صحيح الادب المفرد

نافع سے روایت ہے کہ سیدنا عبداللہ بن عمر رضی اللہ عنہما جب اپنے گھر والوں میں سے کسی کو نرد (چوسر) کھیلتے ہوئے پاتے تو اسے مارتے اور اس (نرد) کو توڑ دیتے۔

سیدہ عائشہ رضی اللہ عنہا سے روایت ہے کہ انہیں یہ خبر پہنچی کہ ان کے گھر میں رہنے والے ایک گھرانے کے لوگوں کے پاس، جو اس میں کرایہ دار تھے، نرد (چوسر) ہے، تو انہوں نے ان کی طرف پیغام بھیجا: ”اگر تم نے اسے نہ نکالا تو میں تمہیں اپنے گھر سے نکال دوں گی۔“ اور انہوں نے ان کے اس کام پر ناپسندیدگی کا اظہار کیا۔

کلثوم بن جبر سے روایت ہے، انہوں نے کہا: سیدنا ابن زبیر رضی اللہ عنہما نے ہمیں خطبہ دیا اور فرمایا: ”اے اہل مکہ! مجھے قریش کے کچھ لوگوں کے بارے میں خبر پہنچی ہے کہ وہ ایک کھیل کھیلتے ہیں جسے نردشیر کہا جاتا ہے - اور وہ (ابن زبیر) بائیں ہاتھ سے کام کرنے والے تھے - (پھر) فرمایا: اللہ کی قسم! (اللہ تعالیٰ فرماتا ہے:) «إنما الخمر والميسر» ”بیشک شراب اور جوا ...“ اور میں اللہ کی قسم کھاتا ہوں کہ میرے پاس جو بھی ایسا آدمی لایا گیا جس نے یہ کھیل کھیلا ہو تو میں اسے اس کے بالوں اور اس کی کھال میں سزا دوں گا، اور اس کا سامان اس شخص کو دے دوں گا جو اسے میرے پاس لائے گا۔“

سیدنا عبداللہ بن عمرو بن عاص رضی اللہ عنہما سے روایت ہے، انہوں نے فرمایا: ”جوئے کے طور پر دو پانسوں سے کھیلنے والا سور کا گوشت کھانے والے کی طرح ہے، اور جوئے کے بغیر ان سے کھیلنے والا سور کے خون میں اپنا ہاتھ ڈبونے والے کی طرح ہے۔“