عورتوں کی جزع فزع (کا ڈر) نہ ہوتا تو میں اسے اسی حال میں چھوڑ دیتا، یہاں تک کہ اسے درندوں کے پیٹوں اور پرندوں کے پوٹوں سے اکٹھا کیا جاتا۔“ راوی کہتے ہیں: پھر آپ ﷺ نے مقتولین کے متعلق حکم دیا اور جنازہ پڑھا، تو نو مقتولین کو رکھا جاتا اور دسویں سیدنا حمزہ رضی اللہ عنہ ہوتے، پھر آپ ﷺ ان پر سات تکبیرات کہتے تو ان کو اٹھا لیا جاتا اور سیدنا حمزہ رضی اللہ عنہ کو چھوڑ دیا جاتا، پھر مزید نو کو لایا جاتا، ان پر بھی آپ ﷺ سات تکبیرات کہتے یہاں تک کہ آپ ﷺ سب سے فارغ ہو گئے۔
میں اسے صرف ابوبکر بن عیاش کی یزید بن ابی زیاد سے روایت ہی سے جانتا ہوں اور یہ دونوں حافظ (پختہ یادداشت والے) نہیں تھے۔

سیدنا عبداللہ بن حارث رضی اللہ عنہ کہتے ہیں: رسول اللہ ﷺ نے سیدنا حمزہ رضی اللہ عنہ کا جنازہ پڑھا اور نو تکبیرات پڑھیں۔
یہ (روایت) محفوظ ہونے کے زیادہ لائق ہے اور یہ منقطع ہے۔

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے سیدنا حمزہ رضی اللہ عنہ کی نماز جنازہ پڑھی اور اس پر سات تکبیرات کہیں، کسی بھی مقتول کو نہیں لایا گیا مگر سیدنا حمزہ رضی اللہ عنہ اس کے ساتھ ہوتے اور آپ ﷺ جنازہ پڑھتے، یہاں تک کہ ان کے بہتر (72) جنازے پڑھے۔
یہ ضعیف ہے اور محمد بن اسحاق بن یسار جب اپنے شیخ کا نام ذکر نہ کریں تو ان کی روایت قابلِ اعتبار نہیں۔
حسن بن عمارہ، حکم سے اور وہ مقسم سے اور وہ سیدنا عبداللہ بن عباس رضی اللہ عنہما سے بیان کرتے ہیں کہ نبی کریم ﷺ نے احد کے مقتولین کا جنازہ پڑھا، مگر حسن بن عمارہ ضعیف ہے، اس کی حدیث کو حجت نہیں بنایا جا سکتا۔

ابو داؤد کہتے ہیں کہ مجھ سے شعبہ نے کہا: ”جریر بن حازم کے پاس جاؤ اور ان سے کہو: تمہارے لیے حسن بن عمارہ سے روایت کرنا جائز نہیں، کیونکہ وہ بہت جھوٹا ہے۔“ محمود کہتے ہیں: میں نے ابو داؤد سے کہا: یہ کیسے؟ انہوں نے کہا: میں نے شعبہ سے پوچھا: اس کے جھوٹ کی علامت کیا ہے؟ انہوں نے کہا: ”اس نے حکم سے ایسی چیزیں روایت کیں جن کی میں نے کوئی اصل نہیں پائی۔ میں نے حکم سے پوچھا: کیا نبی کریم ﷺ نے احد کے مقتولین کی نماز جنازہ پڑھی تھی؟ انہوں نے کہا: نہیں۔ جبکہ حسن بن عمارہ نے کہا: مجھ سے حکم نے مقسم سے اور انہوں نے سیدنا عبداللہ بن عباس رضی اللہ عنہما سے بیان کیا کہ نبی کریم ﷺ نے احد کے مقتولین کی نماز جنازہ پڑھی۔ اور میں نے حکم سے پوچھا: زنا سے پیدا ہونے والی اولاد کے بارے میں آپ کیا کہتے ہیں؟ انہوں نے کہا: انہیں آزاد کیا جائے گا۔ میں نے کہا: کس سے (یہ روایت ہے)؟ انہوں نے کہا: یہ اہلِ بصرہ کی حدیث میں سیدنا علی رضی اللہ عنہ سے روایت کیا جاتا ہے۔ جبکہ حسن بن عمارہ نے کہا: مجھ سے حکم نے یحییٰ بن جزار سے اور انہوں نے سیدنا علی رضی اللہ عنہ سے بیان کیا کہ انہیں آزاد کیا جائے گا۔“