المستدرك على الصحيحين

سیدنا علی رضی اللہ عنہ سے روایت ہے کہ رسول اللہ ﷺ نے مجھ سے فرمایا: ”اے علی! بھلائی کو میری امت کے رحم دل لوگوں کے پاس تلاش کرو تو تم ان کے زیرِ سایہ (سکون سے) رہو گے، اور سخت دل لوگوں سے بھلائی طلب نہ کرو کیونکہ ان پر لعنت نازل ہوتی ہے۔ اے علی! اللہ تعالیٰ نے بھلائی کو پیدا کیا اور اس کے لیے کچھ لوگوں کو بھی مخصوص کیا، پھر بھلائی ان کے لیے محبوب بنا دی اور اس پر عمل کرنا بھی ان کے لیے پسندیدہ بنا دیا، اور اللہ بھلائی کے طالبوں کو ان کی طرف ایسے ہی بھیجتا ہے جیسے وہ خشک زمین کی طرف پانی روانہ کرتا ہے تاکہ اس کے ذریعے زمین اور اس کے رہنے والے زندہ ہو جائیں۔ اے علی! دنیا میں بھلائی کرنے والے ہی آخرت میں بھلائی پانے والے ہوں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”لذتوں کو پاش پاش کر دینے والی چیز یعنی موت کو کثرت سے یاد کیا کرو۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن مسعود رضی اللہ عنہ سے روایت ہے کہ نبی کریم ﷺ نے فرمایا: ”تم جائیدادیں اور کھیتیاں (بنانے کی حرص) نہ پالو ورنہ تم دنیا ہی کی رغبت میں پڑ جاؤ گے۔“
یہ حدیث صحیح الاسناد ہے۔