صحيح الادب المفرد

سیدنا عبداللہ (بن مسعود) رضی اللہ عنہ سے روایت ہے، انہوں نے فرمایا : ”جب آدمی کو بلایا جائے تو (یہی) اس کے لیے اجازت ہے ۔“

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”جب تم میں سے کسی کو بلایا جائے اور وہ بلانے والے قاصد کے ساتھ ہی آ جائے تو یہی اس کی اجازت ہے ۔“

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”آدمی کا دوسرے آدمی کی طرف (بھیجا ہوا) قاصد ہی اس کی اجازت ہے ۔“

ابو العلانیہ سے روایت ہے، انہوں نے کہا: میں سیدنا ابوسعید خدری رضی اللہ عنہ کے پاس آیا، میں نے سلام کیا تو مجھے اجازت نہ ملی، پھر سلام کیا تو اجازت نہ ملی، پھر تیسری بار سلام کیا اور اپنی آواز بلند کی اور کہا: السلام علیکم اے گھر والو! پھر بھی مجھے اجازت نہ ملی، تو میں ایک طرف ہٹ کر بیٹھ گیا۔ پھر ایک لڑکا میرے پاس باہر آیا اور کہا: اندر آ جاؤ، میں اندر گیا تو سیدنا ابوسعید رضی اللہ عنہ نے مجھ سے فرمایا : ”سنو! اگر تم (تین بار سے) زیادہ (اجازت مانگتے) تو تمہیں اجازت نہ دی جاتی ۔“ پھر میں نے ان سے (نبیذ کے) برتنوں کے بارے میں پوچھا تو میں نے جس چیز کے بارے میں بھی پوچھا انہوں نے فرمایا : ”حرام ہے ۔“ یہاں تک کہ میں نے ان سے جف (کھجور کے شگوفے کے غلاف سے بنے برتن) کے بارے میں پوچھا تو فرمایا : ”حرام ہے ۔“ محمد نے کہا: ”اس کے منہ پر چمڑا لگا کر اسے باندھ دیا جائے ۔“